00:00:00 IGIHE NETWORK KN KINYARWANDA EN ENGLISH FR FRANCAIS

Umuyapanikazi agiye guhabwa undi mudali wa Zahabu nyuma y’uko uwo yatsindiye warumwe na Meya

Yanditswe na Eric Tony Ukurikiyimfura
Kuya 14 Kanama 2021 saa 02:58
Yasuwe :
0 0

Umwe mu bakinnyi b’Abayapani batsindiye umudali wa Zahabu mu Mikino Olempike ya Tokyo 2020, Miu Goto, agiye guhabwa undi nyuma y’uko Meya wa Nagoya, Takashi Kawamura, yagaragaye aruma uwari watsindiwe n’uwo mukinnyi ntibyakirwe neza n’abatari bake.

Kuruma umudali ni ifoto ikunze kugaruka kenshi ku bakinnyi begukanye intsinzi mu Mikino Olempike.

Gusa, Meya wa Nagoya, Takashi Kawamura, yavugishije benshi ubwo yarumaga umudali wegukanywe Miu Goto ukina Softball mu cyumweru gishize.

Mu muhango werekanwaga kuri televiziyo, Takashi Kawamura yagaragaye akuramo agapfukamunwa, aruma uwo mudali, ibintu benshi banenze bavuga ko nta suku irimo ndetse bikaba byarakozwe mu gihe ubwandu bwa COVID-19 bukomeje kwiyongera mu Buyapani.

Umwe mu bayobozi bo mu Mujyi wa Nagoya, yatangarije CNN ko bakiriye ubusabe busaga 8000 bugaragaza ko butishimiye imyitwarire ya Kawamura. Yongeyeho ko bwinshi muri ubwo butumwa bwasabaga uwo muyobozi kwegura.

Mu itangazo bashyize hanze ku wa Kane, abateguye Imikino ya Tokyo 2020 bavuze ko bazaha Goto umudali wo gusimbura uwo yari yarahawe nk’uko byatangajwe n’Ibiro Ntaramakuru by’Abongereza, Reuters.

Bagize bati “Ku bufasha bwa Komite Olempike Mpuzamahanga ndetse bijyanye n’ubushake bw’umukinnyi, umudali wa Goto uzasimbuzwa umushya.”

Mu kiganiro n’abanyamakuru cyabaye ku wa Kane, Kawamura, yasabye imbabazi ko yangije agaciro k’uyu mudali wa Zahabu ndetse yasabye ko yakwishyura uzawusimbura mu mafaranga ye bwite. Yongeye ko yandikiye Goto n’Ishyirahamwe rya Softball mu Buyapani asaba imbabazi.

Ikipe y’u Buyapani ya Softball yakinagamo Goto mu Mikino Olempike, yatwaye umudali wa Zahabu itsinze Leta Zunze Ubumwe za Amerika amanota 2-0 ku wa 27 Nyakanga 2021.

Kuva i Tokyo hatangiye kubera Imikino Olempike ya 2020 ku wa 23 Nyakanga, ubwandu bwinshi bwa COVID-19 bwari kuri 1128 mu gihe yasojwe ku wa 4 Kanama bugeze kuri 5042.

Kuri ubu, u Buyapani bumaze kugeza abarwayi ba COVID-19 basaga miliyoni imwe mu gihe abishwe n’iki cyorezo basaga ibihumbi 15 nk’uko bigaragazwa n’imibare ya Kaminuza ya Johns Hopkins.

Meya wa Nagoya, Takashi Kawamura, yasabye imbabazi nyuma yo gushyira umudali wa Goto mu kanwa
Miu Goto agiye guhabwa undi mudali wa Zahabu usimbura uwo yahawe mu Mikino Olempike ya Tokyo 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .