00:00:00 IGIHE NETWORK KN KINYARWANDA EN ENGLISH FR FRANCAIS

Tokyo: Beleniuk ufite inkomoko mu Rwanda yabaye Umunya-Ukraine wa mbere wegukanye umudali wa Zahabu

Yanditswe na Eric Tony Ukurikiyimfura
Kuya 6 Kanama 2021 saa 11:18
Yasuwe :
0 0

Zhan Beleniuk ufite inkomoko mu Rwanda yabaye Umunya-Ukraine wa mbere wegukanye umudali wa Zahabu mu Mikino Olempike ya Tokyo 2020, aho yatsinze Umunya-Hongrie Viktor Lorincz mu batarengeje ibilo 87 mu mukino wo gukirana baturana hasi [Wrestling].

Muri uyu mukino wabaye ku wa Gatatu, Zhan Beleniuk yatsinze Viktor Lorincz amanota 5-1 mu gukirana mu bwoko bwa Greco-Roman, yegukana umudali wa kabiri akina Imikino Olempike.

Umudali wa mbere yatwaye wari uwa Feza yakuye mu Mikino Olempike y’i Rio de Janeiro mu 2016.

Nyuma yo kwegukana umudali wa Zahabu, Beleniuk yagize ati “Ubu ndi uwatsinze mu Mikino Olempike kandi ni byo byari inzozi zanjye.”

Zhan Beleniuk asanzwe ari umunyapolitiki ukina umukino wo gukirana [Wresltling] ari na wo wamuhesheje umudali Olempike.

Yabaye umwirabura wa mbere wabashije kuba umudepite muri Ukraine muri Nyakanga 2019, aho ashinzwe Urubyiruko na Siporo mu Nteko Ishinga Amategeko y’icyo gihugu.

Beleniuk yavukiye i Kyiv, nyina ni Umunya-Ukraine mu gihe se, Ndagijimana Vincent, yari Umunyarwanda wari umupilote wize i Kyiv muri Kaminuza yigisha ibijyanye no gutwara indege ariko akaba yarapfuye mu 2001.

Mbere yo kwitabira Imikino Olempike ya Tokyo, Beleniuk watangiye gukirana afite imyaka icyenda, yavuze ako agiye kubikora umwaka umwe, ubundi akiyegurira politiki 100%.

Imwe mu midali Zhan Beleniuk yegukanye :

  • 2010 : Yegukanye umudari wa Feza mu marushanwa y’Isi y’abakiri bato.
  • 2011: Yabaye umukinnyi wa mbere i Burayi ndetse anegukana umudari wa Bronze mu irushanwa ry’Isi muri iki cyiciro.
  • 2012 : Yegukanye umudari w’Umuringa mu bafite ibilo 84 mu marushanwa y’i Burayi.
  • 2013 : Yegukanye umudari w’Umuringa mu irushanwa rya Universiade.
  • 2014: Yatwaye umudari wa Zahabu mu bafite ibilo 85 ku mugabane w’i Burayi, anegukana uw’Umuringa muri Shampiyona y’Isi.
  • 2015: Yatwaye umudari wa Feza mu mikino y’i Burayi.
  • 2016: Yatwaye umudari wa Zahabu muri Shampiyona y’u Burayi.
  • 2016: Yegukanye umudali wa Feza mu Mikino Olempike ya Rio 2016.
  • 2021: Yegukanye umudali wa Zahabu mu Mikino Olempike ya Tokyo 2020
Zhan Beleniuk (iburyo) ahanganye na Viktor Lorincz wo muri Hongrie
Beleniuk yatsinze Lorinc mu gukirana mu buryo greco-roman mu bafite ibilo 87
Zhan Beleniuk ufite inkomoko mu Rwanda yishimira intsinzi nyuma yo kwegukana umudali wa Zahabu i Tokyo
Beleniuk yifotozanya umudali wa Zahabu yegukanye ku wa Gatatu
Viktor Lorincz (ubanza ibumoso ufite umudali wa Feza), Zhan Beleniuk (ufite Zahabu), Umudage Denis Maksymilian Kudla na Zurabi Datunashvili wo muri Serbia (bombi bafite Umuringa) bifotozanya imidali begukanye mu gukirana mu bafite ibilo 87

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .