00:00:00 IGIHE NETWORK KN KINYARWANDA EN ENGLISH FR FRANCAIS

Amakipe y’Icyiciro cya Mbere muri Volleyball agiye kwitabira irushanwa rigamije gushimira abasora neza

Yanditswe na Eric Tony Ukurikiyimfura
Kuya 14 Ugushyingo 2021 saa 11:03
Yasuwe :
0 0

Ku bufatanye n’Ikigo cy’Igihugu gishinzwe Imisoro n’Amahoro (RRA), Ishyirahamwe Nyarwanda ry’Umukino wa Volleyball (FRVB) ryateguye irushanwa rizahuza amakipe y’Icyiciro cya Mbere mu bagabo n’abagore hagamijwe gushimira abasora neza.

Iri rushanwa ryateguwe mu kwezi ko gushimira abasora, rizaba hagati ya tariki 26 n’iya 28 Ugushyingo 2021.

Mu kiganiro n’abanyamakuru cyabaye kuri iki Cyumweru, Komiseri wungirije ushinzwe Abasora muri Rwanda Revenue Authority, Uwitonze Jean Paulin, yavuze ko umusoro utangwa n’Abanyarwanda ari ingenzi mu kubaka igihugu, akaba ariyo mpamvu bateguye irushanwa rigamije gushimira abasora neza.

Ati “Ingengo y’imari y’igihugu iterwa inkunga cyane n’umusoro, aho agera hafi kuri 50% ava mu misoro itangwa n’Abanyarwanda bose, ni yo mpamvu kubashimira ari ikintu cy’ingenzi. Ni nayo mpamvu twashyizeho irushanwa rya Volleyball ryabitiriwe, ryahariwe abasora beza.”

Yakomeje avuga ko impamvu bahisemo umukino wa Volleyball ari uko ari wo ukunzwe n’Abanyarwanda benshi muri iyi minsi ku buryo bizorohera Abanyarwanda kumenya abasora beza babafasha kubaka igihugu cyiza cyifuzwa.

Ati “Twumva ko imikino yose igomba gutera imbere, ariko kandi Abanyarwanda bagiye bagaragaza urukundo rwa Volleyball mu minsi ishize ku buryo tubona ko n’ahantu heza abasora bagaragarira kandi abasora ni abanyacyubahiro, ni abantu b’agaciro cyane ku buryo twumva ko bagomba kujya mu mukino Abanyarwanda bari kugenda bagaragariza urukundo cyane.”

“Mu gihe cy’imikino muzajya mukurikira abasora beza bahembwe mubamenye kuko Abanyarwanda benshi bari gukurikira Volleyball uyu munsi, bizabafasha kubayoboka kuko bazamenya ko bakoresha inyemezabwishyu ya EBM, ko ari bo badufasha kubaka igihugu cyiza twifuza.”

Ku wa Gatanu, tariki ya 19 Ugushyingo 2021, ni bwo hazahembwa abasora neza ku rwego rw’Igihugu mu byiciro bitandukanye.

Visi Perezida wa Mbere w’Ishyirahamwe Nyarwanda rya Volleyball (FRVB), Nsabimana Eric ‘Machine’, yavuze ko bateganya ko iri rushanwa rizajya riba buri mwaka.

Ati “Ni irushanwa twateguye twifuza ko rizajya riba buri mwaka kandi rikaba muri uku kwezi kuko ari ukwezi kw’abasora, aho hashimirwa abasora neza bose bo mu gihugu. Rizaba ari irushanwa rifunguye ku makipe yose.”

Yakomeje avuga ko abafana bazaba bemerewe kwitabira imikino ari 50% nk’uko amabwiriza yo kwirinda COVID-19 abivuga, ndetse bakaba bagomba kuba bipimishije.

Umunyamabanga wa FRVB, Mucyo Philbert, yavuze ko amakipe azitabira iri rushanwa ari ayo mu Cyiciro cya Mbere mu bagabo n’abagore azamenyekana mbere ya tariki ya 19 Ugushyingo 2021.

Ati “Amakipe agomba gukina iri rushanwa ni ayo mu Cyiciro cya Mbere ntabwo ari ayo mu cya Kabiri. Mu bagabo, amakipe yose yari mu Cyiciro cya Mbere ubushize nta n’imwe iravamo, haziyongeraho ikipe ya Musanze ndetse na KVC. Mu bagore, zose zizitabira, haziyongeraho na St Aloys, ariko itariki ntarengwa yo kwemeza kwitabira ni 19 Ugushyingo.”

Umukinnyi azaba yemerewe gukinira ikipe iyo ari yo yose yamwandikisha muri iri rushanwa kuko nta byangombwa by’umwaka mushya w’imikino biratangwa.

Biteganyijwe ko ikipe izatwara irushanwa izahabwa miliyoni 2 Frw, iya kabiri miliyoni 1,5 Frw naho iya gatatu ihabwe miliyoni 1 Frw mu gihe kandi hazahembwa abakinnyi bitwaye neza mu byiciro byose.

Hateganywa ko mu mikino y’ibanze y’iri rushanwa hakwifashishwa ibibuga bya Petit Stade na Maison des Jeunes naho iya nyuma ikaba yazabera muri Kigali Arena mu gihe byaba byemejwe.

Ikigo cy’Igihugu gishinzwe Imisoro n’Amahoro (RRA) cyateganyije agera kuri miliyoni 25 Frw azakoreshwa muri iri rushanwa, kikazafatanya na FRVB mu mitegurire yaryo.

Kuri iki Cyumweru ni bwo habaye ikiganiro n'abanyamakuru ku irushanwa rigamije gushimira abasora neza rizaba mu mpera z'uku kwezi
Komiseri wungirije ushinzwe Abasora muri Rwanda Revenue Authority, Uwitonze Jean Paulin, yavuze ko impamvu bahisemo Volleyball ari uko ari umukino uri gukurikirwa n'Abanyarwanda benshi
Visi Perezida wa Mbere w’Ishyirahamwe Nyarwanda rya Volleyball (FRVB), Nsabimana Eric ‘Machine’, yavuze ko irushanwa rizaba rifunguye ku makipe yose y'Icyiciro cya Mbere
Umunyamabanga wa FRVB, Mucyo Philbert, yavuze ko amakipe yose y'Icyiciro cya Mbere mu bagabo n'abagore yitezwe muri iri rushanwa
Abayobozi ba FRVB bifotozanya na Komiseri wungirije ushinzwe abasora muri RRA, Uwitonze Jean Paulin

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .