00:00:00 IGIHE NETWORK KN KINYARWANDA EN ENGLISH FR FRANCAIS

Beach Volleyball: Amakipe 25 amaze kwiyandikisha mu irushanwa ryo ku rwego rw’Isi rizabera i Rubavu

Yanditswe na Eric Tony Ukurikiyimfura
Kuya 20 Gicurasi 2021 saa 07:16
Yasuwe :
0 0

Ishyirahamwe Nyarwanda ry’Umukino wa Volleyball, FRVB, ryatangaje ko amakipe 25 arimo 11 y’abagore, ariyo amaze kwiyandikisha kugira ngo azitabire irushanwa rya Volleyball yo ku mucanga ryo ku rwego rw’Isi rizabera i Rubavu hagati ya tariki ya 14 n’iya 18 Nyakanga 2021.

Iri rushanwa rya ‘Beach Volleyball World Tour” yo ku rwego rwa kabiri rizabera mu Rwanda muri uyu mwaka wa 2021, ryari riteganyijwe muri Gashyantare 2021, ariko ryimurirwa muri Nyakanga kubera icyorezo cya COVID-19.

Ku wa Gatatu tariki ya 19 Gicurasi 2021, Ishyirahamwe Nyarwanda rw’Umukino wa Volleyball (FRVB), ryatangaje ko amakipe 25 arimo 11 y’abagore na 14 y’abagabo, ariyo amaze kwiyandikisha kugira ngo azaryitabire.

Mu makipe 14 yiyandikishije mu bagabo harimo ayo mu Rwanda (2), Autriche (3), Repubulika ya Tchèque (2), Misiri (1), u Butaliyani (1), Slovenia (2), Denmark (1), u Bugereki (1) na Norvège (1).

Mu bagore, amakipe 11 amaze kwiyandikisha arimo ayo mu Rwanda (2), Autriche (2), u Buholandi (1), Slovenia (2), u Busuwisi (2), Ukraine (1) na Ecosse (1).

FRVB yatangaje ko kandi andi makipe ashobora kwiyongeramo, azabikora bitarenze iminsi 30 mbere y’uko irushanwa ritangira, ni ukuvuga tariki ya 13 Kamena 2021.

Muri Kanama 2019, u Rwanda rwari rwakiriye irushanwa nk’iri, ariko ryo ryari ku rwego rwa mbere. Aya marushanwa arutanwa mu rwego hagendewe ku bihembo, aho iririmo ibyisumbuyeho ari ryo riba riri mu cyiciro gikuru.

Muri iryo rushanwa ryabereye i Rubavu mu myaka ibiri ishize, aba mbere bahawe $1000, ikipe ya kabiri ihabwa $700, iya gatatu $500 mu gihe iya kane yahembwe ibihumbi $400 haba mu bagabo ndetse no mu bagore.

Amakipe 25 yamaze kwiyandikisha mu irushanwa rya Beach Volleyball ryo ku rwego rw'Isi rizabera i Rubavu muri Nyakanga uyu mwaka
Amarushanwa nk'aya, mu Rwanda abera ku mucanga wo ku kiyaga cya Kivu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .