2Face aje mu Rwanda afite ku mutima Urban Boyz

Yanditswe na Munyengabe Murungi Sabin
Kuya 19 Nzeri 2016 saa 10:54
Yasuwe : XX
0

Umuhanzi ukomeye muri Nigeria, 2Face Idibia ategerejwe mu gitaramo gikomeye mu Mujyi wa Kigali kuwa 23 Nzeri 2016, hari hashize imyaka igera ku icumi atagera mu Rwanda.

Yakunzwe bikomeye mu myaka yashize mu ndirimbo ‘African Queen’, ‘No Shaking’, ‘Implication’ n’izindi. 2Face w’imyaka 40 yemeje ko agiye kuza mu Mujyi wa Kigali aho azakorera igitaramo ku itariki ya 23 Nzeri 2016.

Yasabye abamutumiye mu gitaramo mu Rwanda ko ‘mu bahanzi azaririmbana na bo Urban Boyz idakwiye kuburamo’ nk’uko Belinda Murerwa uyobora Kigali Entertainment Promoters yateguye iki gitaramo yabitangaje.

Mu kiganiro na IGIHE, Umuyobozi wa Kigali Entertainment Promoters yavuze ko mbere yo kwemeza ko azaza kuririmbira i Kigali 2Face yasabye urutonde rw’abahanzi bo Rwanda azafatanya na bo ndetse asaba ko mu bazatumirwa Urban Boyz igomba gushyirwa ku mwanya wa mbere.

Ati “Mbere yo kuza yatwandikiye adusaba ko mu bazaririmba yifuzamo Urban Boyz, yavuze ko aba bahanzi bagomba kubonekamo, ntabwo nzi impamvu , wasanga ari bo azi cyane mu Rwanda kuko bakoranye indirimbo n’abahanzi bo muri Nigeria.”

Igitaramo cya 2Face i Kigali kizaba kuwa Gatanu tariki ya 23 Nzeri 2016, azaririmbana afatanyije na Urban Boyz ndetse na Tom Close.

Uyu muhanzi ngo yavuze ko yifuza cyane kuza kureba aho u Rwanda rugeze rutera imbere kuko nyuma y’imyaka myinshi ishize ahavuye yabonaga mu binyamakuru bavuga ko iki gihugu kiri kuvuduka cyane mu iterambere.

Yagize ati “Nagiye muri Nigeria ndakeka hashize amezi abiri, nahuye na kompanyi iteza imbere abahanzi iwabo twemeranyije ko tuzajya dufatanya mu bihugu byombi, bifuje ko mbere twahera kuri 2Face akaza mu Rwanda, na we arabishaka cyane, ubwo mperuka kuganira na we yambwiye ko abishaka.”

Yongeraho ati “Yambwiye ko hashize imyaka myinshi atahagera, yifuza kuza kureba aho igihugu kigeza mu iterambere, arabyifuza cyane…”

Mbere yo gukora igitaramo 2Face azabanza abonane n'abahanzi bo mu Rwanda

Umuhanzi 2Face ni muntu ki?

Innocent Ujah Idibia[usigaye wiyita Tu Baba] azagera mu Rwanda kuwa Kane tariki ya 22 Nzeri 2016, azaba aherekejwe n’itsinda ry’abantu 20 barimo ababyinnyi, abacuranzi, abajyanama, inshuti n’abashinzwe guteza imbere umuziki we.

Mbere y’uko aririmbira muri Serena Hotel, 2Face azasangira n’abahanzi nyarwanda bifuza kugirana ubufatanye na we n’abandi bose bamwifuzaho ubufasha mu muziki.

Belinda ati “Ni umugoroba wo gusangira nateguye, mbere y’uko aririmba azahura n’abahanzi babyifuza, ba bandi baba bashaka gukorana na we bazamubona […] Ikintu namubonyeho, yicisha bugufi yabonana n’umuntu wese.”

Tu Baba yaherukaga mu Rwanda mu myaka irenga icumi ishize. Yahaherukaga yitwa 2Face ariko ubu afite izina rishya rya Tu Baba.

2Face yavutse mu 1975, ahitwa Jos muri Leta ya Plateau muri Nigeria), benshi bamumenye nka 2face Idibia. Ni umuhanzi, umwanditsi w’indirimbo akaba na Producer. Ni umwe mu bahanzi bafite ibihembo byinshi muri Nigeria.

Yegukanye igihembo cya MTV Europe Music Award, icya World Music Award, bitanu bya Headies Awards (Hip-hop award), bine bya Channel O Music Video Awards , kimwe cya BET award , bine bya MTV Africa Music Awards, kimwe muri MOBO award, KORA award imwe n’ibindi byinshi bitari ku rwego mpuzamahanga.

2Face azagera mu Rwanda kuwa Kane

African Queen, indirimbo yatumye 2Face yamamara cyane

2Face aherutse gukorana indirimbo na Sauti Sol


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza