Abacikanywe no kwiyandikisha muri Miss Rwanda 2021 bahawe andi mahirwe

Yanditswe na Nsengiyumva Emmy
Kuya 11 Gashyantare 2021 saa 10:48
Yasuwe :
0 0

Ubuyobozi bwa Rwanda Inspiration Backup [RIB] itegura Miss Rwanda bwafashe icyemezo cyo kongera amasaha yo kwiyandikisha nyuma y’ubusabe bw’abakobwa batari bake bagiye bagaragaza ko bacikanywe bagafatwa n’amatariki yo kwiyandikisha.

Iki cyemezo nyuma yuko kwiyandikisha muri iri rushanwa byari byarangiye ku wa 8 Gashyantare 2021 saa Sita z’ijoro.

Kuri uyu wa 11 Gashyantare 2021, RIB yongeyeho amasaha 24 yo kwiyandikisha. Bivuze ko kwiyandikisha bwa nyuma bizarangira 12 Gashyantare 2021 saa Sita z’ijoro.

Buri wese uziyandikisha muri aya masaha y’inyongera, azajya ahita ahabwa ibibazo asabwe gufata amashusho vuba ndetse anayatange.

Abakobwa baziyandikisha muri aya masaha y’inyongera bazaba biyongera ku barenga 400 basanzwe bariyandikishije muri iri rushanwa.

Abategura iri rushanwa bashyize hanze ingengabihe ijyanye n’uko rizaba riteye aho ku wa 13 kugeza ku wa 19 Gashyantare hazaba amajonjora y’ibanze, mu bikorwa bizajya binyuzwa kuri Televiziyo y’u Rwanda.

Aya azakurikirwa n’uko ku wa Gashyantare hazatangazwa abazahagararira intara zabo muri iri rushanwa. Ibi nabyo bikazanyuzwa imbonankubone kuri Televiziyo y’u Rwanda.

Guhera ku wa 22 Gashyantare kugeza ku wa 6 Werurwe 2021, hazaba itora rizakorerwa kuri IGIHE ndetse no kuri SMS.

Ku wa 3 Werurwe abakobwa bose bazaba bari muri iri rushanwa ndetse n’abandi bafite aho bahuriye naryo bazapimwa Coronavirus ndetse bashyirwe mu muhezo, uzabera i Nyamata kuri La Palisse Hotel.

Ku wa 6 Werurwe hazaba gutoranya abakobwa bazajya mu mwiherero, bikazanyuzwa kuri Televiziyo y’u Rwanda biri kuba no kuri shene ya Youtube ya Miss Rwanda.

Kuva ku wa 7 kugeza ku wa 20 Werurwe 2021, hazabaho umwiherero uzabera kuri La Palisse Nyamata nk’uko bisanzwe mu gihe ku wa 20 Werurwe hazabaho gutoranya Miss Rwanda mu 2021, mu birori bizabera kuri Kigali Arena bizanyuzwa kuri Televiziyo y’u Rwanda imbonankubone ndetse kuri shene ya YouTube ya Miss Rwanda.

Ibyagenderwagaho mu guhitamo abakobwa bahataniye Miss Rwanda birimo uburebure, ubu muri uyu mwaka byakuweho ndetse buri wese yahawe ikaze muri iri rushanwa rikunze kuvugisha benshi mu gihugu hose.

Umukobwa uzahabwa ikamba rya Miss Rwanda 2021, azasinyishwa amasezerano yo gukorera Miss Rwanda Organization nk’umukozi mu gihe cy’umwaka.

Bitandukanye n’indi myaka abakobwa bose bazambikwa ikamba n’abandi bazagera mu cyiciro cya nyuma hari ibyo bagenewe ku buryo nta gutaha imbokoboko kuri bo.

Uzegukana iri kamba azahabwa imodoka nshya ya Hyundai Creta izatangwa na Hyundai Rwanda. Azajya ahembwa ibihumbi 800 Frw ku kwezi azatangwa na Miss Rwanda Organization. Ni ukuvuga ko mu mwaka azamarana ikamba azahabwa 9 600 000 Frw.

Azahabwa buruse yo kwiga muri Kaminuza ya Kigali, umushinga we uzaterwa inkunga na Africa Improved Food, ahabwe lisansi umwaka wose izatangwa na Merez Petroleum na internet y’umwaka wose azahabwa na TruConnect Rwanda.

Azajya kandi atunganywa umusatsi mu gihe cy’umwaka bizakorwa na Keza Salon, yemerewe kuba mu mpera z’icyumweru we n’umuryango batemberera muri Golden Tulip La Palisse i Nyamata mu gihe cy’umwaka wose, yemerewe kurya mu gihe cy’umwaka wose muri Cafe Camellia ndetse azahabwa telefoni igezweho na MTN Rwanda.

Abakobwa bari bacikanwe no kwiyandikisha mu bahataniye ikamba rya Nyampinga w'u Rwanda 2021 bahawe andi mahirwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .