Umwaka w’imikino mushya muri Volleyball ushobora gutangira muri Werurwe

Yanditswe na Eric Tony Ukurikiyimfura
Kuya 8 Gashyantare 2021 saa 03:47
Yasuwe :
0 0

Ishyirahamwe Nyarwanda ry’Umukino wa Volleyball (FRVB) ryatangaje ko amarushanwa y’umwaka w’imikino wa 2021/22 arimo Shampiyona n’andi ayibanziriza, ashobora gutangira tariki ya 20 Werurwe 2021.

Iki cyemezo cyafatiwe mu Nama y’Inteko Rusange Idasanzwe yateranye ku wa Gatandatu tariki ya 6 Gashyantare hifashishijwe ikoranabuhanga, iyobowe n’Umuyobozi wa FRVB, Dr Kabera Callixte.

Ku murongo w’ibyigwa hari ingingo ebyiri zirimo gusuzuma gahunda y’ibikorwa mu mwaka w’imikino wa 2021/22, amarushanwa mu mwaka wa 2021 (gahunda ya Shampiyona, uko izakorwa, amategeko azagenga Shampiyona, azagenga ihinduranya ry’amakipe n’ingengabihe ya Shampiyona n’amarushanwa atandukanye). Indi ngingo, yari ugusuzuma ubusabe bw’abanyamuryango bashya.

Gahunda y’ibikorwa by’umwaka yemejwe imaze gukorerwa ubugororangingo, Inteko Rusange isaba ko igikorwa cyo gushaka abafatanyabikorwa mu gihugu no mu mahanga cyashyirwamo imbaraga byaba na ngombwa kikongererwa ingengo y’imari.

Inteko Rusange yasabye kandi ko kwakira amarushanwa mpuzamahanga byongererwa imbaraga ndetse yemeje amategeko azagenga Shampiyona y’uyu mwaka nyuma yo kuyakorera ubugororangingo.

Mu bindi byagarutsweho harimo ibibazo bikunze kugaragara mu masezerano y’amakipe n’abakinnyi mpuzamahanga, aho amakipe yemerera abakinnyi ibintu runaka, ariko ntabashe kubibaha bigatera amakimbirane. Abanyamuryango bemeranyijwe ko ari ikibazo kiremereye, bemeza ko abantu bakomeza kugitekerezaho, kikazigwaho mu Nteko Rusange Isanzwe iteganyijwe muri Werurwe 2021.

Hemejwe kandi uburyo Shampiyona izakinwamo, aho izakinwa mu bice bitandukanye, kuri buri gice amakipe yose agahura kandi buri kipe ikazagira igihe cyo kwakira.

Hagaragajwe ingengabihe y’agateganyo y’amarushanwa ndetse iremezwa. Amarushanwa azatangira ku wa 20 Werurwe ariko bikaba bishobora guhinduka hagendewe ku ngamba za Leta zo kurwanya COVID-19.

Kaminuza y’u Rwanda, Ishami rya Nyarugenge, yemejwe nk’umunyamuryango mushya, ikazatangira ikina muri Shampiyona y’Icyiciro cya Kabiri (Serie B) mu gihe byemejwe ko IPRC Musanze iva muri Serie B ikajya mu Cyiciro cya Mbere (Serie A).

Shampiyona ya Volleyball ya 2019/20 yasojwe n’irushanwa rito mu Ukwakira, APR VC mu bagabo na UTB VC mu bagore, aba ari zo zegukana ibikombe.

Shampiyona ya Volleyball ishobora gutangira muri Werurwe uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .