00:00:00 IGIHE NETWORK KN KINYARWANDA EN ENGLISH FR FRANCAIS

Paruwasi ya Zaza yizihije imyaka 121 imaze ishinzwe, hishimirwa ibyo yagejeje ku baturage

Yanditswe na Hakizimana Jean Paul
Kuya 2 Ugushyingo 2021 saa 07:54
Yasuwe :
0 0

Antoine Cardinal Kambanda yavuze ko bishimira iterambere abaturage bo mu Murenge wa Zaza mu Karere ka Ngoma bamaze kugeraho barikesha Paruwasi ya Zaza imaze imyaka 121 yogeza ubutumwa bwiza.

Ibi yabigarutseho ubwo hizihizwaga Yubile y’imyaka 121 iyi Paruwasi imaze ishinzwe yabaye iya kabiri mu Rwanda yashinzwe nyuma ya Save iherereye mu Karere ka Huye.

Paruwasi ya Zaza yashinzwe tariki ya 1 Ugushyingo 1900 bigizwemo uruhare na Musenyeri Hilt na bagenzi be.

Zaza izwi cyane nk’imwe mu zifite amashuri ya kera nka Petit Seminaire de Zaza, TTC Zaza imaze imyaka 75 n’andi menshi ahabarizwa.

Antoine Cardinal Kambanda wari wifatanyije n’abaturage ba Zaza aho yanabanje gutura igitambo cya misa, yavuze ko iyi Paruwasi yatumye abaturage benshi bamenya gusoma no kwandika, inagira uruhare mu kwita ku buzima bwabo n’iterambere muri rusange.

Yakomeje agira ati "Ubundi kwigisha ijambo ry’Imana byatangiranye n’uburezi mu gitondo bakigisha gusoma no kwandika, ku mugoroba bakigisha ijambo ry’Imana; ubwo rero aho niho amashuri yagiye atangirira mu buryo bw’umwihariko hano i Zaza. Ni ryo shuri rikuru nderabarezi ryabanje mu gutegura abarimu bazajya bigisha mu mashuri."

Yakomeje avuga ko bishimiye isabumuru y’ishingwa rya Paruwasi ya Zaza n’ibyiza imaze kugeza ku baturage.

Bamwe mu baturage baganiriye na IGIHE bavuze ko iyi Paruwasi yagize uruhare mu burezi bw’abana babo ndeste inabafasha mu buryo butandukanye.

Shumbusho Balthazar ufite imyaka 61 uvuka i Zaza yavuze ko kimwe mu byo yishimira ari uko yize mu mashuri yazanywe na Kiliziya Gatolika ndetse ayo mashuri akaba yaranagiriye umumaro abana be.

Mukankubana Veneranda ufite imyaka 66 wabatirijwe muri iyi Paruwasi yavuze ko bishimira bimwe mu bikorwa by’iterambere bamaze kugezwaho nay o birimo iyogezabutumwa n’imibereho myiza isanzwe.

Umuyobozi w’agateganyo w’Akarere ka Ngoma, Kanayogye Alex, yavuze ko hari ibikorwa byinshi bikomeye Kiliziya Gatolika igiramo uruhare birimo kurwanya imirire mibi ndetse n’ibindi bibazo byo mu miryango. Yavuze ko bishimira ubwo bufatanye anabasaba gukomerezaho bagafasha abanyarwanda mu gukomeza kugera ku iterambere.

Ati "Turashima ibikorwa by’iterambere mukomeje gukora yaba guteza imbere ubuhinzi n’uburezi. Nibura ureba amashuri yubatswe hano ukabona uburyo afasha abana b’abanyarwanda kwiga neza kandi bagatsinda, ikindi dufatanya mu kubaka amashuri."

Uretse kwizihiza iyi Yubile y’imyaka 121 Paruwasi ya Zaza imaze, hanatangizwaga ku mugaragaro ku rwego rwa Diyoseze, Yubile y’imyaka 400 hashinzwe urwego rukuru muri Kiliziya Gatolika rushinzwe kogeza ivangili ku isi.

Antoine Cardinal Kambanda yavuze ko bishimira ibikorwa byiza Kiliziya Gatolika imaze kugeza ku baturage b'i Zaza
Kwizihiza Yubile y'imyaka 121 ya Paruwasi ya Zaza byabanjirijwe n'igitambo cya misa
Abayobozi batandukanye bitabiriye uyu muhango
Cardinal Kambanda ni we wayoboye igitambo cya misa yabereye muri Paruwasi ya Zaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .