Abanyarwanda 10 batambutse mu cyiciro cya mbere cy’ijonjora rya Godfather East Africa

Yanditswe na Dusabimana Aimable
Kuya 22 Mutarama 2018 saa 02:09
Yasuwe :
0 0

Abanyarwanda 10 batoranyijwe mu bitabiriye ijonjora ry’ibanze kuzajya guhatanira imyanya itatu mu irushanwa rya Godfather East Africa rizabera muri Kenya.

Ni nyuma y’ijonjora ry’ibanze mu Rwanda ryabereye ahitwa Envy Nightlife mu Mujyi wa Kigali, ku wa 16 Mutarama 2018; abanyamideli batandukanye barimo n’abantu basanzwe bazwi mu bijyanye n’imyidagaduro bagahatwa ibibazo n’itsinda ryaturutse muri Kenya.

Ubuyobozi bw’iri rushanwa riteguwe mu buryo bujya kumera nk’ubwifashishwaga muri Big Brother Africa itakibaho, bwasohoye urutonde rw’abanyamideli 10 bahataniye imyanya itatu nyuma yo kujonjorwa muri 17 bari bifuje kwitabira The Godfather East Africa baturuka mu Rwanda.

Abatsinze ijonjora rya mbere ryo mu Rwanda bahabwa amahirwe ku rubuga rw’iri rushanwa ni: Miss Uwase Vanessa;, Shiny, Jay D, Sissi Ngamije, Phil Peter, Sandra Teta, Sydney, Gigi G, Carol Duran na Steven Rurangirwa.

Hatangizwa iri rushanwa mu Rwanda, umuyobozi mu gutegura Godfather East Africa, Sir Allan, yabwiye itangazamakuru ko iri rushanwa ryo kugenzura imibanire hagati y’abaryitabira rije risimbura irya Big Brother Africa ryamamaye ku mugabane ariko rikaza guteshwa agaciro na bimwe mu bikorwa biteye isoni byarikorerwagamo bigatambutswa imbonankubone mu buryo bw’amashusho.

Yavuze ko bayunguruye bimwe mu byakorerwaga mu nzu yakira abahatana gusa na ryo ngo rizaba ryemewe gukurikiranwa n’abafite imyaka 16 kuzamura. Uzahiga abandi mu kugaragaza imibanire myiza muri iri rushanwa rizajya ritambuka imbonankubone kuri Citizen TV no kuri Internet azahembwa amashilingi ya Kenya miliyoni 2.5.

Yagize ati "Usibye amashilingi ya Kenya miliyoni 2.5 dutekereza ko atari make kuko angana na miliyoni 20 uyavunje mu y’inaha, no mu gihe abatoranyijwe bazaba bari mu nzu ya Godfather, bazaba bashobora kwinjiza. Umuntu azajya agira atya akubure nk’icyumba runaka abe aguye nko ku madolari ijana cyangwa isaha ihenze. Ntawamenya, byose reka tubitegereze mu irushanwa."

Kabagire Christelle uhagarariye itsinda rya The GodFather East Africa mu Rwanda yabwiye IGIHE ko icumi batambutse mu ijonjora rya mbere bazatoranywamo batatu bazajya guhatana muri Kenya bakaba mu nzu imwe muri Werurwe kugeza muri Gicurasi uyu mwaka.

Iri rushanwa rizamara amezi atatu riba rizitabirwa n’abatoranyijwe bemeye kudahisha na kimwe mu buzima bwabo muri icyo gihe, bazaturuka mu bihugu byo mu Karere birimo u Rwanda, Tanzania, Uganda na Kenya.

Ijonjora rya mbere ryitabiriwe n'abanyamideli batandukanye i Kigali
Jay D uherutse gutorerwa kuba Rudasumbwa wa Afurika ni umwe mu batambutse mu ijonjora ry'ibanze
Umuyobozi mu bategura Godfather East Africa mu Rwanda, Sir Allan, avuga ko ifitanye isano na Big Brother Africa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza