V-23: Inzozi z’u Rwanda zo kujya mu gikombe cy’Isi zarangiriye muri Kenya

Yanditswe na Ishimwe Israel
Kuya 27 Ukwakira 2016 saa 08:00
45 30

Ikipe y’u Rwanda ya Volleyball yari mu marushanwa y’igikombe cya Afurika cy’abatarengeje imyaka 23 mu bagore, yatsinzwe na Kenya amaseti 3-1 ku mukino wa nyuma ihita itakaza amahirwe yose yo kwerekeza mu gikombe cy’Isi kizabera muri Slovenia umwaka utaha.

U Rwanda rwari rwitwaye neza mu mikino itatu yabanje rutsinda Sénégal na Botswana, rutsindwa na Misiri ya mbere muri Afurika kuri ubu.

Mu mukino wa nyuma utari woroheye aba bangavu b’u Rwanda bayobowe n’umutoza, Paul Bitok bagombaga kwisobanura na Kenya yakiriye irushanwa bishakamo ikipe izaherekeza Misiri mu gikombe cy’Isi.

Uyu mukino wabaye ku gicamunsi cyo kuri uyu wa Kane, Kenya yahabwaga amahirwe nk’imwe mu makipe akomeye cyane muri iri rushanwa, inyuma ya Misiri yatangiye igora u Rwanda cyane ndetse itsinda iseti ya mbere ku manota 25-23.

Mu iseti ya kabiri aba bakobwa bari bamaze gusa n’abatinyuka batangiye bihagaragaraho ariko Kenya ikanyuzamo ikayobora umukino cyane, ariko iyi yegukanwa n’u Rwanda ku manota 25-23 ya Kenya.

Ikipe y’Igihugu ya Kenya yagarutse mu iseti ya gatatu yahinduye ibintu cyane iyitsinda ku manota 25-22 y’u Rwanda.

Mu iseti ya kane, nubundi Kenya yerekanye urwego ruri hejuru cyane, yayitsinze ku manota 22 u Rwanda rukiri kuri 14 rurazamuka rugera kuri 18 Kenya ifite 23.

Nubwo byasaga n’ibigishoboka, u Rwanda ntirwahiriwe kuko Kenya yahise ibona amanota abiri iseti irangira ari 25-19.

Kuri uyu wa Gatatu u Rwanda rukimara gutsinda Botswana ku maseti 3-0, umutoza Paul Bitok yari yatangaje ko kugera mu makipe atatu ya mbere ari yo ntego bakuye i Kigali kandi bayigezeho ariko yongeraho ko bashaka gutsinda Kenya bakabona itike y’igikombe cy’Isi.

Muri iki gikombe cy’Isi kizabera muri Slovenia kuva tariki 27 Kanama gisozwe ku wa 3 Nzeri 2017, Afurika izaba ihagarariwe n’ibihugu bibiri muri 14 bizacyitabira.

Misiri yatsinze imikino yayo yose, ndetse yegukana n’igikombe cya Afurika ndetse na Kenya nizo zabonye itike yo kwerekeza muri iri rushanwa.

U Rwanda rwatsinze imikino ibiri, rutsindwa indi ibiri muri iri rushanwa
U Rwanda rwabuze amahirwe yo kwerekeza mu gikombe cy'Isi
Kenya yabonye itike yo kwitabira imikino y'igikombe cy'Isi itsinze u Rwanda
Misiri ivuye muri iri rushanwa idatsinzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE