Abazagaragara muri Rwanda Modesty Fashion Show bahawe amahugurwa

Yanditswe na Uwiduhaye Theos
Kuya 29 Ugushyingo 2019 saa 04:11
Yasuwe :
0 0

Ubuyobozi bwa Rwanda Modesty Fashion Show bwateguriye amahugurwa y’umunsi umwe, abamurika imideri bazifashishwa ku nshuro ya kane y’ibi birori bibura iminsi mike ngo bibe.

Igitaramo cy’ibi birori giteganyijwe kuba tariki ya 7 Ukuboza 2019 mu Kiyovu kuri Scheba Hotel guhera saa kumi n’ebyiri z’umugoroba.

Umuyobozi mukuru Abdul Wahabi yavuze ko aya mahugurwa yateguwe mu rwego rwo gufasha abamurika imideri kuzamura impano yabo, ku buryo mu gihe kizaza bazanabasha kwihangira imideri cyane ko ari bo bamenya imyambaro igezweho bityo bikazabafasha kumenya uburyo batangira kubishyira mu ngiro ndetse bakanabasha kuzamura ubushobozi bwabo bw’amafaranga.

Ati “Twatekereje iki gikorwa mu rwego rwo kuzamura ubumenyi bw’abamurika imideri mu Rwanda by’umwihariko dushaka no kugira ngo mu minsi iri imbere bibe byatuma amafaranga binjizaga yiyongera.”

Ubuyobozi bwa Rwanda Modesty Fashion Show muri aya mahugurwa bwabifashijemo na koperative ibarizwa i Remera mu Karere ka Gasabo yitwa “Ineza” ibarizwamo ababyeyi 25 bakora ibijyanye n’imyambaro, ibikapu by’ubwoko butandukanye n’imitako.

Abanyamideli 10 baherutse gutoranywa kuzitabira ibi birori; barimo Kagame Francis, Uwase Aisha, Benineza Claudien, Umutesi Melissa, Biteko Léon, Masabo Anaise, Nkubito Larson, Binego fatuma, Uwimana Joseph na Niragire Divine.

Aba baje biyongera ku bandi 10 basanzwe bakorana na Berwa Platinum isanzwe itegura ibi birori bimaze gushinga imizi mu bakunda abambara bikwije.

Igikorwa nyir’izina kizaba ku wa 7 Ukuboza 2019, muri Scheba Hotel mu Kiyovu. Kwinjira bizaba ari 3 000 Frw ku bazagura amatike mbere. Ubundi azaba ari 5 000 Frw ahasanzwe, 10 000 Frw mu myanya y’icyubahiro ndetse na 100 000 Frw ku meza y’abantu umunani.

Ku wa 5 Ukuboza 2019 hateganyijwe ikiganiro gifunguye kuri buri wese ku bijyanye n’uruhare rw’abamurika imideri ku muco Nyarwanda, hazaba hatumiwe inzego za leta zifite umuco mu nshingano.

Ibyishimo byari byose ku banyamideli muri aya mahugurwa
Kwikwiza mu myambaro ntibihagije gusa ahubwo Rwanda Modesty ishaka ko abantu bikwiza no mu mifuka
Ababyeyi bibumbiye muri koperative yitwa Ineza nibo bafashije aba banyamideli baberekera uburyo imyambaro ikorwamo
Abanyamideli bari kwerekerwa uburyo bashobora kwihangira imyambaro mu buryo bworoshye
Aya mahugurwa yari afite intego yo gufasha abanyamideli kwiyungura ubumenyi mu kudoda imyenda
Umuyobozi mukuru Abdul Wahabi yavuze ko aya mahugurwa yateguwe mu rwego rwo gufasha abanyamideli kuzamura impano yabo ku buryo banabasha kwihangira imideli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza