Abanyarwanda bo muri Mozambique bategereje igitaramo ‘Rwanda Cultural Night’

Yanditswe na Mazimpaka Jean Pierre
Kuya 21 Kamena 2018 saa 08:46
Yasuwe :
0 0

Abanyarwanda batuye muri Mozambique n’inshuti z’u Rwanda biteguranye ubwuzu kwakira igitaramo cyo gusigasira umuco cyiswe “Rwanda Cultural Night”.

Iki gitaramo kizabimburira ibindi byo kuzengura Isi himakazwa umuco w’u Rwanda kizabera i Maputo muri Mozambique ku itariki ya 24 Kamena 2018, kizabera ahitwa Big Brother mu gace k’ubucuruzi gatuyemo Abanyarwanda benshi.

Umuyobozi wa Rwanda Updates yateguye uru rukurikirane rw’ibitaramo, Kagabo Jacques, avuga ko bifuza gufasha abanyarwanda baba mu mahanga kurushaho gukomeza gusabana ntibaherwanwe n’umuco y’ibihugu babamo.

Yagize ati “Ibi bitaramo twise ‘Rwanda Cultural Night’ bizahuza Abanywaranda baba hirya no hino ku Isi, twishimire intambwe igihugu cyacu kimaze gutera, twongere gutekereza ku ndangagaciro zacu n’ibituranga nk’Abanyarwanda. Ibi bizatuma buri wese arushaho kumva uruhare rwe mu kubaka igihugu.”

Kagabo Jacques yanasobanuye ko ari bo batumiye Butera Knowless wari uherutse gutangaza ko hari ibitaramo azakorera muri Mozambique na Zambia.

Kagabo yagize ati “Mu bahanzi twatumiye harimo Butera Knowless, King James, Masamba Intore ndetse na Orchestre Impala. Haziyongeraho undi muhanzi wo muri Mozambique na we ukunzwe witwa Mr. Bow uzaza kwifatanya n’Abanyarwanda.”

Yakomeje avuga ko aba bahanzi ari nabo bazakomezanya muri Zambia naho hakaziyongeraho abahanzi bakunzwe muri icyo gihugu barimo Roberto.

Ibi kandi byanemejwe na Ishimwe Clement ushinzwe gukurikirana inyungu z’umuziki wa Knowless aho yavuze ko basinyanye amasezerano na Rwanda updates itegura ibitaramo bya Rwanda Cultural Nights, ari byo Knowless azaririmbamo muri Mozambique na Zambiya.

Ubwuzu ni bwinshi ku Banyarwanda baba muri Mozambique

Mu kiganiro IGIHE yagiranye n’umunyarwanda uhagarariye ababa muri Mozambique, Louis Baziga yagaragaje ko biteguranye ubwuzu bwinshi kwakira abahanzi bazaturaka mu Rwanda kandi ngo ni ishema kuri bo.

Yagize ati “Umuco wacu ni wo utuma tuba abo turi bo. Ni iby’agaciro ku Banyarwanda bari hano Mozambique kuko ni akanya keza ko gutuma umuco wacu umenyekana natwe bitubere ishema.”

Yakomeje avuga ko iki gitaramo kizaba umwanya mwiza wo gusigasira umuco w’u Rwanda ku Banyarwand baba muri Mozambique.

Yagize ati “Twiteguye guhita dushyiraho abashinzwe umuco, gushinga itorero rizajya riduserukira mu mujyo w’umuco wacu, bizagume mu ruhererekane rw’abazadukomokaho.”

Orchestre Impala itegerejwe na benshi mu batuye muri Mozambique na Zambia

Nyuma ya Mozambique, ibitaramo bya Rwanda Cultural Nights bizakomereza Lusaka muri Zambiaa ku wa 30 Kamena, i Nairobi muri Kenya ku wa 14 Nyakanga ndetse n’i Buruseli ku wa 3 Kanama 2018.

Ibi biteramo kandi biteganyijwe ko bizabera muri Congo Brazaville, Canada, Leta Zunze Ubumwe za Amerika, u Bwongereza, Australie na Leta Zunze ubumwe za Abarabu.

Masamba Intore yiteguye neza igitaramo Rwanda Cultural Night kizabera muri Mozambique no muri Zambia
Butera Knowless na we yatumiwe muri ibi bitaramo

Twitter: @Mazimpakajp


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza