00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rutegereje umwanzuro wa FIVB kuri dosiye yafungishije Jado Castar

Yanditswe na Eric Tony Ukurikiyimfura
Kuya 15 Ugushyingo 2021 saa 06:59
Yasuwe :
0 0

Ishyirahamwe Nyarwanda ry’Umukino wa Volleyball (FRVB) ritegereje umwanzuro wa FIVB yahagaritse u Rwanda by’agateganyo nyuma y’uko rukinishije abakinnyi bane bakomoka muri Brésil, batari bujuje ibyangombwa ubwo barukiniraga muri Shampiyona Nyafurika y’Abagore yabereye i Kigali hagati ya tariki ya 10 n’iya 20 Nzeri 2021.

Aline Siqueira, Apolinario Caroline Taiana, Mariana Da Silva na Moreira Bianca Gomes bakomoka muri Brésil, bakiniye u Rwanda ku nshuro ya mbere nyuma yo kugera i Kigali muri Kanama uyu mwaka, ni bo bagaragajwe nk’abakinnyi batujuje ibisabwa mbere y’umukino rwari rugiye guhuramo na Sénégal ku wa 16 Nzeri 2021 mu matsinda.

Ibi byatumye hafatwa umwanzuro w’uko irushanwa risozwa hatarimo ikipe y’u Rwanda kuko yahise isezererwa ndetse ruhagarikwa by’agateganyo n’Ishyirahamwe Mpuzamahanga rya Volleyball (FIVB).

Ku wa 13 Ukwakira 2021, Urukiko Rwisumbuye rwa Gasabo rwakatiye Visi Perezida wa Kabiri ushinzwe Amarushanwa mu Ishyirahamwe Nyarwanda ry’Umukino wa Volleyball (FRVB), Bagirishya Jean de Dieu uzwi nka ‘Jado Castar’ igifungo cy’imyaka ibiri kubera uruhare yagize mu makosa yatumye u Rwanda ruzererwa mu irushanwa.

Mu kiganiro n’abanyamakuru cyabaye ku Cyumweru, Visi Perezida wa Mbere muri FRVB, Nsabimana Eric ‘Machine’, yavuze ko nta cyemezo barafata ku gusimbuza Jado Castar kuko bagitegereje kumenya umwanzuro wa nyuma uzatangwa na FIVB.

Ati “Byose murabizi ntabwo ari ibanga, ntabwo navuga ngo kuzamusimbura cyangwa kuzamutegereza, na byo tubirimo kuko ikibazo hari aho bitararangira, ariko hari andi makuru dutegereje, hari ibindi byemezo dutegereje muri FIVB, murabizi ko guhagarikwa byari agateganyo, turacyategereje n’andi makuru navuga ngo twabajijeho ibisobanuro byacu n’icyabiteye.”

Yakomeje agira ati “Dutegereje ko komite ibishinzwe ifata icyemezo ikatubwira niba dushobora gukomeza mu marushanwa nk’ibisanzwe cyangwa se niba baduhana, tukamenya icyemezo gitanzwe kuko bari baduhagaritse by’agateganyo. Bagomba kudusubiza vuba aha. Icyo gihe tumaze kubona ibisubizo kuri byose ni bwo tuzicara tukamenya ngo turakomezanya na we cyangwa se turamusimbuza.”

Ubwo Minisitiri wa Siporo, Munyangaju Aurore Mimosa, yaganiraga na IGIHE mu mpera z’Ukwakira, yavuze ko mu isesengura bakoze, basanze “ikibazo cyari kirimo cyari kiri tekiniki kijyanye n’uburyo abakinnyi bavuye muri federasiyo yabo bandikwa muri federasiyo y’u Rwanda”.

FIVB iteganya ko mu gihe igihugu gikoresheje abakinnyi batujuje ibisabwa ku buryo bagikinira mu marushanwa, gihanishwa gusezererwa no guhagarikwa mu gihe cy’imyaka ibiri kandi buri mukinnyi akishyurirwa ibihumbi 30 CHF (asaga miliyoni 32 Frw).

U Rwanda rwasezerewe mu Gikombe cya Afurika cya Volleyball mu Bagore rushinjwa gukinisha abakinnyi bakomoka muri Brésil kandi batujuje ibisabwa
Visi Perezida wa Kabiri ushinzwe Amarushanwa muri FRVB, Bagirishya Jean de Dieu ‘Jado Castar’ yakatiwe igifungo cy'imyaka ibiri kubera amakosa yatumye u Rwanda rusezererwa
Visi Perezida wa Mbere muri FRVB, Nsabimana Eric ‘Machine’, yavuze ko bagitegereje umwanzuro uzafatwa na FIVB yahagaritse u Rwanda by'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .