00:00:00 IGIHE NETWORK KN KINYARWANDA EN ENGLISH FR FRANCAIS

Amagambo Pst Zigirinshuti yavuze ku Ntambara y’Abacengezi yatumye ahagarikwa muri ADEPR

Yanditswe na Ishimwe Israel
Kuya 3 Ugushyingo 2021 saa 04:35
Yasuwe :
0 0

Itorero ADEPR ryahagaritse Pasiteri Zigirinshuti Michel mu gihe cy’amezi atatu atabwiriza kubera amagambo yavuze ubwo yari yatumiwe mu gitaramo cyabereye muri Paruwasi ya Nyarugenge.

Iki gitaramo Pasiteri Zigirinshuti yabwirijemo cyabaye ku wa 19 Nzeri 2021, cyatumiwemo Korali Siloam yo muri ADEPR Kumukenke na Shalom y’i Nyarugenge ari naho cyabereye.

Pasiteri Zigirinshuti yagaburiye abacyitabiriye ijambo riri muri 2 Petero 2:9 havuga hati “Umwami Imana izi gukiza abayubaha ibibagerageza no kurindira abakiranirwa kugeza ku munsi w’amateka ngo bahanwe.’’

Muri iyi nyigisho yavuze ko Imana ifite uko yagenza ibibazo by’abantu bayigumyeho.

Ati “Uwubaha Imana, Umwami Imana afite uko yagenza ibintu bye. Nta kigoye Uwiteka yabura uko agenza.’’

Pasiteri Zigirinshuti usanzwe ari Umushumba muri Paruwasi ya Gasave yifashishije ingero zitandukanye zirimo urugendo rw’Abiyisiraheli bava mu Misiri [Egiputa].

Mu kurushaho kumvikanisha inyigisho ye, yatanze urugero rw’uburyo mu Ntambara y’Abacengezi, abaturage banze kwitandukanya n’abacengezi [kuko barimo abana babo, abakwe n’abandi bo mu miryango] barwanyirijwe hamwe.

Mu myaka ya nyuma ya Jenoside yakorewe Abatutsi mu 1994, Ingabo zari iza RPA zinjiye mu rugamba rwo guhangana n’abacengezi. Icyo gihe byari bigoye kurokora umuturage ucumbikiye umucengezi kuko hari abanze kubarekura no gutungira inzego z’umutekano agatoki kuko bari bafitanye amasano.

Muri icyo kibwiriza, Pasiteri Zigirinshuti yashushe nk’ushaka kuvuga ko mu myizerere, umuntu wifatanya n’umwanzi Satani bigora kumurokora.

Mu nyigisho iri kuri YouTube ya ADEPR NYARUGENGE_CHURCH ifite amasaha atatu, iminota 38 n’amasegonda 24, hakuwemo uduce duto tw’aho Pasiteri Zigirinshuti yatanze urugero ku Bacengezi n’aho Pasiteri Rurangwa bari kumwe asa n’umusubiza.

Gusa bamwe mu bitabiriye ayo materaniro bahamirije IGIHE ko uyu mukozi w’Imana yakoresheje urwo rugero rw’Abacengezi, akagera n’aho avuga ko “abanze kwitandukanya nabo babigendeyemo”.

-  Amagambo ya Pasiteri Zigirinshuti yakiriwe ate?

Ubusanzwe muri ADEPR, iyo Abapasiteri bamaze kubwiriza basengera abemeye kwihana ibyaha cyangwa bagasengera abarwaye.

Muri uwo mwanya rero, ni bwo Umushumba w’Ururembo rwa Kigali, Pasiteri Rurangwa Valentin, yashimiye Pasiteri Zigirinshuti ‘watuganirije neza amagambo meza’.

Yavuze ko ubwo yigishaga yatanze urugero rumwibutsa inkuru iri muri 1 Samweli ivuga kuri Yesayi wohereje Dawidi ku rugamba ngo ajye kureba uko bakuru be bameze.

Yakomeje ati “Iyo abantu bari mu ntambara, amakuru aturuka ku rugamba hari aza ari ukuri n’aza ari ibihuha.”

Ibyakuriye aya magambo ya Pasiteri Rurangwa wari muri uwo muhango, bigaragara ko byakaswe mu butumwa bwashyizwe kuri Youtube ya ADEPR.

Yesayi yahamagaye Dawidi amuha ingemu yo gushyira bakuru be, umutware wabo no kumufasha kumenya inkuru z’imvaho z’ibibera ku rugamba.

Uru rugero yarutanze asa n’ugorora amagambo yavuzwe na Pasiteri Zigirinshuti mu gushimangira ko Inkotanyi zitigeze zica abaturage mu Ntambara y’Abacengezi.

Ubusanzwe nyuma y’amateraniro abapasiteri baba abasangwa n’abashyitsi bakora inama, bakanabakira. Nta gushidikanya ko iyi ngingo yaganiriweho hagati y’impande zombi.

IGIHE yamenye ko nyuma y’icyumweru, Pasiteri Zigirinshuti yandikiwe ibaruwa asabwa ibisobanuro ku magambo yavuze ndetse mu minsi itanu ahita ahagarikwa.

Uwaduhaye amakuru yavuze ko uyu mukozi w’Imana yahagaritswe amezi atatu, akumirwa kongera kubwiriza mu rusengero no kuri YouTube.

Bivugwa kandi ko nyuma y’amateraniro, aba bapasiteri bombi baganiriye bakemeranya ko ibyavugiwe mu materaniro birangiriye aho, nta kibazo gikwiriye kuzamo.

Ku rundi ruhande, hari bamwe mu bantu ba hafi ba Zigirinshuti bavuga ko batunguwe n’uburyo Pasiteri Rurangwa yagiye kugorora imvugo ya mugenzi we.

-  Rucagu azi uko byagendekeye Abacengezi

Mu gihe cy’Intambara y’Abacengezi mu 1997, Rucagu Boniface yari Perefe wa Ruhengeri.

Iyi perefegitura yafatwaga indiri y’aho Abacengezi bakekaga ko bahabonera ubwihisho nyuma ya Jenoside kuko hari abahakomokaga bahafite imiryango.

Abo Bacengezi bajujubije aka gace birara mu batuye i Musanze, Rulindo, Gakenke n’ahandi bica benshi.

Rucagu yinginze abafite imyumvire yo gukomera ku Bacengezi, ndetse akarabira mu maso yabo ko abadashaka kwitandukanya nabo abavuyeho. Icyo gihe yababwiye ko bagomba kuyoboka FPR Inkotanyi.

Mu 2019, Rucagu yabwiye IGIHE ko yatumije inama y’abaturage abihanangiriza bwa nyuma ku gukorana n’abacengezi.
Ati “Mu 1994, abandi barahunze abategetsi bamaze gutsindwa, babasiga mwenyine. Njye sinahunze nagumanye namwe kandi hari icyo byabafashije. Twarwanyije Abacengezi turabatsinda none mwongeye kunyura mu nzira mbi. Mbamenyesheje ko niba mukomeje iyo nzira, nanjye ndahunga.’’

Yababwiye ko amaraso y’abana babo n’ayabo agiye kuzameneka kubera imyitwarire yabo [yo kwifatanya n’Abacengezi]. Ati “Nyakarabiye imbere yanyu, azababazwe ntazambazwe.’’

Rucagu yakomeje ati “Mufunge ibiganza murasanga mwafunze neza nta mazi ashobora kumeneka, ubwo muri ibyo biganza byanyu ni amaraso y’abana banyu arimo, muragenda nabi, mukarangara mugatsikira amaraso arameneka. Nameneka azababazwe, igihe cyose mumenye ko mubumbatiye amaraso yanyu n’ay’abana banyu. Ni ko byagenze. Na n’ubu bagenda bigengesereye.’’

-  Reba guhera ku munota wa 15, Rucagu avuga ku guhangana n’Abacengezi

Rucagu yatanze uru rugero ashaka kumvikanisha ko mu gihe abaturage binangiye kwitandukanya n’umwanzi, hakoreshwa ubundi buryo bwo kumwikiza kuko baba baburiwe.

Ubwo twandikaga iyi nkuru twagerageje kuvugana n’impande zose zirebwa no guhagarikwa kwa Pasiteri Zigirinshuti, ariko yirinze kugira icyo abivugaho.

Umushumba w’Ururembo rwa Kigali, Pasiteri Rurangwa Valentin, uyobora aho amagambo yabaye intandaro yo guhagarika Pasiteri Zigirinshuti yavugiwe n’Umushumba Mukuru wa ADEPR, Pasiteri Ndayizeye Isaïe ntacyo badutangarije.

Mu butumwa bugufi, babwiye umunyamakuru wa IGIHE ko ‘bari mu nama’.
Si ku nshuro ya mbere Pasiteri Zigirinshuti ahagaritswe by’igihe gito muri ADEPR.

Mu ntangiriro za Nyakanga 2020 ADEPR yamuhagaritse mu gihe cy’amezi atatu aho byavugwaga ko yahowe amagambo y’inyigisho n’ubuhanuzi yatangaje ahanini afitanye isano n’indwara z’ibyorezo.

Mu 2018 nabwo Pasiteri Zigirinshuti yirukanwe muri ADEPR ku kazi k’ukuriye Ivugabutumwa n’Amahugurwa, azira kugata atabimenyesheje ubuyobozi.

Mu kwiregura yavuze ko muri Werurwe 2018 yagiye mu giterane cy’Itorero Fullness of God International Ministries rifatanyije na Parani Pentecostal Church Ministry muri Afurika y’Epfo kubwiriza bizwi ndetse ibaruwa imutumira yanyujijwe ku Muvugizi wa ADEPR [yari Rev. Karuranga Euphrem], anabimenyesha Umuvugizi wungirije asaba uruhushya ariko birengwaho arirukanwa.

Pasiteri Zigirinshuti yamaze imyaka itandatu akuriye Ivugabutumwa n’Amahugurwa muri ADEPR kuva mu 2012, umwanya yaje kwirukanwaho muri Werurwe 2018 ashinjwa guta akazi atabimenyesheje ubuyobozi.

Uyu muvugabutumwa ari mu bo muri ADEPR batarya iminwa mu gihe bashaka gutambutsa ubutumwa bw’ibikeneye gukosorwa. Ibyo bituma akundwa ndetse bigahurirana n’uburyo abara inkuru iyo abwiriza, bikaryohera abamukurikira.

Pasiteri Zigirinshuti Michel ukorera umurimo w’ivugabutumwa muri Paruwasi Gasave yahagaritswe amezi atatu atabwiriza mu nsengero no kuri YouTube

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .