REG VC yatahanye umwanya wa cyenda nyuma yo gutsinda APR muri Shampiyona Nyafurika

Yanditswe na Eric Tony Ukurikiyimfura
Kuya 27 Mata 2021 saa 08:37
Yasuwe :
0 0

Amakipe abiri yari ahagarariye u Rwanda muri Shampiyona Nyafurika ihuza amakipe y’abagabo yatwaye ibikombe iwayo “CAVB Men’s African Volleyball Clubs Championship 2021” i Sousse muri Tunisia, yahuriye mu guhatanira umwanya wa cyenda n’uwa 10, REG VC itsinda APR VC amaseti 3-0.

Ku wa Mbere tariki 26 Mata 2021 ni bwo hasojwe imikino yo guhatanira imyanya muri iyo mikino Nyafurika y’amakipe yatwaye ibikombe iwayo mu bagabo.

Ikipe ya REG VC na APR VC zari zihagarariye u Rwanda zahuriye mu mukino wo guhatanira umwanya wa 09 n’uwa 10. REG VC yitwaye neza itsinda APR VC amaseti 3-0 (25-18, 25-21 na 25-22), yegukana umwanya wa cyenda naho APR VC iba iya 10.

Umutoza wa REG VC, Mugisha Benon, yavuze ko utari umukino woroshye, ariko abakinnyi be bashyize mu bikorwa ibyo yari yabasabye. Yavuze ko kandi nubwo batageze ku ntego bari bihaye zo kwegukana umwanya wa kane, ariko nk’ikipe yitabiriye bwa mbere umwanya wa cyenda atari mubi.

Ati “Ntabwo wari woroshye, ariko twabyakiriye neza, ibyo twari twapanze nibyo bakoze. Twakinnye neza, twishimye, ariko nk’abari baje bafite intego yo kuba muri bane ba mbere, ntitwakwishimira umwanya wa cyenda nubwo nawo ari mwiza. Isomo rya mbere si ukwitegura gusa, ikipe igomba gukina n’amarushanwa, imyitozo hari aho itakugeza imbere.”

Mutabazi Elie utoza APR VC, we yavuze ko atatangajwe no gutsindwa na REG VC kuko yatangiye kwitegura mbere, ariko yongeraho ko abakinnyi be bitwaye nabi muri uyu mukino.

Ati “Kuva i Kigali yaradutsindaga, ubu ni ubwa kane kandi idutsinze nabi cyane amaseti 3-0, ariko ku bwanjye ntabwo byantangaje kuko yatangiye kwitegura mbere. Twakinnye nabi bishoboka, sinzi icyabiteye. Sinzi niba ari umunaniro cyangwa ikindi kibazo.”

Biteganyijwe ko aya makipe yombi yari ahagarariye u Rwanda muri Tunisia, azagera i Kigali ku wa Gatatu tariki ya 28 Mata 2021.

Mu yindi mikino yo guhatanira imyanya yabaye, KPA yatsinze Port Douala amaseti 3-1 (25-18, 25-21, 23-25 na 25-20) mu guhatanira umwanya wa 5 n’uwa 6. Mu guhatanira umwanya wa 7 na 8, ikipe ya GSU yatsinze Nemostars amaseti 3-0 (25-14, 25-19 na 25-19).

Mu guhatanira umwanya wa 11 na 12, Nigeria Customs yatsinze MTC amaseti 3-1 (25-17, 17-25, 25-17 na 25-19). Mu guhatanira umwanya wa 13 na 14, Espoir VC yatsinze Rukinzo VC amaseti 3-0 (25-21, 25-21 na 25-14) naho guhatanira umwanya wa 15 na 16, Wolaita Dicha yatsinze SOA amaseti 3-2 (23-25, 25-13, 21-25, 25-21 na 25-11).

Ikipe yasoje iri ku mwanya wa gatanu ni KPA (Kenya), Port Douala (6), GSU (7), Nemostar (8), REG VC (9), APR VC (10), Nigeria Customs (11), MTC (12), Espoir VC (13), Rukinzo VC (14), Wolaita Dicha (15) na SOA (16).

Kuri uyu wa Kabiri tariki 27 Mata 2021 ni bwo hateganyijwe imikino ya nyuma aho ikipe ya Esperance de Tunis yo muri Tunisia igomba gukina na Zamalek mu guhatanira igikombe. Umukino wo guhatanira umwanya wa gatatu ugomba guhuza ikipe ya Kelibia (Tunisia) na Swehly (Libya).

APR VC na REG VC zahuriye mu mukino wo guhatanira umwanya wa cyenda n'uwa 10
REG VC yitwaye neza, itsinda umukino ku maseti 3-0
APR VC yabaye iya 10 nyuma yo gutsindwa na REG VC
REG VC yari yihaye intego yo gusoreza mu makipe ane ya mbere, yishimiye ko ku nshuro ya mbere yabaye iya cyenda
Mugisha Benon utoza REG VC yishimiye uko abakinnyi be bakinnye na APR VC
Mutabazi Elie yavuze ko abakinnyi ba APR bakinnye nabi cyane

Amafoto: REG VC


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .