Abafana babiri bishwe bavuye mu gitaramo cya Kidum

Yanditswe na Munyengabe Murungi Sabin
Kuya 6 Nzeri 2016 saa 11:06
Yasuwe : XX
0

Abagabo babiri bishwe bavuye mu gitaramo gikomeye Nimbona Jean Pierre [Kidum Kibido Kibuganizo] yakoreye kuri Lacoste Beach mu Mujyi wa Bujumbura mu ijoro ryo ku Cyumweru tariki ya 4 Nzeri 2016.

Ikinyamakuru Iwacu cyo mu Burundi cyatangaje ko abagabo babiri bishwe barashwe barimo umucungamari w’Ibitaro bya Mpanda witwa Amédé Niyorugira n’umucuruzi witwa Innocent Busoni.

Aba bombi bishwe barashwe ahagana saa tatu z’ijoro ubwo bari kuri moto bataha mu gace ka Nyamabere mu Ntara ya Bubanza nk’uko byemejwe n’Umuvugizi wa Polisi y’u Burundi Pierre Nkurikiye.
Yavuze ko aba bafana bombi barashwe n’abantu bitwaje imbunda bari mu modoka. Yemeje ko Polisi yahise itabara byihuse ariko isanga abo bicanyi bamaze kugenda.

Pierre Nkurikiye ati “Abishwe bari bavuye mu gitaramo cy’umuhanzi w’Umurundi uba muri Kenya, azwi nka Kidum […] Ubwo bari mu nzira bataha bakurikiwe n’aba bicanyi babarashishije masotela[pistolet]”

Yanavuze ko mu ijoro ryo kuwa 31 Kanama 2016 hari undi mumotari wishwe arashwe n’umugenzi yari atwaye. Polisi ikeka ko uyu mwicanyi yiyambitse uruhu rw’umugenzi mu kuyobya uburari ashakisha uko yivugana uyu mumotari.

Inkuru zimaze gutangazwa ko aba bantu bishwe bari bavuye mu gitaramo cya Kidum, uyu muhanzi yabihakanye yivuye inyuma ndetse avuga ko aya makuru ari gukwirakwizwa n’abantu bashaka gukura abantu umutima no kumvisha Abarundi bari hanze y’igihugu ko iwabo ibintu byadogereye kandi ari ibinyoma.

Kidum yanditse kuri Facebook ubutumwa bw’inkurikirane yikomye cyane Bob Rugurika, Umuyobozi wa Radiyo RPA (Radio Publique Africaine), yavuze ko atifuza ko uyu muhanzi ahuza Abarundi. Uyu Bob Rugurika yafunzwe muri Mutarama 2015, icyo gihe yari akurikiranyweho ubwicanyi bwakorewe abihayimana batatu b’Abataliyanikazi.

Yagize ati “Amakuru ni aya ! Bob Rugurika ari kubeshya ko abapfuye bishwe bavuye muri concert yanjye. Sibyo ! Bantu muri hanze y’igihugu murebe neza amakuru bababwira ni agamije kubabeshya gusa no kubashyira mu gihirahiro.”

“ Ndakomeza kubabwira ukuri kuko ni we wanshotoye. Ahubwo aba bantu na bo bishwe nande ? Mu kanya ndaza gukomeza…”

Yongeye guhakana ko nta shyaka rya Politiki arimo ndetse ko atari ku ruhande rw’abavugira u Burundi ahubwo ko icyo yifuza ari amahoro mu bihugu biri muri aka karere.

Yagize ati “…Nta shyaka rya politiki na rimwe ndimo nta n’iryo nkeneye , nta n’ibyo nshoboye. Aha ndagusubije mfite akababaro kenshi. Nta nubwo narangije amashuri kubera izi ntambara nyine zanyu mwebwe Abarundi zabaye muri 1993.”

Yongeyeho ko abamwibeshyaho bamushinja gukorera mu kwaha kwa Leta bamuziza ubusa kuko na we afite abavandimwe bafungiwe muri Gereza ya Mpimba bashinjwa kurwanya ubutegetsi bwa Perezida Nkurunziza.

Ati “ Si ndi muri opposition kandi sindi uwa leta, nshaka gusa amahoro ko agaruka hose muri aka karere. Ntimunzize ubusa. Mbese mwari muzi ko mfite barumuna banjye babiri bafungiwe muri Gereza ya Mpimba kuko bagiye mu myigaragambyo y’abarwanyaga manda ya Nkurunziza benshi murwanya? Inzira yonyine ni amahoro kuri twese mu Burundi…”

Kidum yasubiye gukorera ibitaramo i Burundi nyuma y’uko hari hashize imyaka ibiri atahakandagiza ikirenge. Yagiyeyo atumiwe na Ambasaderi wa Kenya mu Burundi, gusa mbere yo kujya i Bujumbura yari yandikiwe ubutumwa bwinshi amenyeshwa ko azicwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza