00:00:00 IGIHE NETWORK KN KINYARWANDA EN ENGLISH FR FRANCAIS

Jacobs yakuye Usain Bolt ku ntebe mu gusiganwa metero 100, Zverev ahiga abandi muri Tennis (Amafoto)

Yanditswe na Eric Tony Ukurikiyimfura
Kuya 1 Kanama 2021 saa 06:43
Yasuwe :
0 0

Umutaliyani Lamont Marcell Jacobs yegukanye umudali wa Zahabu mu gusiganwa metero 100 mu Mikino Olempike ya Tokyo 2020, ashyira iherezo ku myaka 13 yari yihariwe n’Umunya-Jamaica Usain Bolt wawutwaye inshuro eshatu zikurikiranya kuva mu 2008.

Jacobs wahoze asiganwa ku maguru intera ndende kugeza mu 2018, yegukanye uyu mudali wa Zahabu muri metero 100, akoresheje amasegonda 9,80, arusha Umunyamerika Fred Kerley 0,04.

Umunya-Canada Andre de Grasse yegukanye umudali w’Umuringa nyuma yo kuba uwa gatatu ku nshuro ya kabiri yikurikiranya mu Mikino Olempike.

Christian Coleman wegukanye Shampiyona y’Isi iheruka na Trayvon Bromell ufite ibihe bito kurusha abandi ku Isi mu 2021, ntabwo bakinnye iri siganwa rya nyuma.

Coleman yahagaritswe nyuma yo kutitabira ipimwa ry’imiti itemewe inshuro eshatu mu gihe Bromell yaviriyemo muri ½.

Undi utagaragaye uyu mwaka ni Usain Bolt wasezeye ariko akaba yari amaze imyaka 13 ayoboye kuko yegukanye umudali wa Zahabu i Beijing mu 2008, i Londres mu 2012 n’i Rio mu 2016.

Jacobs waherukaga gukoresha amasegonda ari munsi ya 10 muri Gicurasi, yasize abandi muri metero 50 za nyuma, akoresha ibihe bito ugereranyije n’ibyo Bolt yatsindiyeho i Rio mu 2016.

Kugeza ubu Usain Bolt ni we umaze gukoresha ibihe bito mu gusiganwa metero ijana mu Mikino Olempike, aho yakoresheje amasegonda icyenda n’ibice 63 mu yabereye i Londres mu 2012.

Nyuma y’isiganwa, Jacobs yagize ati “Ntabwo mbizi, ni inzozi, birashimishije cyane. Birashoboka ko ejo nasobanukirwa ibyo bari kuvuga, ariko uyu munsi ntusanzwe.”

Kerley wabaye uwa kabiri, yavuze ko izina Jacobs ari rishya kuri we. Ati “Mu by’ukuri nta kintu nari muzi ho. Inshuro ya mbere narushanyijwe na we ni muri Diamond League y’i Monaco [aho Jacobs yabaye uwa gatatu akoresheje amasegonda 9,99].”

Umwongereza Zharnel Hughes ntiyasiganwe muri iki cyiciro cya nyuma kuko yasezerewe nyuma yo guhaguruka mbere nk’uko byigeze kugendera Linfold Christie mu Mikino ya Atlanta yabaye mu 1996.

Zverev yegukanye umudali wa Zahabu muri Tennis

Nimero ya gatanu ku Isi muri Tennis, Umudage Alexander Zverev, yegukanye umudali wa Zahabu mu bakina ari umwe, atsinze Umurusiya Karen Khachanov ku mukino wa nyuma.

Uyu mugabo w’imyaka 24 wasezereye Novak Djokovic muri ½ , yabaye Umudage wa mbere utwaye umudali wa Zahabu mu Mikino Olempike muri Tennis y’abakina ari umwe, atsinze 6-3 na 6-1 mu mukino wamaze iminota 79.

Mu bagore, umudali wa Zahabu wegukanywe n’Umusuwisikazi Belinda Bencic ku wa Gatandatu, gusa ntiyahiriwe mu bakina ari babiri kuko we na Viktorija Golubic batsinzwe 7-5 6-1 n’Abanya-Repubulika ya Tchèque, Barbora Krejcikova na Katerina Siniakova.

Nyuma y’iminsi icyenda imaze gukinwa i Tokyo, u Bushinwa buyoboye n’imidali 23 ya Zahabu (50 muri rusange), bukurikiwe na Leta Zunze Ubumwe za Amerika zifite imidali 20 ya Zahabu (59 muri rusange) mu gihe u Buyapani bufite 17 ya Zahabu (31 muri rusange).

Afurika y’Epfo (zahabu imwe, itatu muri rusange), Tunisia (zahabu imwe, ibiri muri rusange), Uganda (ibiri), Ghana (umwe) na Côte d’Ivoire (umwe), ni byo bihugu bya Afurika bimaze kubona byibuze umudali i Tokyo.

Hughes yasezerewe nyuma yo guhaguruka mbere y'abandi
Zharnel Hughes nyuma yo gukurwa mu isiganwa
Lamont Marcell Jacobs agera ku murongo
Ifoto igaragaza uko abakinnyi basoje
Lamont Marcell Jacobs yegukanye umudali wa Zahabu nyuma y'inshuro eshatu utwarwa na Usain Bolt
Abakinnyi batatu ba mbere begukanye imidali muri metero 100

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .