00:00:00 IGIHE NETWORK KN KINYARWANDA EN ENGLISH FR FRANCAIS

Tokyo: Hakizimana ntiyahiriwe muri Marathon, Kipchoge yisubiza umudali wa Zahabu

Yanditswe na Eric Tony Ukurikiyimfura
Kuya 8 Kanama 2021 saa 07:58
Yasuwe :
0 0

Umunyarwanda Hakizimana John ntiyasoje isiganwa rya Marathon ryabaye kuri iki Cyumweru mu Mikino Olempike ya Tokyo 2020 mu gihe Umunya-Kenya Eliud Kipchoge yisubije umudali wa Zahabu akoresheje amasaha abiri, iminota umunani n’amasegonda 38.

Hakizimana John ni we Munyarwanda wari usigaye ategerejweho umudali mu Mikino Olempike ya Tokyo nyuma y’uko abandi bakinnyi bane bajyanye mu Buyapani, batabigezeho nk’uko byagenze no ku bandi Banyarwanda kuva mu 1984.

Gusa, na we ntiyahiriwe kuko atasoje iri siganwa ry’ibilometero 42 mu muhanda nubwo yari mu gikundi kiyoboye mu bilometero 10 bya mbere.

Umunya-Kenya Eliud Kipchoge ni we wegukanye umudali wa Zahabu ku nshuro ya kabiri yikurikiranya, aho yakoresheje amasaha abiri, iminota umunani n’amasegonda 38, aba umukinnyi wa mbere ubikoze muri Marathon y’Imikino Olempike kuva mu 1980.

Kipchoge w’imyaka 36, yabaye kandi umuntu wa gatatu utwaye umudali Zahabu muri Marathon mu mateka y’Imikino Olempike.

Umudali wa Feza wegukanywe n’Umuholandi Abdi Nageeye wasizwe amasegonda 20 na Kipchoge mu gihe Umubiligi Bashir Abdi yabaye uwa gatatu ahigitse Umunya-Kenya Lawrence Cherono.

Uyu mudali ni uwa kane Kipchoge yegukanye mu Mikino Olempike.

Ku wa Gatanu, Kenya yari yegukanye umudali wa Zahabu muri Marathon y’abagore yatsinzwe na Peres Jepchirchir.

Marathon y'abagabo yakinwe mu rukerera rwo kuri iki Cyumweru
Hakizimana John ni we Munyarwanda wasiganwe muri Marathon, akaba ari na we wa nyuma wari usigaje guhatana
Nubwo mu bilometero bya mbere yagendaga mu gikundi kiyoboye, Hakizimana John ntiyasoje isiganwa
Umunya-Kenya Eliud Kipchoge ni we watsinze iyi Marathon
Eliud Kipchoge yabaye umukinnyi wa mbere wisubije umudali wa Zahabu wa Marathon mu Mikino Olempike kuva mu 1980
Abdi Nageeye, Eliud Kipchoge na Bashir Abdi baje muri batatu ba mbere muri Marathon

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .