00:00:00 IGIHE NETWORK KN KINYARWANDA EN ENGLISH FR FRANCAIS

KVC y’abagore yatewe inkunga na Azam, yiyemeza guha ibyishimo Abanya-Kigali (Amafoto)

Yanditswe na Eric Tony Ukurikiyimfura
Kuya 7 Ugushyingo 2021 saa 08:11
Yasuwe :
0 0

Ikipe y’abagore ya KVC yasinye amasezerano y’imyaka itatu y’ubufatanye na sosiyete ya AZAM Bakhresa Group izwi cyane nk’uruganda rukora ifarini rubarizwa muri Tanzania, yiha intego yo kuzamura impano muri Volleyball no kugeza ibyishimo ku Banya-Kigali.

KVC y’Abagore isanzwe ari imwe mu makipe akina Shampiyona y’Icyiciro cya Mbere muri Volleyball ndetse mu mwaka ushize wa 2020, yasoreje ku mwanya wa kane nyuma yo gutsindwa na RRA VC.

Ku wa Gatanu tariki ya 5 Ugushyingo 2021, iyi kipe yasinye amasezerano y’ubufatanye na sosiyete ya AZAM Bakhresa Group, azamara imyaka itatu, akaba afite agaciro ka miliyoni 20 Frw.

Umuyobozi wa KVC, Ruterana Fernand Sauveur, yavuze ko bishimiye kubona uyu mufatanyabikorwa kuko bigiye kongera imbaraga mu ikipe ikarushaho guhatana kandi bizeye ko bazaha ibyishimo Abanya-Kigali.

Ati “Twari tumaze iminsi mu biganiro na Azam mu rwego rw’ubufatanye. Twabifata nk’aho ari mu rwego rwo kwimenyereza kugira ngo nibigenda neza tuzakomezanye. Tuzafatanya mu bakobwa, turashaka ko ibyishimo biguma hano mu Mujyi.”

Abajijwe niba igicumbi cya KVC kizakomeza kuba i Nyamirambo, Ruterana yavuze ko nta mpamvu yo kuyifata muri ubwo buryo kuko ari ikipe y’Umujyi wose.

Ati “Ni byo koko KVC isanzwe ibarizwa i Nyamirambo, abantu bazi ko ari iyaho, ariko ubu igomba kwaguka ikaba ikipe y’Umujyi wa Kigali nubwo ari iy’umuryango wigenga, ibeshejweho n’abanyamuryango. Ubu tubonye Azam, ubusanzwe twari dufite Umujyi wa Kigali dufatanya mu buryo buhoraho, ariko tukiri mu biganiro kugira ngo birusheho kugenda neza.”

Ndagano Faradjallah uhagarariye Azam mu Rwanda, yavuze ko bishimiye kuba umuterankunga w’ikipe ya Volleyball by’umwihariko y’abagore ndetse bahisemo KVC bashingiye ku mateka yayo.

Ati “Biradushimishije kuba tubaye umuterankunga w’ikipe ya Volleyball kandi noneho ikaba ibaye KVC y’abakobwa. Nka sosiyete igira uruhare mu iterambere rya siporo ntitwifuzaga ko uruhare rwacu rwagarukira mu makipe y’abagabo gusa.”

Yakomeje agira ati “Twararebye dusanga ikipe ifite amateka meza kandi abantu benshi bazi ari KVC, tuganira n’umuyobozi wayo kugira ngo dufatanye kuyiteza imbere. Turashaka ko ari ikipe ibaho neza, itsinda kandi izamura impano z’abakinnyi. Ikindi ni ukugira ngo dutange urugero no ku bandi ko bishoboka gukorana n’amakipe y’abakobwa.”

Uretse KVC y’abakobwa, ikipe y’abagabo yari imaze imyaka ine idakina na yo yitezwe muri Shampiyona ya 2021/22 izatangira mu kwezi gutaha hagati ya tariki ya 10 n’iya 12 Ukuboza.

Sosiyete ya AZAM Bakhresa Group isanzwe ari umuterankunga w’amakipe yo mu Rwanda arimo APR FC, Kiyovu Sports na Patriots BBC.

KVC na Azam byasinyanye amasezerano y'imyaka itatu ku wa Gatanu
Ndagano Faradjallah uhagarariye Azam mu Rwanda na Ruterana Fernand Sauveur uyobora KVC ubwo bari bamaze gushyira umukono ku masezerano, berekana umwambaro ikipe izajya yambara
Ruterana Fernand Sauveur uyobora KVC, yavuze ko bagiye guharanira ko ibyishimo byo muri Volleyball biguma i Kigali
Ndagano Faradjallah uhagarariye Azam mu Rwanda, yavuze ko bahisemo KVC bashingiye ku matekayo n'uburyo ikundwa na benshi
Azam na KVC bigiye gukorana mu gihe cy'imyaka itatu hagamijwe ko iyi kipe yarushaho guteza imbere impano z'abakinnyi ba Volleyball
Uhereye ibumoso ni: Jean Patient Kitenge ushinzwe amakuru n'ikoranabuhanga muri Azam, Nsanzabaganwa Arthur ushinzwe ubucuruzi n'iterambere muri Azam, Ndagano Faradjallah, Munyangaju Mugwaneza Hubert ushinzwe ubuzima bwa buri munsi bwa KVC ndetse na Ruterana Fernand Sauveur

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .