Abakobwa 15 batoranyirijwe guhagararira Uburasirazuba muri Miss Rwanda 2020 (Amafoto na Video)

Yanditswe na Ishimwe Israel, Nsengiyumva Emmy
Kuya 11 Mutarama 2020 saa 01:30
Yasuwe :
0 0

Bitandukanye n’izindi ntara, ijonjora ry’ibanze ryo guhitamo abakobwa bahiga abandi mu bwiza, ubumenyi n’umuco muri Miss Rwanda 2020, mu Burasirazuba hatoranyijwe 15 biganjemo abaserukanye imishinga mishya mu matwi y’abagize Akanama Nkemurampaka.

Irushanwa ryo guhitamo abazahagararira Uburasirazuba muri Nyampinga w’u Rwanda 2020, ryakomereje mu Karere ka Kayonza ahatoranyirijwe abakobwa 15 bazaserukira iyi ntara.

Iki gikorwa cyabereye kuri Silent Hill Hotel iherereye mu Karere ka Kayonza, kuri uyu wa Gatandatu, tariki ya 11 Mutarama 2020.

Irushanwa ry’i Kayonza ntiryari risanzwe! Bitandukanye no mu tundi duce rimaze kunyuramo turimo Rubavu, Musanze na Huye, aho Ikinyarwanda cyimakajwe bidasanzwe nyuma yo kugirwa ururimi rw’ibanze, kuri iyi nshuro abakobwa bagera ku icyenda bakoresheje Icyongereza nk’amahitamo yabo.

Benshi muri bo bishimiwe banasabwa kunoza imishinga yabo mu Cyongereza kugira ngo n’abatumva Ikinyarwanda bayisobanukirwe neza.

Ku bijyanye n’imishinga na yo abakobwa benshi baserutse bafite ibitekerezo bishya. Mu majonjora yahise wasangaga abenshi bibanda ku mishinga itatu y’ingenzi, irimo kurwanya ibiyobyabwenge n’inda zitateganyijwe no gufasha abana bo ku muhanda.

I Kayonza hagaragaye imishinga irimo uwo guteza imbere abarimu no kuzamura imibereho yabo, guteza imbere imivugire y’Icyongereza n’iyindi.

Kayonza ni ahantu ha gatatu hatoranyirijwe abakobwa bazavamo uwambikwa ikamba rifitwe na Nimwiza Meghan wegukanye irya 2019.

Ku ikubitiro irushanwa ryatangiriye mu Karere ka Rubavu ku wa 21 Ukuboza 2019 ahavuye abakobwa batandatu; i Musanze ryahageze ku wa 28 Ukuboza 2019 hatoranywa batandatu mu gihe ijonjora riheruka ryabereye I Huye ku wa 4 Mutarama 2020, ryasize abakobwa barindwi aribo bemerewe gukomeza.

Intara y’Uburasirazuba ifite umwihariko muri Miss Rwanda kuko ni yo yatanze Nyampinga w’u Rwanda wa 2014, Akiwacu Colombe.

Abakobwa bashaka ikamba bageze aho irushanwa ribera hakiri kare, ku maso bari biteguye kunyura imbere y’Akanama Nkemurampaka no gusobanura imishinga bafite yazabambutsa bakagera ku nzozi zabo zo kwambara ikamba.

Nyuma ya Kayonza, irushanwa rizakomereza mu Mujyi wa Kigali ari naho hazasorezwa ijonjora ry’ibanze ku wa 18 Mutarama 2020.

UKO IJONJORA RYA MISS RWANDA 2020 I KAYONZA RYAGENZE :

-  Video: Ubwiza bw’abakobwa bitabiriye Miss Rwanda 2020 i Kayonza

Mwakoze kubana natwe i Kayonza!

20:28: Ijonjora ry’ibanze ryo guhitamo abakobwa bazahagararira Uburasirazuba muri Miss Rwanda 2020 ryaberaga kuri Silent Hill Hotel ryashyizweho akadomo.

Bitandukanye no mu tundi duce irushanwa ryanyuzemo, i Kayonza ni ho havuye abakobwa benshi haba mu bitabiriye ndetse n’abakomeje mu kindi cyiciro.

Tuzasubire ku wa 18 Mutarama 2020 aho irushanwa rizakomereza mu Mujyi wa Kigali.

-  Akanyamuneza ku bakomeje

Nyuma yo gutangazwa kw’abakomeje, abakobwa baganjwe n’amarangamutima bamwe bishimira intambwe bateye, abandi bahumurizwa ko batabashije gukomeza mu kindi cyiciro.

Nyuma yo gutsinda biba ari ibyishimo by'ikirenga
Abakomeje barashimirana, ariko bakanahumuriza abatagize amahirwe yo gukomeza
Mu Burasirazuba hakomeje abakobwa 15, ni ho havuye abakobwa benshi kuva ijonjora rya Miss Rwanda 2020 ryatangira mu mpera za 2019

Amazina na nimero by’abakobwa 15 bakomeje mu kindi cyiciro

1. Numukobwa Dalillah (No 26)

2. Niheza Deborah (No 3)

3. Umutesi Nadege (No 17)

4. Ineza Charlène (No 5)

5. Nikuze Icyeza Aline (No 15)

6. Umwiza Phiona (No 6)

7. Kansime Deborah (No 9)

8. Ingabire Rehema (No 7)

9. Wihogora Phionnah (No 4)

10. Murangamirwa Ange (8)

11. Ingabire Denyse (24)

12. Nyinawumuntu Rwiririza Delice (No 25)

13. Munezero Grace (21)

14. Teta Ndenga Nicole (No 30)

15. Ingabire Diane (28)

Abakobwa 15 nibo bemerewe guhagararira Uburasirazuba muri Miss Rwanda 2020
Umunyamideli Shiny Abdallah washinze inzu izwi nka ‘Mr. Endowed’ iri mu baterankunga b'irushanwa hamwe n'abakobwa bemerewe guhagararira Intara y'Uburasirazuba muri Miss Rwanda 2020
Abakozi bo muri Sosiyete y’Ubucuruzi ya Multi Design Group Ltd itanga serivisi zirimo kugena agaciro k’imitungo, gucunga itimukanwa, gukora no gucunga imishinga bafashe ifoto y'urwibutso n'abakobwa bakomeje

-  Abagize Akanama Nkemurampaka bagarutse mu cyumba cyabereyemo ijonjora

20:07: Nyuma y’iminota 32 abagize Akanama Nkemurampaka biherereye, bagarutse mu byicaro byabo mbere yuko hatangazwa abakobwa bakomeje.

Amazina na nimero byabo byashyikirijwe Umunyamakuru Martina Shami Abera ukora kuri KC2, aba ari we usoma abakomeje.

Uhereye ibumoso: Umurerwa Evelyne, Mike Karangwa na Miss Mutesi Jolly ni bakemurampaka batangiranye na Miss Rwanda 2020

-  Miss Nimwiza Meghan yaganirije abakobwa bahataniye kwambikwa ikamba amaranye umwaka

Nyampinga w’u Rwanda 2019 yari ahabereye ijonjora ry’ibanze ryo guhitamo abakobwa bazahagarararira Intara y’Uburasirazuba muri Miss Rwanda 2020.

Yafashe umwanya aganiriza aba bakobwa ku buryo bakwiye kwitwara mu irushanwa kugira ngo bagere ku ntsinzi.

Uyu mukobwa yahuje urugwiro n’abakobwa bagenzi be, barahoberana.

Miss Nimwiza Meghan (ibumoso) na Iradukunda Elsa wabaye Nyampinga w'u Rwanda mu 2017 bitabiriye iki gikorwa
Miss Nimwiza Meghan aganira n'abakobwa bitabiriye irushanwa rya Nyampinga w'u Rwanda
Miss Nimwiza Meghan yahuje urugwiro n'abakobwa

-  Ubusesenguzi bw’abakurikirana Miss Rwanda 2020 buri munsi

-  ABAGIZE AKANAMA NKEMURAMPAKA BAGIYE KWIHERERA BATERANYE AMANOTA

Nyuma yo kwakira abakobwa bose 30 banyuze imbere yabo, Mike Karangwa, Mutesi Jolly na Umurerwa Evelyne bagiye kwiherera bateranya amanota mbere yo gutangaza abakomeje mu kindi cyiciro.

19:35: Abakobwa bose bari mu cyumba aho bategereje kongera guhamagarwa aho babarijwe bakabwira amazina y’abanyuze Akanama Nkemurampaka bemerewe gukomeza.

Hanze y’aho irushanwa ryabereye hari abantu baherekeje abakobwa, barimo imiryango yabo, inshuti n’abandi babateye ingabo mu bitugu.

19:31: Teta Ndenga Nicole wambaye nimero 30 ni we mukobwa wa nyuma wanyuze imbere y’Akanama Nkemurampaka.

Uyu mukobwa ufite uburebure bwa 1.75m, yize mu Ishami rya HEG mu mashuri yisumbuye.

Umushinga we ni uko buri rugo rwahinga ibiti by’imbuto byafasha mu kwihaza mu biribwa.

Yavuze ko azawushyira mu bikorwa abinyujije mu bufatanye n’Ikigo cy’Igihugu cy’Ubuhinzi n’Ubworozi (RAB), Ihuriro ry’Urubyiruko rwize Ubuhinzi n’Ubworozi (RYAF) n’abandi.

19:26: Keza Yusia wambaye nimero 29 yavuze ko umushinga we uzibanda ku gufasha abana batagira kirengera.

Yavuze ko azajya abageraho binyuze mu matsinda azatangiza mu mashuri, aho umwana wifuza gufasha azajya atanga igiceri kimwe ku buryo ari cyo kizakoreshwa mu gufasha abo bana.

Keza ni Umuyisilamukazi witabiriye iri rushanwa, yaserutse mu mwambaro yitandiye.

Keza mbere yo kunyura imbere y’Akanama Nkemurampaka yabwiye IGIHE ko iyi ari intambwe yateye mu myemerere cyane ko mu 2019 yari yitabiriye Miss Rwanda ariko ntiyakomeza.

Mu 2019 ntabwo Keza yari yitabiriye irushanwa yambaye umwambaro wa kiyisilamu wo kwitwikira isura cyane ko ngo hari imyemerere ye mu idini yari itarakura.

Umwaka ushize uyu mukobwa avuga ko yagize ubwoba yari afite imbere y’akanama nkemurampaka.

Keza yitabiriye Miss Rwanda 2020 yambaye umwambaro wa Islam

-  Video: Keza yitabiriye Miss Rwanda 2020 yambaye umwambaro wa Islam

19:21: Ingabire Diane yavuze ko abaye Nyampinga w’u Rwanda yashishikariza urubyiruko kutishora mu biyobyabwenge.

Ati “Agashya nakoresha ni ukubabwira ibibi byo gukoresha ibiyobyabwenge. Nakoresha ubuhamya bw’abagizweho ingaruka n’ibiyobyabwenge.’’

19:16: Ineza Keila Bernice yaserukanye umushinga ujyanye no guteza imbere ikoranabuhanga binyuze mu kwagura Internet Cyber café.

19:03: Numukobwa Dalillah wiga mu Ishami rya General Nursing muri Kaminuza. Yavuze ko azakoresha neza igihe cye ndetse akajya inama na bagenzi be.

Umushinga yaserukanye ni uwo kwita ku bafite ubumuga. Ati “Nzateza imbere ubuzima bwabo ku bafite ibibazo byo mu mutwe. Kubona inzu nziza bishobora kugira ingaruka ku mibereho yabo. Nzategura imishinga itandukanye irimo imikino, ibitaramo n’ibindi.’’

Yakomeje ati “Nizera ko ahari ubushake, nashaka inkunga yo guhabwa ubufasha.”

19:03: Nyinawumuntu Rwiririza Delice, afite uburebure bwa 1.70m. Yiga mu Ishami rya Hospitality muri Kaminuza.

Yabajijwe ku ruhare rw’umwana w’umukobwa mu ikoranabuhanga, avuga ko kuri ubu abakobwa baritinyutse.

18:58: Ingabire Denyse w’imyaka 18 yavuze ko akunda kandi ashoboye kuba Nyampinga w’u Rwanda.

Ati “Icya mbere ni uguteza imbere umuco Nyarwanda, kuzamura ibikorerwa mu Rwanda no gushishikariza urubyiruko gukorana umurava babijyanisha n’ikoranabuhanga.’’

18:53: Mariza Oliver w’imyaka 23 yasobanuye imvugo igaragaza ko kwigisha umukobwa ari ugutegura igihugu n’ahazaza hacyo.

Ati “Abakobwa na bo barashoboye kandi na bo bakora ibyo basaza babo bakora mu kwiteza imbere.’’

Yavuze ko umushinga we uzibanda cyane ku guhangana n’ibiza byibasira uduce dutandukanye tw’igihugu.

Umushinga we ntiwanyuze abagize Akanama Nkemurampaka.

Mike Karangwa ati “Umuntu wakugiriye inama umubwire ko yagushutse.’’

Ati 'Uwakubwiye kwitabira Miss Rwanda yaragushutse'

18:45: Muhorakeye Jeanne D’Arc yavuze ko umushinga we uzibanda cyane kuri Made in Rwanda, yibanda ku myenda.

Ati “Dufite itsinda ridoda imyenda rya Berwa Design. Kuba Miss Rwanda bizafungura amarembo azatuma abantu benshi barushaho kwambara ibikorerwa mu gihugu.’’

18:34: Munezero Grace wiga mu Ishami ry’Ubukungu n’Ubucuruzi muri Kaminuza yasobanuye ko afite umushinga uzafasha abasoza amasomo kuba bafite ubumenyi mu kuvuga Icyongereza.

Afite umushinga wo guteza imbere imivugire y’Icyongereza. Yatangiye uwo mushinga ndetse hari ibigo bakorana.

Mike Karangwa yahise amusaba ko yasobanura mu Cyongereza.

Yahise asobanura imiterere y’umushinga we, n’abafatanyabikorwa azifashisha muri uwo mushinga.

Abajijwe impamvu amahitamo ye yaganishije ku Cyongereza, aho kuba Igifaransa, Igiswahili n’Ikinyarwanda.

Yasubije ati “Bizoroha cyane kubigeza ahantu henshi. Si ishoramari cyane ahubwo ni ugufasha Abanyarwanda.’’

18:30: Murekatete Anitha w’imyaka 21 yiga mu mwaka wa gatatu mu Ishami rya Accounting muri Kaminuza.

Yavuze ko umushinga we ugamije gusobanurira Abanyarwanda kwiyumvamo ubupfura.

Iki gisobanuro nticyanyuze abagize Akanama Nkemurampaka kuko bose bahurije ku kumwereka “No”.

Miss Mutesi Jolly atanga "No", yaherekesheje ibisobanuro by'icyemezo yafashe

18:26: Karugarama Charline, yavuze kuba Nyampinga w’u Rwanda bizatuma agira ijwi rizamufasha kuvugira abana b’abakobwa batewe inda.

Yavuze ko bitewe n’uko abona abo bana bitabwaho azongera imbaraga mu kubafasha.

18:20: Umugwaneza Cynthia w’imyaka 20 yasoje mu Ishami rya Computer Science mu mashuri yisumbuye mu 2019.

Yavuze ko umushinga we ari ukurwanya ibiza afatanyije na Minisiteri agakangurira abatuye mu manegeka kuhava.

Umushinga we uburyo yawusobanuye ntabwo yemeje abagize Akanama Nkemurampaka.

18:12: Umutesi Nadege w’imyaka 19, yitabiriye Miss Rwanda ku nshuro ya kabiri. Yavuze ko yitabiriye iri rushanwa mu kwerekana ko hari uruhare yagira mu gutanga ibitekerezo bye byubaka umuryango mugari.

Umushinga yitwaje nk’iturufu yatuma ahabwa ikamba, yavuze ko mu 2020 azagerageza kugabanya ubushomeri mu rubyiruko.

Ati “Nakoze isuzuma mbona ko hari urubyiruko rutamenya amakuru neza. Hari abatazi ko Ikigega cy’Ingwate cya BDF gitanga ingwate ku nguzanyo z’imishinga y’iterambere. Nzibanda cyane kuri ba bandi bo mu cyaro.’’

Mike Karangwa yamuhaye inama ko we kimwe na bagenzi be barushaho kugisha inama mbere yo kwitabira irushanwa, haba muri bagenzi babo cyangwa ababarera.

18:05: Kirabo Peace w’imyaka 22 yavuze ko akunda Made in Rwanda.

Ati “Iyo ibicuruzwa byanyu bikorerwa mu Rwanda, bigacuruzwa hanze bigira inyungu nyinshi.’’

Kirabo yiga mu Ishami ry’ibijyanye n’Ubwishingizi (Insurance) muri Kaminuza.

18:00: Umukobwa wa 15 wageze imbere y’Akanama Nkemurampaka ni Nikuze Icyeza Aline. Nikuze w’imyaka 22 yiga ibijyanye n’ubukerarugendo.

Mike Karangwa yamubajije abaye Nyampinga w’u Rwanda icyo yakora mu kuzamura ubukangurambaga bwo kuzamura uko Abanyarwanda bitabira serivisi z’ubukerarugendo.

Ati “Nabakangurira gusura igihugu cyacu, bakareba ibikigize kuko aribyo byabafasha gukururira n’abandi banyamahanga.’’

Umushinga we ni ugufatanya na Leta y’u Rwanda mu guteza imbere “Ikigega Ejo Heza. Natanga umusanzu wanjye binyuze mu bukangurambaga.’’

Ejo Heza ni ubwizigame bw’igihe kirekire buteganyiriza pansiyo bwashyizweho na Leta y’u Rwanda kugira ngo buri Munyarwanda n’umunyamahanga utuye mu gihugu yizigamire ateganyiriza izabukuru kugira ngo azasaze afata pansiyo nkuko bigenda ku banyamushahara bategurirwa amasaziro meza.

Imibare mishya y’Ikigega ‘Ejo Heza’ yerekana ko abanyarwanda barenga ibihumbi 170 bamaze kucyiyandikishamo, muri bo ibihumbi 60 bamaze kwizigamira, aho ubwizigame bumaze kugera mu kigega ari miliyoni zirenga 500 FRW.

Guverinoma y’u Rwanda yihaye intego yo kuzamura urwego rw’ubwizigame bukava ku gipimo cya 10.6% bukagera kuri 23 % mu 2024, Ejo Heza ikaba yariyongereye ku bundi buryo bwo kwizigamira no kwiteganyiriza busanzweho.

17:55: Mukantama Mary na we yabajijwe icyo azi kuri Vision 2020. Yatanze ibisobanuro bitagusha neza ku mirongo migari y’icyo cyerekezo.

Yavuze ko umushinga we ari ukurwanya imirire mibi mu bana.

Ati “Abatuye mu byaro ntibagura indyo zuzuye, ubwo buryo nibwo bwahinduka binyuze mu migoroba y’ababyeyi. Nakora ubukangurambaga, hari ibintu byinshi byataye agaciro, usanga hari aho ibikoresho nk’amabase bimeneka bigatabwa kandi byagakoreshejwe mu gukora uturima tw’igikoni.’’

17:49: Kankunda Rwagitare Faith w’imyaka 19 ni umukobwa wa 13 wakandagiye imbere y’Akanama Nkemurampaka.

Uyu mukobwa ufite uburebure bwa 1.70m, yize mu Ishami ry’Imibare, Ubugenge n’Ubumenyi bw’Isi (MPG) muri Lycée de Kigali.

Yavuze ko yafasha u Rwanda mu rugamba rwo guhangana n’ikibazo cy’inda ziterwa abangavu.

Ati “Binyuze mu mugoroba w’ababyeyi, nafatanya n’abayobozi b’imidugudu n’utugari, twakurikirana ko abana bita ku bana babo ndetse ababitandukiriye bakaba bakurikiranwa.’’

Yifashishije imvugo ya Perezida Kagame ko umugore ari "Don’t touch", ati "Tugomba gukomeza agaciro kacu twasubijwe, tukirinda gutenguha uwakadusubije.’’

17:41: Nyirakimana Vanessa afite imyaka 19. Yasoje mu bijyanye n’Imibare, Ubukungu n’Ubumenyi bw’Isi (MEG), ubu yiga mu Ishami rya Accounting muri Kaminuza ya Kigali.

Uyu mukobwa uvuka mu Karere ka Bugesera, yabajijwe umusanzu azaba atanga.

Ati ‘‘Mu mwaka umwe, icyo nakora ni ugushyira mu bikorwa umushinga wo gufasha urubyiruko kureka ibiyobyabwenge. Nzabinyuza mu bukangurambaga, gutanga ibiganiro binyuze mu mashuri.’’

17:34: Uwase Leah w’imyaka 18, yasoje amashuri yisumbuye mu 2018 aho yize mu Ishami ry’Ubugenge, Ubutabira n’Imibare (PCM).

Yavuze ko ibintu bitatu asanga byamugira Nyampinga w’u Rwanda ari ukwigisha abakobwa ubuzima bw’imyororokere, gukora ibikorwa by’urukundo no gukangurira urubyiruko kwinjira mu bikorwa by’iyobokamana.

Mike Karangwa yamusabye ko yakoresha Icyongereza kuko amubonamo ubushobozi.

Uwase yavuze ko “Mbona iki kibazo gikomeye. Iyo utwise ku myaka mito, hari inshingano ziyongera kandi hakiri kare.’’

Ni we wa mbere mu bakobwa bavuze mu Cyongereza wahawe "No" n’abagize Akanama Nkemurampaka.

17:27: Umubyeyi Claudine uvuka mu Karere ka Gasabo yavuze ko yahisemo kwiyamamariza muri Kayonza kuko yahize kandi hakaba hari ibyiza nyaburanga birimo Pariki y’Igihugu y’Akagera n’Ikiyaga cya Muhazi.

Yavuze ko umushinga we ari uwo kurwanya ibiyobyabwenge afatanyije na Polisi y’u Rwanda, ibigo ngororamuco, no gushyiraho amatsinda mu rubyiruko ashinzwe kurwanya ibiyobyabwenge.

Ati “Umwihariko naba mfite, ikamba narikoresha nshishikariza urubyiruko kureka ibiyobyabwenge babikora bazi ko bashaka kwamamara.’’

17:17: Kansime Deborah w’imyaka 19, yaturutse mu Murenge wa Mukarange mu Karere ka Kayonza.

Yasobanuye ko Kayonza ifite umwihariko wo kugira amashuri meza; hoteli n’ibindi.

Mike Karangwa yamubajije inama yatanga mu kwirinda ikibazo cy’abana basambanywa.

Yahise asaba ko yasubiza mu Cyongereza anaboneraho kubihuza n’umushinga we wo kurwanya ibiyobyabwenge.

17:08: Murangamirwa Ange, yavuze ko umusanzu we mu Cyerekezo 2020 ubumbiye mu mushinga we “Internet Patriotism’’ ushingiye ku gukoresha uburyo bwo guhangana n’abavuga nabi u Rwanda.

Yavuze ko mu byo yabaratira harimo Ikibuga Mpuzamahanga cy’Indege cya Bugesera, ibiyaga, imihanda, ibiyaga n’ibindi.

Yavuze ko yafashe mu mushinga wa ‘Connect Rwanda’ agafasha abaturage kurushaho kugaragaza ubwiza bw’u Rwanda.

Ku wa 20 Ukuboza 2019 nibwo MTN Rwanda yatangije ubukangurambaga bwiswe Connect Rwanda Challenge, aho ibigo n’abantu ku giti cyabo bakomeje kwiyemeza umubare runaka wa telefoni zigezweho bazatanga zigahabwa abadafite ubushobozi bwo kuzigurira hirya no hino mu gihugu.

Muri iyi gahunda igamije kuzamura no kwihutisha ikoreshwa ry’ikoranabuhanga mu Rwanda, abantu batangiye gutanga izi telefoni ndetse umuntu agasaba undi ahisemo kugira icyo yiyemeza, bigakorerwa kuri internet cyane cyane ku mbuga nkoranyambaga.

Uburyo Murangamirwa yasobanuye icyerekezo 2020 ntibyanyuze abagize Akanama Nkemurampaka mu buryo bufatika.

16:59: Ingabire Rehema yabaye umukobwa wa karindwi wageze imbere y’abagize Akanama Nkemurampaka.

Yavuze ko umushinga we “Weforteachers” ugamije gufasha abarimu cyane cyane abo mu mashuri abanza kwiteza imbere.

Ati “Iterambere ryacu barigizemo uruhare. Umunyarwanda wese atanze umusanzu we, nkabikora na we akabikora, byatanga umusaruro.’’

- Uko amanota atangwa

Abakobwa banyura imbere y’Akanama Nkemurampaka basubiza, bahabwa amanota mu buryo butandukanye.

Mu gutanga amanota Ubwiza bwahawe 30%, Ubwenge bukagira 40% mu gihe Umuco ni 30 %.

-  Ibyo wamenya ku bagize Akanama Nkemurampaka

Abanyamakuru Mike Karangwa, Evelyne Umurerwa na Miss Rwanda 2016 Mutesi Jolly bakomezanyije n’ijonjora ryo gushakisha umukobwa uzegukana ikamba rya Nyampinga w’u Rwanda 2020, aribo bagize akanama nkemurampaka.

Aba basimbuye akanama nkemurampaka kazengurutse umwaka ushize mu ijonjora ryanyuze mu ntara zitandukanye z’u Rwanda n’Umujyi wa Kigali. Mutesi Jolly ni we wenyine wakagarutsemo. Uyu mukobwa ategura ibiganiro bizwi nka Inter-Generation. Mu mwaka ushize yahawe igihembo cy’umukobwa ubonwamo icyizere na benshi (Best Female Celebrity Influencer).

Aka kanama nkemurampaka katanze amanota mu majonjora umwaka ushize kari kagizwe n’Umunyamakuru Michelle Iradukunda, Jolly Mutesi wabaye Nyampinga w’u Rwanda mu 2016 na Uwase Marie France.

Umurerwa Evelyne amaze imyaka isaga 20 mu mwuga w’itangazamakuru, ari mu batoye ba Nyampinga muri Kaminuza y’Imari n’Ubukungu (SFB) mu gihe Mike Karangwa na we afite ubunararibonye bw’imyaka 12 mu bijyanye n’amarushanwa y’ubwiza. Ni n’umuyobozi wa Impact Communications itanga serivisi zijyanye n’iby’Itangazamakuru.

Uhereye ibumoso: Miss Mutesi Jolly, Umurerwa Evelyne na Mike Karangwa ni bo bagize Akanama Nkemurampaka
Mutesi Jolly yihariye agahigo ko kuba ariwe wahagarariye u Rwanda bwa mbere muri Miss World
Umurerwa Evelyne winjiye mu kanama nkemurampaka ka Nyampinga w'u Rwanda yari afite akanyamuneza
Mike Karangwa ari mu bafite izina mu irushanwa rya Nyampinga w'u Rwanda

16:51: Umwiza Phiona w’imyaka 18, yasoreje muri King David mu Ishami ry’Imibare, Ubukungu n’Ubumenyi bw’Isi (MEG).

Yavuze ku kurwanya ihohoterwa rikorerwa abana bari munsi y’imyaka 18.

Ati “Nasaba ababyeyi umwanya ku buryo nibura kabiri mu kwezi hajya haboneka umwanya wo kubahumuriza no kubabwira ko hakiri icyizere cy’ubuzima. Nashyiraho amatsinda atandukanye mu bigo by’amashuri azakangurira abakobwa, bakerekwa ko bashoboye kugira ngo birinde ibyo bishuko.’’

Yabaye umukobwa wa kabiri wemeye gusubiza mu Rurimi rw’Icyongereza asobanura umushinga we.

Mike Karangwa yamusabye ko yajya anasubiza mu Cyongereza kuko akivuga neza adategwa.

16:44: Ineza Charlène w’imyaka 19, yasoje amashuri yisumbuye mu 2018 mu Ishami rya Computer Science.

Yavuze ko umushinga we ushingiye ku gutanga umusanzu wo kuganiriza abana, abanyeshuri n’ababyeyi.

Ati “Nzajya nganiriza abana mbereke ko hari icyo bagomba kwiremamo nk’abana. Nzajya nganiriza abagiye kujya muri Kaminuza. Mu bushakashatsi nakoze, nasanze abana bava mu mashuri baragabanutse ariko nanone abasoza bakabura akazi bariyongereye.’’

16:29: Wihogora Phionnah w’imyaka 19 uvuka mu Karere ka Gatsibo. Yasobanuye ko icyamusunikiye gufata icyemezo cyo kwitabira Miss Rwanda 2020, ati “Miss Rwanda nayitekereje kuva kera, maze gukura nasanze ababigezeho hari ibyo bakoze.’’

Yavuze ko ikintu cyatuma nkomeza, ni uko numva ibyo nshaka gukora nabikora neza.

Umushinga we werekeye gusigasira agaciro k’umwana.

Ati “Ni abana babyawe n’abangavu cyangwa ababyawe mu buryo butateganyijwe. Ahantu mbona ikibazo ni ku bana batiga kandi bagomba kwiga. Twakwigisha abana babashe guhaguruka bivugire, natwe tubashe kubafasha.’’

Mike Karangwa yanyuzagamo agaha impanuro abakobwa babaga bamaze gutanga ibisobanuro

16:23: Niheza Deborah w’imyaka 20 yavuze ko yahisemo kwiyamamariza mu Ntara y’Uburasirazuba kuko ariyo avukamo kandi akaba ariyo yumva yatangirizamo umushinga we.

Asobanura umushinga we, yavuze ko “Kubungabunga ibidukikije nibyo nzamfasha. Ndashaka guhera mu kubungabunga harimo Ikiyaga cya Muhazi, Pariki y’Akagera.’’

“Kiri mu bintu bya mbere byinjiza amadevize adufasha kubaka ibikorwaremezo. Abaturage na bo bazajya bagira umwete wo kuhatemberera. Mu gihe wabumvishije icyo bakora bizaba ari ingenzi.’’

Yasabwe gusobanura umushinga we yifashishije Icyongereza, anyura amatwi ya Mutesi Jolly amuha “Yes”.

Mike Karangwa yamusabye kunoza neza umushinga we ku buryo azoroherwa n’ikindi cyiciro.

16:17: Umwali Nice yageze imbere y’Akanama Nkemurampaka asobanura ko natorerwa kuba Nyampinga w’u Rwanda azafatanya n’inzego z’ibanze kurwanya ibiyobyabwenge.

Ati “Ubukene bwo mu mutima nibwo butera urubyiruko kujya mu biyobyabwenge. Nzafatanya n’ababishinzwe kugira ngo tubakangurire kubireka. Nzasaba inzego zibishinzwe ko hashyirwaho akagoroba k’urubyiruko. Nzakorana n’itangazamakuru kugira ngo tubashe kwegerana nabo tubaganirize ku bubi bwabyo.’’

Mike Karangwa yatanze "No" asobanura impamvu yabyo

16:10: Nirere Marthe ni we mukobwa wa mbere wahamagawe imbere y’Akanama Nkemurampaka.

Yatangiye avuga ko ari Nirere wa Hategekimana, arondora ibisekuru bye asoza avuga ko akomoka mu Basinga.

Yasobanuye imiterere y’Intara y’Uburasirazuba, avuga ko hadashyuha cyane kandi hari imisozi itari miremire.

Ati “Ibyo nabonye n’amaso yanjye, intara yacu irimo abantu bize cyane kurusha iy’Uburengerazuba. Ikinyarwanda cyaho gitandukanye n’icyo mu Burengerazuba.’’

-  Amazina y’abakobwa 30 bemerewe guhatana i Kayonza na nimero bahawe

1. Nirere Martha, afite uburebure bwa 1.74m. Yize mu Ishami rya PCB mu mashuri yisumbuye.

2. Umwali Nice, afite uburebure bwa 1.70m. Yize mu Ishami rya Telecommunication mu mashuri yisumbuye.

3. Niheza Deborah, afite uburebure bwa 1.71m. Yize mu Ishami rya HEG mu mashuri yisumbuye.

4. Wihogora Phionnah, afite uburebure bwa 1.70m. Yize mu Ishami rya MEG mu mashuri yisumbuye.

5. Ineza Charlène, afite uburebure bwa 1.76m. Yize mu Ishami rya MComputer Science mu mashuri yisumbuye.

6. Umwiza Phiona, afite uburebure bwa 1.72m. Yize mu Ishami rya MEG mu mashuri yisumbuye.

7. Ingabire Rehema, afite uburebure bwa 1.72m. Yize mu Ishami rya Education mu mashuri yisumbuye.

8. Murangamirwa Ange, afite uburebure bwa 1.81m. Yize mu Ishami rya HEG mu mashuri yisumbuye.

9. Kansime Deborah, afite uburebure bwa 1.71m. Yize mu Ishami rya MCB mu mashuri yisumbuye.

10. Umubyeyi Claudine, afite uburebure bwa 1.70m. Yize mu Ishami rya Construction mu mashuri yisumbuye.

11. Uwase Leah, afite uburebure bwa 1.70m. Yize mu Ishami rya PCM mu mashuri yisumbuye.

12. Nyirakimana Vanessa, afite uburebure bwa 1.70m. Yiga mu Ishami rya Accounting muri Kaminuza.

13. Kankunda Rwagitare Faith, afite uburebure bwa 1.70m. Yize mu Ishami rya MPG mu mashuri yisumbuye.

14. Mukantama Mary, afite uburebure bwa 1.73m. Yize mu Ishami rya MCE mu mashuri yisumbuye.

15. Nikuze Icyeza Aline, afite uburebure bwa 1.70m. Yize mu Ishami rya Food & Beverage Services mu mashuri yisumbuye.

16. Kirabo Peace, afite uburebure bwa 1.73m. Yiga mu Ishami rya Insurance muri Kaminuza.

17. Umutesi Nadege, afite uburebure bwa 1.74m. Yize mu Ishami rya Computer Science mu mashuri yisumbuye.

18. Umugwaneza Cynthia, afite uburebure bwa 1.70m. Yize mu Ishami rya Computer Science mu mashuri yisumbuye.

19. Karugarama Charline, afite uburebure bwa 1.70m. Yize mu Ishami rya MEG mu mashuri yisumbuye.

20. Murekatete Anitha, afite uburebure bwa 1.70m. Yiga mu Ishami rya Accounting muri Kaminuza.

21. Munezero Grace, afite uburebure bwa 1.70m. Yiga mu Ishami rya Economy & Business Studies muri Kaminuza

22. Muhorakeye Jeanne D’Arc, afite uburebure bwa 1.70m. Yize mu Ishami rya MEG mu mashuri yisumbuye.

23. Mariza Oliver, afite uburebure bwa 1.72m. Yiga mu Ishami rya Accounting muri Kaminuza.

24. Ingabire Denyse, afite uburebure bwa 1.79m. Yize mu Ishami rya MEG mu mashuri yisumbuye.

25. Nyinawumuntu Rwiririza Delice, afite uburebure bwa 1.70m. Yiga mu Ishami rya Hospitality muri Kaminuza.

26. Numukobwa Dalillah, afite uburebure bwa 1.70m. Yiga mu Ishami rya General Nursing muri Kaminuza.

27. Ineza Keila Bernice, afite uburebure bwa 1.70m. Yize mu Ishami rya MCB mu mashuri yisumbuye.

28. Ingabire Diane, afite uburebure bwa 1.70m. Yize mu Ishami rya HEG mu mashuri yisumbuye.

29. Keza Yusia, afite uburebure bwa 1.71m. Yiga mu Ishami rya IT muri Kaminuza.

30. Teta Ndenga Nicole, afite uburebure bwa 1.75m. Yize mu Ishami rya HEG mu mashuri yisumbuye.

-  Abakobwa biyamamarije i Kayonza bari bifitiye icyizere

16:02: Abagize Akanama Nkemurampaka bageze mu cyumba cyabereyemo ijonjora ry’abakobwa bazaserukira Uburasirazuba muri Miss Rwanda 2020.

Nkuko bisanzwe, abakemurampaka baracyari Umurerwa Evelyne umaze imyaka isaga 20 mu itangazamakuru, Mike Karangwa ufite uburambe bw’imyaka 12 mu bijyanye n’amarushanwa y’ubwiza na Miss Mutesi Jolly wabaye Nyampinga w’u Rwanda 2016.

-  Uburanga bw’abakobwa 30 banyuze imbere y’Akanama Nkemurampaka

Abakobwa banyuze imbere y'Akanama Nkemurampaka nyuma yo gusobanurirwa ibigenderwaho mu irushanwa bafashwe ifoto ya rusange

-  Abakobwa 11 bagonzwe n’igipimo basezerewe rugikubita

Abakobwa benshi bitabiriye ijonjora ry’ibanze mu Karere ka Kayonza ariko abagera kuri 11 bagonzwe n’igipimo cy’uburebure n’ibilo bituma Babura amahirwe yo gukomeza ngo banyure imbere y’Akanama Nkemurampaka.

Urebye uko abakobwa bari gutambuka biragaragara ko biteguye gucana umucyo imbere y’abagize Akanama Nkemurampaka.

Abakobwa babanje gupimwa ibirimo n'uburebure aho igipimo fatizo ari metero 1.70 kuzamura

-  AHO MISS RWANDA WAYIKURIKIRANIRA

Irushanwa rya Miss Rwanda 2020 rinyura ku mbuga nkoranyambaga zayo zirimo Facebook, Twitter, Instagram na Snapchat mu gihe ijonjora riri kuba.

Ikiganiro kirambuye gica kuri KC2 TV na Youtube Channel ya Miss Rwanda buri wa Mbere, kuva saa tatu kugeza saa yine z’ijoro.

15:13: Umunyamakuru Martina Shami Abera ukora kuri KC2, Ishami rya kabiri rya Televiziyo y’u Rwanda uyobora igikorwa cyo guhitamo abazitabira Miss Rwanda 2020 yatanze ikaze mbere yuko igikorwa gitangira ku mugaragaro.

Umunyamakuru Martina Shami Abera ukora kuri KC2 ni we uyobora iri rushanwa nk'umuhuza w'abakobwa bitabiriye Miss Rwanda n'abagize Akanama Nkemurampaka
Yatangiranye n'iri rushanwa kuva i Rubavu mu Burengerazuba bw'u Rwanda
Abera Martina yambitswe na Ian Boutique

-  Reba ubwiza bw’abakobwa bitabiriye Miss Rwanda 2020 i Kayonza

-  Amafoto y’akanyamuneza k’abakobwa ubwo biyandikishaga

Abakobwa 90 ni bo biyandikishije ngo bahatanire guhagararira Intara y’Uburasirazuba muri Miss Rwanda 2020.

Muri bo 41 gusa ni bo bageze kuri Silent Hill Hotel ahabereye ijonjora ry’ibanze ariko 30 baba aribo bemererwa kunyura imbere y’Akanama Nkemurampaka.

Intara y'Uburasirazuba iracyari ku isonga mu kugira ubwitabire buri hejuru bw'abakobwa benshi bayiyandikishijemo
Mu bisabwa abakobwa biyandikisha harimo no kureba indangamuntu yabo n'imyaka bafite
Akanyamuneza kari kose...

-  KAYONZA yahize Huye mu duce twiyandikishijemo abakobwa benshi

Intara y’Uburasirazuba yarenze ku y’Amajyepfo mu ziyandikishirijemo abakobwa benshi n’abatoranyirijwe kunyura imbere y’Akanama Nkemurampaka.

Muri aka karere hiyandikishije abakobwa 90, muri bo 41 ni bo bageze ahabereye ijonjora mu gihe 30 aribo bujuje ibisabwa bibemerera kunyura imbere y’Akanama Nkemurampaka.

I Huye hiyandikishije abakobwa 79, ahabereye ijonjora hageze 28 mu gihe 17 aribo batoranyijwe nk’abujuje ibisabwa.

Mu Majyaruguru hiyandikishije abakobwa 75, muri bo 24 ni bo bageze aho igikorwa cyabereye mu gihe 14 ari bo banyuze imbere y’akanama nkemurampaka mu gihe mu Burengerazuba hiyandikishije 50, aho igikorwa cyabereye hagera 31 naho 13 banyura imbere y’akanama nkemurampaka.

-  Video: Ibyiyumviro by’abakobwa bazindutse ahabereye Miss Rwanda i Kayonza

14:35: Abakobwa bose bemerewe kunyura imbere y’Akanama Nkemurampaka bari gusobanurirwa imyitwarire ikwiye kubaranga, kuva ku ntambuko, kwirinda ubwoba mu gihe basubiza no kwigirira icyizere.

Bahawe ibisobanuro na Ishimwe Dieudonné wamamaye nka Prince Kid, ukuriye Rwanda Inspiration Back Up itegura Miss Rwanda.

Aho aba bakobwa bafite ibibazo babajije kugira ngo barusheho gusobanurirwa. Babwiwe ko Ikinyarwanda ari ururimi rw’ibanze bashobora gukoresha mu gihe kwifashisha izindi ndimi z’amahanga ari amahitamo yabo.

-  Uburasirazuba buheruka ikamba rya Akiwacu mu 2014

Imyaka isaga itanu irashize Intara y’Uburasirazuba itarabona ikamba rya Nyampinga w’u Rwanda kuko iriheruko gutaha muri aka gace ryegukanywe na Akiwacu Colombe.

Uyu mukobwa wavutse taliki ya 31 Ukwakira 1994. Ni mwene Gatali Vital na Mukankusi Immaculée.

Akiwacu Colombe ni we wegukanye ikamba rya Nyampinga w’ u Rwanda 2014 ryatanzwe ku wa 23 Gashyantare 2014, mu birori byabereye muri Petit Stade i Kigali.

Ku wa 28 Ukuboza 2013, nibwo uyu mukobwa yitabiriye amajonjora ya Miss Rwanda i Rwamagana anasekerwa n’amahirwe yo gutorerwa guhagararira Intara y’Uburasirazuba.

Yabaye Nyampinga wa Kane mu mateka y’itorwa rya Miss Rwanda, kuko Uwera Dalila wa mbere yatowe mu 1994, yakurikiwe na Bahati Grace mu 2009 na Mutesi Aurore Kayibanda wambaye iri kamba mu 2012.

Miss Akiwacu Colombe ni we wegukanye ikamba rya Nyampinga w’ u Rwanda 2014

-  Abaterankunga baherekeje Miss Rwanda 2020

Miss Rwanda 2020 yatewe inkunga n’abaterankunga batandukanye barimo Sosiyete y’Ubucuruzi ya Multi Design Group Ltd itanga serivisi zitandukanye zirimo kugena agaciro k’imitungo, gucunga imitungo itimukanwa, gukora no gucunga imishinga n’ibindi; MTN Rwanda itanga serivisi z’itumanaho; Uruganda rurangajwe imbere no kugira impinduka mu mibereho y’abantu rwa Africa Improved Foods; Ecobank itanga serivisi z’imari; East African Promoters (EAP) itegura ibitaramo; inzu y’imideli ya ‘Mr. Endowed’ yashinzwe n’umunyamideli Shiny Abdallah; Smart Design; Rwandamotor; Ian Boutique; Sosiyete y’Igihugu ishinzwe Ingufu (REG); Volcano n’abandi.

Abaterankunga batandukanye bari inyuma y'irushanwa rizasozwa hamenyekanye Nyampinga w'u Rwanda wa 2020

13:48: Abagize Akanama Nkemurampaka bategerejwe mu cyumba cya Silent Hill Hotel kigiye kuberamo ijonjora mu gihe abakobwa bakomeje gupimwa. Muri aka gace ni ho hiyandikishije abakobwa benshi, abagera kuri 90 ugereranyije n’izindi ntara eshatu irushanwa rimaze kunyuramo.

12:40: Abakobwa batangiye kwandikwa harebwa abajujuje ibisabwa bemererwa kunyura imbere y’Akanama Nkemurampaka.

-  Ibisabwa abakobwa biyandikisha

Uwiyandikisha asabwa ikimuranga nk’Umunyarwanda (indangamuntu cyangwa pasiporo); afite imyaka hagati ya 18-24; yararangije amashuri yisumbuye; avuga neza Ikinyarwanda cyangwa urundi rurimi rukoreshwa mu Rwanda nk’Igifaransa, Icyongereza n’Igiswahili.

Agomba kuba apima nibura ibilo 45 na metero 1.70 kuzamura; atarabyara; yemera kuzaguma mu Rwanda nibura umwaka umwe naramuka ahawe ikamba; yemera kutazashaka acyambaye ikamba; yemera kuzahagararira u Rwanda igihe cyose n’ahantu bikenewe no kuba yemera gukurikiza amategeko n’amabwiriza agenga Nyampinga w’u Rwanda.

-  Ahagana saa tanu z’amanywa, abakobwa babiri ba mbere bari bageze ahabereye ijonjora ry’ibanze mu Karere ka Kayonza kuri Silent Hill Hotel. Byari biteganyijwe ko batangira kuhagera saa Sita zuzuye kuko ijonjora ryagombaga gutangira saa Saba.

TUBAHAYE IKAZE I KAYONZA!

Irushanwa rya Miss Rwanda rigiye gukomereza mu Karere ka Kayonza muri Silent Hill Hotel iri hafi y’Umujyi wa Kayonza.

Silent Hill Hotel ni yo isanzwe iberamo iki gikorwa mu Burasirazuba bw’u Rwanda. Iri muri hoteli 26 zahawe inyenyeri ebyiri n’Ikigo cy’Igihugu cy’Iterambere (RDB) mu gikorwa cyabereye muri Serena Hotel ku wa 19 Ukuboza 2018.

Ubugenzuzi kuri hoteli zahawe inyenyeri bwarebye ku ngingo 16 zirimo ibikoresho byo ku nyubako, imiterere ya restaurant, bar, igikoni, ibyumba, isuku, serivisi z’amajwi, parking n’umubare w’abakozi zigenwa n’ibipimo bihuriweho mu Muryango wa Afurika y’Uburasirazuba (EAC).

Iteka rya Minisitiri rigena ibipimo ngenderwaho mu gushyira mu byiciro ibigo by’ubukerarugendo, riteganya ko bihabwa inyenyeri buri myaka ibiri.

Ijonjora ry'ibanze mu Karere ka Kayonza ryabereye kuri Silent Hill Hotel

-  Ibyo wamenya ku Karere ka Kayonza kakiriye irushanwa

Kayonza iherereye mu Ntara y’Uburasirazuba. Kagizwe n’imirenge 12 irimo Mukarange, Gahini, Rukara, Murundi, Mwiri, Rwinkwavu, Murama, Ndego, Kabare, Nyamirama, Ruramira na Kabarondo.

Aka karere kari ku buso bwa kilometero kare 1,935; ibarura ryo mu 2013 ryerekanye ko gatuwe n’abaturage 344 157.

Kayonza izwiho kugira ahantu nyaburanga harimo imisozi, ibiyaga, amashuri menshi, ibiranga amateka n’ibindi.

Mu bijyanye n’imyidagaduro, kari mu tuza ku isonga mu kugira abakinnyi benshi bamamaye cyane mu mukino w’amagare mu Rwanda.

Mu bazamuye izina ryako barimo Joseph Areruya wegukanye Tour du Rwanda 2017. Akinira Martinican amateur team Pédale Pilotine. Uyu musore w’imyaka 24 yihariye agahigo ko kuba ariwe wabaye Umunyafurika wa mbere witabiriye irushanwa rya Paris–Roubaix.

Akarere ka Kayonza gahana imbibi n’Akarere ka Rwamagana mu Burengerazuba, aka Gatsibo mu Majyaruguru, uturere twa Ngoma, Kirehe na Tanzania mu Burasirazuba.

Kagizwe n’utwahoze ari uturere twa Rukara, Kabarondo, Cyarubare n’imirenge ibiri yahoze ari iy’Akarere ka Muhazi ariyo Nyagatovu na Mukarange.

Imihanda yo mu Karere ka Kayonza irarambitse. Aka gace mu byo kazwiho harimo n'ubuhinzi bw'urutoki
Irushanwa riri kubera hafi y'Ibiro by'Akarere ka Kayonza

-  Abiyamamarije mu Karere ka Kayonza bafunguriwe amarembo

Amafoto y’abakobwa batoranyijwe mu ntara Miss Rwanda yanyuzemo

Mu ntara eshatu Miss Rwanda imaze kunyuramo hatoranyijwe abakobwa 19 bahataniye ikamba rya Nyampinga w’u Rwanda 2020.

-  Abatoranyijwe i Rubavu

Abakobwa bavuye mu Ntara y’Uburengerazuba ni Akaliza Hope, Uwamahoro Phoebe, Uwimana Joyeuse, Umutesi Denise, Umuratwa Anitha na Uwase Aisha.

Abakobwa batandatu b'uburanga babonye itike yo gukomeza mu kindi cyiciro cyo guhatanira Miss Rwanda 2020

-  Abatoranyijwe i Musanze

Abakobwa bavuye mu Ntara y’Amajyaruguru ni Tumuhorane Blaise (No 13); Mukabashambo Phionah (No 8); Mukangwije Rosine (No 14); Umubyeyi Natacha (No 1); Urujeni Melissa (No 9) na Umuhoza Doreen (No 3).

-  Abatoranyijwe i Huye

Abakobwa bavuye mu Ntara y’Amajyepfo ni Imanishimwe Hope Joy (No 12); Musana Teta Hense (No 4); Umwaliwase Claudette (No 1); Igihozo Diane (No 16); Ingabire Jolie Ange (No 3); Umutoniwase Nadia (No 10) na Mumporeze Josiane (No 6).

Abakobwa barindwi batoranyirijwe guhagararira Amajyepfo muri Miss Rwanda 2020

Amafoto: Miss Rwanda

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza