Spread Love Festival: Tonzi yasabiye abafata abafite ubumuga ku ngufu ibihano bikakaye (Video)

Yanditswe na Nsengiyumva Emmy
Kuya 2 Ukuboza 2019 saa 10:54
Yasuwe :
0 0

Umuhanzikazi Uwitonze Clementine wamamaye mu muziki wo kuramya Imana nka Tonzi yahurije abana bafite ubumuga n’impano zinyuranye agamije gusangira nabo n’imiryango yabo mu birori ngarukamwaka byiswe "Spread Love Festival.’

Iki gikorwa cyabereye muri Ubumwe Grande Hotel ku mugoroba wo ku Cyumweru tariki 1 Ukuboza 2019. Cyahuje abana bafite ubumuga 200 n’abo mu miryango yabo.

Muri iki gitaramo Tonzi yaririmbiye aba bana n’imiryango yabo ndetse na bo berekana impano zabo zirimo izo kuririmba, kuvuga imivugo n’ibindi.

Mu kiganiro na IGIHE, Tonzi yavuze ko yishimiye uko iki gikorwa cyagenze ndetse yanyuzwe n’uburyo abana bacyakiriye.

Yakomeje agira ati “Iki ni igitaramo ngarukamwaka dutegura mu rwego rwo kuramya Imana no kugaragaza impano zinyuranye abana bafite ubumuga baba bafite.”

Yavuze ko iki gikorwa gifasha abana bafite ubumuga kwiyakira ndetse n’imiryango yabo ikabona ko bafite ibyo bashoboye ku buryo badakwiye gukingiranwa mu nzu.

Mu kiganiro n’abanyamakuru, Tonzi yakomoje ku kibazo cy’abantu bahohotera abana bafite ubumuga, aho yatanze urugero rw’umwana afasha wafashwe ku ngufu n’umusore wagombaga kumwigisha gukora imisatsi.

Ati “Hari umukobwa twigishije gukora imisatsi ariko umusore wakoraga muri iyo salon yamufashe ku ngufu (…). Ku bafite ubumuga twifuza ko hajyaho igihano gikomeye kugira ngo hakumirwe ibi byaha. Turifuza ko hatabaho kugira impuhwe ukundi.”

Muri Spread Love Festival, Tonzi yatangije ikigega cyo gufasha abana bafite ubumuga mu buryo bwo kwiga. Abifuza kukigiramo uruhare bashobora gusanga amakuru y’imikorere yacyo ku rubuga www.birashoboka.org cyangwa se ku mbuga nkoranyambaga aho bashobora kugitera ingabo mu bitugu.

Reba uko Tonzi yataramiye abana bafite ubumuga afasha n’ababyeyi babo

Reba uko abana bafite ubumuga bagaragaje impano zabo imbere y’ababyeyi babo

Tonzi yasabiye abafata abana bafite ubumuga ku ngufu gukanirwa urubakwiye

Umuhanzi Tonzi aganira n'abana bafite ubumuga mu gikorwa bagaragarijemo impano bafite
Abana bafite ubumuga bafashwa na Tonzi bari bishimye mu gikorwa “Spread Love Festival”

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza