00:00:00 IGIHE NETWORK KN KINYARWANDA EN ENGLISH FR FRANCAIS

Intego ya Mwiza Zawadi winjiye mu muziki wo kuramya Imana nyuma yo kwiga umuziki ku Nyundo

Yanditswe na Uwiduhaye Theos
Kuya 31 Ukwakira 2021 saa 04:30
Yasuwe :
0 0

Umuhanzikazi Mukamwiza Zawadi [Mwiza Zawadi] yasohoye amashusho y’indirimbo ye ya mbere yise ‘Imirimo yawe’ yamwinjije mu muziki nk’umuhanzi uririmba indirimbo zo kuramya no guhimbaza Imana.

Uyu muhanzikazi abarizwa mu nzu ifasha abahanzi mu bya muzika yitwa Sunday Love Media Entertainment inabarizwamo umuraperi Rumasha.

Zawadi w’imyaka 20 y’amavuko yavukiye ahitwa i Nyarubure mu Karere ka Kirehe mu Ntara y’Iburasirazuba. Yakuze akunda umuziki ashaka no kuwukora mu buryo bw’umwuga.

Yavuze ko yagiye akomwa mu nkokora n’ubushobozi. Umuryango yakuriyemo ni abakirisitu ariko nta n’umwe wigeze agerageza gukora umuziki, ku buryo avuga ko ari we waserukiye umuryango.

Umuryango we wiyemeje kumufasha agakora umuziki, bamushyigikira bikomeye ubwo yababwiraga ko agiye kwiga umuziki ku ishuri rya muziki rya Nyundo.

Uyu mukobwa yitabiriye amarushanwa yabereye mu Mujyi wa Huye abasha gutsinda ndetse umwaka ushize nibwo yasoje amasomo muri iri shuri risigaye riba mu karere ka Muhanga mu Ntara y’Amajyepfo.

Zawadi Mwiza usengera muri Bethesda Holy Church mu kiganiro na IGIHE, yavuze ko nyuma yo gusoza amasomo yahisemo gukora umuziki uhimbaza Imana kubera ko ashaka kwifashisha ubutumwa Imana yamuhaye agahembura ubwoko bwayo.

Ati “Ndashaka gukora umuziki ukora ku mitima ya benshi. Kuramya no guhimbaza Imana ni bimwe mu bituma ngira amahoro muri njye. Kandi iyo ndirimbo numva nduhutse, ku buryo nshaka gusangiza abandi ibindimo.”

Uyu mukobwa yavuze ko mu myaka itanu ashaka ko umuziki we uzaba warenze imbibi ariko kandi anafasha abandi bahanzi bakizamuka.

Ati “Mu myaka itanu nifuza kuba ndi umuntu w’umuramyi ariko ufite abandi mu biganza azamuye. Ndacyeka izina ryanjye ryaba rimeze neza, ku buryo mu myaka itanu hari abo nagirira akamaro.”

Yasobanuye ko indirimbo ‘Imirimo yawe’ yayanditse ashaka kumvikanisha ko Imana iri kugenda ikuraho ibihe bibi nk’ibya Covid-19. Byatumye agira igitekerezo cyo kubwira abantu ko imirimo y’Imana ihambaye, kandi irenze ibyo abantu bibwira.

Mwiza Zawadi yavuze ko yishimira uburyo umuryango we umushyigikiye
Zawadi yavuze ko ashaka gukora umuziki uzatuma ashyigikira n’abandi banyempano mu muziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .