Abagera kuri 500 bitabiriye amarushanwa yo kwinjira mu Itorero ry’Igihugu Urukerereza

Yanditswe na Nsengiyumva Emmy
Kuya 29 Ukwakira 2019 saa 07:15
Yasuwe :
0 0

Ababyinnyi beza kurusha abandi baturutse mu matorero yose yo mu Rwanda bitabiriye amarushanwa yo gutoranya abagera ku 100 bazinjizwa mu Itorero ry’Igihugu “Urukerereza”.

Urukerereza ni Itorero ry’Igihugu rihuriwemo n’abahiga abandi mu kugira impano yo kubyina Kinyarwanda. Aba bakunze guhagararira igihugu ahantu hatandukanye ndetse bakanatarama mu birori bikomeye.

Amarushanwa yo gushakisha abazinjizwa mu Itorero ry’Igihugu Urukerereza yabaga iminsi ibiri muri buri ntara y’u Rwanda, yatangiriye mu Karere ka Musanze mu Ntara y’Amajyaruguru tariki 16-17 Ukwakira 2019, hahatana ababyinnyi 70.

Ku wa 18-19 Ukwakira 2019 hari hatahiwe abari mu Ntara y’Uburengerazuba mu Karere ka Karongi naho hahatana 70.

Iki gikorwa cyo gushaka abanyempano mu kwigaragaza bya Kinyarwanda cyakomeje hatoranywa abahiga abandi mu Ntara y’Amajyepfo kibera mu Karere ka Nyanza tariki 20-21 Ukwakira 2019 ahahatananiye 60.

Mu Ntara y’Iburasirazuba tariki 22-23 Ukwakira 2019, amarushanwa yabereye i Rwamagana hitabira ababyinnyi 78.

Aya marushanwa yazengurukaga igihugu cyose yageze no mu Mujyi wa Kigali kuva tariki 24-25 Ukwakira 2019, aha hakaba haritabiriye 194.

Ibi bisobanuye ko mu gihugu hose ababyinnyi 472 aribo bitabiriye irushanwa ryo kwinjira mu Itorero ry’Igihugu Urukerereza, bagomba gukurwamo abagera ku 100.

Umuhango wo gusoza aya marushanwa uteganyijwe ku wa 2-4 Ugushyingo 2019 aho uzabera muri Petit Stade i Remera.

Intore Masamba, Umutoza w’Itorero Ndangamuco ry’Igihugu "Urukerereza" yabwiye IGIHE ko iki ari igikorwa kiba rimwe mu myaka ibiri.

Yavuze ko ababyinnyi bari basanzwe mu Itorero Urukerereza nabo bari bemerewe kongera guhatana utsinze agahabwa amahirwe yo kurigarukamo.

Yagize ati ”Mu gihugu hose aho twagiye twabonye abafite impano nyinshi, byari bigoye kubatoranya, ubu twatangiye gutegura finale iteganyijwe mu minsi iri imbere kandi twizeye kubona abayinnyi beza mu Itorero ry’Igihugu.”

Ibyiciro bihatanirwamo ni ukubyina, umuhamirizo w’intore n’abiyereka, kuririmba, abakaraza, abazi gucuranga inanga, icyembe, umuduri n’umwirongi.

Abazatsinda amarushanwa ni bo bazahita binjizwa mu Itorero Urukerereza ritozwa na Muyango, Mariya Yohana n’Intore Masamba.

Intore zahatanaga ngo barebemo abakwinjizwa mu Itorero ry'Igihugu Urukerereza
Abakaraza na bo baratoranyijwe kimwe n'ibindi byiciro by'abashakishwagamo abahiga abandi
Abatanga amanota ni abatoza mu Itorero ry'Igihugu Urukerereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza