Abahanzi bari batunzwe no gucuranga mu tubari babaruwe bizezwa inkunga none amaso yaheze mu kirere

Yanditswe na Nsengiyumva Emmy
Kuya 3 Mata 2021 saa 07:19
Yasuwe :
0 0

Abahanzi bari batunzwe no gucuranga mu tubari, hoteli n’ahandi bagiye kumara umwaka babaruwe bizezwa imfashanyo ariko amaso yaheze mu kirere.

Hashize umwaka urengaho iminsi icyorezo cya Covid-19 kigeze mu Rwanda, cyahagaritse ubuzima kuri benshi ariko kigeze ku bakoraga serivisi zo mu tubari ho kibigirizaho nkana.

Kuva iki cyorezo cyagera mu Rwanda hagatangira gushyirwaho ingamba zo kukirinda, utubari bwahise dufungwa.

Bamwe mu bahombeye bikomeye mu ifungwa ry’utubari, ni abanyamuziki bari batunzwe n’akazi ko gususurutsa abasohotse bifuza kuruhura mu mutwe.

Nyuma yo kubona ko aba bahuye n’akaga, Leta y’u Rwanda ifatanyije n’ihuriro ry’abahanzi batangiye gutekereza uko bafashwa.

Muri Gicurasi 2020 hakozwe ibarura ry’abanyamuziki bari batunzwe n’aka kazi mu gihugu hose bizezwa ubufasha.

Muri iri barura ryari rihagarariwe na Danny Vumbi amakuru IGIHE ifite ni uko habonetse abanyamuziki barenga 1000 mu Rwanda hose.

Icyo gihe urutonde rwabo ruriho n’umubare w’amafaranga bakoreraga ku kwezi rwarakozwe rwoherezwa muri Minisiteri y’Umuco n’Urubyiruko.

Icyakora aba bahanzi bahamya ko kuva babarurwa nta bufasha na buke burabageraho.

Umwe mu bacuranga mu itsinda rya His Voice Rwanda yifashishije urukuta rwe rwa Twitter, yagaragaje ko nk’abahanzi bari batunzwe no gucuranga mu tubari atazi impamvu ibarura ryakozwe bizezwa inkunga ntacyo ryatanze.

Ati “Uwitwa Danny Vumbi yabaruye Orchestre zose zikorera mu mujyi wa Kigali, tubwirwa ko habonetse inkunga itugenewe, nabazaga imbogamizi zaba zarateye iyo nkunga kutatugeraho. Murakoze”

Nyuma y’ubu butumwa butagize igisubizo, Intore Tuyisenge uhagarariye ihuriro ry’abahanzi yabwiye Vision Radio mu kiganiro ‘Les hommes d’Affaires’ ko aba bahanzi bakwiye kwihangana.

Ati “Byose byavuye ku buvugizi twari twagerageje kubakorera, Minisiteri icyo gihe yadusabye ko twakora urwo rutonde kandi twararutanze. Muri gahunda nyinshi za Leta turashima ko hari ibyagiye bikorerwa abahanzi, ngira ngo muribuka ko twagenewe miliyoni 300 Frw zo kudufasha nayo yavuye mu buvugizi twari twakoze.”

Uyu mugabo yavuze ko atazi neza uko byagenze ngo inkunga y’aba ntiboneke, ariko ahamya ko nyuma y’ubuvugizi n’ubundi bari bakoze hari iyatanzwe kandi ifatika.

Usibye izi miliyoni 300 Frw, Intore Tuyisenge yavuze ko bateganya gukomeza ubuvugizi kugira ngo n’uwo bitameze neza abe yafashwa.

His Voice Rwanda, itsinda ry'abacuranzi rihuriwemo n'umugore n'umugabo babana bahuje impano
Intore Tuyisenge uhagarariye Ihuriro ry'abahanzi yavuze ko icyo bo bakoze ari ubuvugizi kandi hari icyo bwatanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .