Abahanzi bagera ku 130 bagiye gukorera umuganda udasanzwe i Nyanza

Yanditswe na Munyengabe Murungi Sabin
Kuya 25 Ukwakira 2016 saa 09:34
Yasuwe :
0 0

Abahanzi b’indirimbo bakabakaba 130 bagiye kwerekeza mu Ntara y’Amajyepfo mu Karere ka Nyanza aho bazakorera umuganda udasanzwe kuri uyu wa Gatatu tariki ya 26 Ukwakira 2016.

Uyu muganda udasanzwe wateguwe n’Urugaga rw’abahanzi [Rwandan Music Federation] ukazabera mu Murenge wa Mukingo nk’uko Intore Tuyisenge uyobora iri huriro yabitangarije IGIHE.

Yavuze ko umuganda nurangira hazakurikiraho igikorwa gikomeye cyo kuganira n’abaturage batuye Akarere ka Nyanza kuri gahunda ya ‘Ndi Umunyarwanda’ no kubibutsa uburyo amacakubiri yoretse igihugu muri Jenoside yakorewe Abatutsi.

Tuyisenge yavuze ko Urugaga rw’abahanzi rwateguye iki gikorwa nyuma y’uko Ubushakashatsi bwa Komisiyo y’Igihugu y’Ubumwe n’Ubwiyunge bwerekanye ko 32.8% by’abatuye Akarere ka Nyanza babona Jenoside ishobora kongera kuba mu Rwanda, aka karere kakaza imbere mu Ntara y’Amajyepfo mu bemeza ko hakiri Abanyarwanda bibona mu ndorerwamo z’amoko ku ijanisha rya 67.1%.

Yagize ati “Ntabwo ari igikorwa cyateguwe na Tuyisenge cyangwa undi muhanzi runaka, ni icyacu nk’urugaga rw’abahanzi. Iki gikorwa twagiteguye ndetse duhera mu Karere ka Nyanza kuko ari ho twasanze hari umubare munini w’abagifite ingengabitekerezo ya Jenoside nk’uko icyegeranyo cya Komisiyo y’Igihugu y’Ubumwe n’Ubwiyunge cyabigaragaje.”

Yongeraho ati “Ni ibintu byinshi bitari ku murongo mu rwego rw’ubwiyunge mu Karere ka Nyanza, twumvise ko hari n’abantu bakoze igikorwa kigayitse cyo gutwika indabyo ziri ku rwibutso rw’inzirakarengane zazize Jenoside. Nk’abahanzi kandi bavuga rikumvikana, twasanze byaba byiza kuhakorera igikorwa nk’iki tukaganiriza abaturage bakagira imyumvire myiza.”

Intore Tuyisenge uyobora urugaga rw'abahanzi

Abahanzi bazahaguruka i Kigali mu museso wo kuri uyu wa Gatatu tariki ya 26 Ukwakira 2016, nibagera i Nyanza bazahita bakora umuganda uzasozwa n’ibiganiro abahanzi bazatanga ndetse n’ubutumwa bwo mu ndirimbo bakangurira abaturage kugira imyumvire mizima.

Tuyisenge yavuze ko nyuma ya Nyanza bazerekeza no mu tundi turere turimo ibi bibazo ndetse ngo kuwa 16 Ukuboza 2016 bateguye igikorwa cyo kumurika ku mugaragaro Urugaga rw’abahanzi no gusobanura birambuye intego bafite.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza