00:00:00 IGIHE NETWORK KN KINYARWANDA EN ENGLISH FR FRANCAIS

Yankurije yasoje mu ba nyuma mu gusiganwa metero 5000 mu Mikino Olempike

Yanditswe na Eric Tony Ukurikiyimfura
Kuya 30 Nyakanga 2021 saa 03:56
Yasuwe :
0 0

Yankurije Marthe yabaye umunyarwanda wa kane usezerewe mu Mikino Olempike ya Tokyo 2020 nyuma y’uko yabaye uwa 35 mu bakinnyi 36 b’abagore basiganwe metero 5000 ku maguru kuri uyu wa Gatanu, aho yakoresheje iminota 15, amasegonda 55 n’ibice 94.

Yankurije w’imyaka 27, yari mu itsinda rya kabiri ryari rigizwe n’abakinnyi 19 muri 38 basiganwe muri metero 5000 mu cyiciro cy’abagore. Batanu ba mbere muri buri tsinda ni bo bakomeje mu cyiciro cya nyuma.

Yasoje isiganwa ari ku mwanya wa 17 (uwa nyuma) mu itsinda rye, akoresheje iminota 15, amasegonda 55 n’ibice 94. Umunya-Slovenia Lukan Klara ntiyasoje isiganwa mu gihe Umurundikazi Niyonsaba Francine yarikuwemo kubera amakosa yakoze.

Ku rutonde rusange rw’amatsinda yombi, Yankurije Marthe yabaye uwa 35 mu bakinnyi 36, akurikiwe n’Umunya-Uganda Chelangat Sarah wakoresheje iminota 15, amasegonda 59 n’ibice 40.

Nubwo aba bakinnyi bombi bo muri Afurika y’Iburasirazuba basoreje mu myanya ibiri ya nyuma, bakoresheje ibihe byiza ku giti cyabo.

Yankurije yabaye Umunyarwanda wa kane usezerewe mu Mikino Olempike ya Tokyo 2020 nyuma ya Mugisha Moïse utarasoje isiganwa ry’amagare ku wa Gatandatu, Agahozo Alphonsine na Maniraguha Eloi baviriyemo mu ijonjora rya mbere ryo koga metero 50 ibizwi nko gukura umusomyo.

Umukinnyi umwe rukumbi usigaye uhagarariye u Rwanda mu Mikino Olempike ya Tokyo 2020 ni Hakizimana John uzasiganwa Marathon tariki ya 8 Kanama 2021.

Kuva u Rwanda rutangiye kwitabira Imikino Olempike mu 1984, nta mudali uwo ari wo wose rurabona.

Yankurije Marthe yasoje ari uwa nyuma mu itsinda 2 ryo gusiganwa metero 5000 mu bagore
Yankurije wakoresheje ibihe byiza ku giti cye, yabimburiye Umunya-Uganda wa nyuma ku rutonde rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .