IGIHE.com > Imikino
Nta munyeshuri wo muri “Lycee de Rusumo” udafite umukino akina

Nta munyeshuri wo muri “Lycee de Rusumo” udafite umukino akina


Yanditswe kuya 8-06-2012 - Saa 10:01' na Richard IRAKOZE

Kuba abanyeshuri biga mu Ishuri Ryisumbuye rya Rusumo (Lycee de Rusumo) batsinda bose 100% biterwa ni uko ubuyobozi bw’iri shuri bwahaye siporo umwanya w’ibanze ku banyeshuri baryigamo, kuburyo ndetse ubu nta munyeshuri n’umwe udafite umukino akina.

Padiri Anicet Ndazigaruye, Umuyobozi w’iri shuri ryigenga rya Kiliziya Gatolika riherereye mu Karere ka Kirehe, Intara y’i Burasirazuba, aganira na IGIHE yavuze ko nta munyeshuri wiga muri iri shuri udafite umukino abarizwamo. Akavuga ko ibi byatumye abanyeshuri barushaho kwitwara neza mu myifatire (discipline) kandi banarushaho gutsinda.

Padiri Anicet Ndazigaruye yagize ati :”Muri uyu mwaka twabishyizemo imbaraga. Twashakaga ko buri munyeshuri abasha kwidagadura kuko ari yo nzira ituma atsinda neza. Kandi n’imibanire irushaho kuba myiza. Twebwe tubona siporo mbere na mbere ari uburyo bwo kuruhuka mu mutwe, igafasha umwana bigatuma atsinda mu masomo yose yize.”

Ibi bishimangirwa na Nyandwi Jean Claude, w’imyaka 20, umunyeshuri mu mwaka wa Kane E.F.K. ukina mu ikipe y’amaguru y’ikigo agira ati :”Iyo mvuye gukina numva nta bindi bimbangamiye ku ruhande, ngahita mfata amasomo.”

Abakinnyi b'Ikipe ya rusubo bakina Football/Foto:Irakoze R.

Ibi byemezwa kandi na Ndayisenga Sareh, w’imyaka 15, ukinira ikipe y’igihugu y’amaguru y’abatarengeje imyaka 17 (U17) wagize uti :”Ujya mu ishuri waruhutse wumva umeze neza.”

Nyiramahoro Adeline, w’imyaka 17 umunyeshuri mu mwaka wa Gatanu M.E.G., utoza bagenzi be kubyina (kubyina-umwe mu mikino n’imyidagaduro yemewe muri iki kigo) yunga murya bangenzi be agira ati :”Ni nka Siporo, biranduhura mu bwonko bikamfasha gufata neza.”

Iri shuri rifite abanyeshuri babiri (Amos Nsabimana na Sareh Ndayisenga) batoranyijwe gukina mu Ikipe y’Igihugu y’umupira w’amaguru (football) y’abatarengeje imyaka 17 ryatwaye ibikombe bitatu mu mikino ya football, basketball, na handball ku rwego rw’Akarere ka Kirehe, nk’uko Ntirenganya Jean de Dieu, umutoza w’ikipe y’amaguru abihamya.

Uyu mutoza anavuga ko ikipe atoza y’umupira w’amaguru n’iya basketball zo zikiri kurushanwa ku rwego rw’Intara, ndetse zifuza kugera ku rwego rw’Igihugu.

Kugira ngo bigerweho, Padiri Ndazigaruye avuga ko bubatse ibibuga, bagakomeza n’amakipe yabo, bakayatoza neza kuva umwaka utangiye, kuburyo buri mu kino ugira umutoza wawo.

Avuga kandi ko ibi byatumye bagera no ku ntego Kiliziya Gatolika yahaye ibigo by’amashuri uyu mwaka wa 2012 igira iti :”Duharanire uburere bunoze, dutere imbere tube indashyikirwa kandi tube intumwa z’ubutabera n’amahoro muri bagenzi bacu.”

Padiri Ndazigaruye yagize ati :”Siporo n’imyidagaduro byadufashije kugera kuri iyi nsanganyamatsiko kuko nyuma y’inshingano z’amashuri ari zo kwiga no kugira ikinyabupfura n’izindi ; ni na ngombwa ko abarezi bita ku byafasha abanyeshuri kwidagadura kugira ngo baruhuke mu mutwe, ubundi bige neza, batsinde”.

Padiri Anicet Ndazigaruye/Foto:Irakoze R.

Ishuri rya Lycee de Rusumo ryashinzwe mu 1999, rishingwa na Padiri Nkurunziza Jean Léonard afatanije n’abafatanyabikorwa banyuranye. Ubu riyobowe na Padiri Ndazigaruye Anicet. Ni ishuri ryigenga rya Diyoseze ya Kibungo muri Paruwasi ya Rusumo. Riherereye mu Ntara y’I Burasirazuba, Akarere ka Kirehe, Umurenge wa Nyamugari.

Ryashinzwe kugira ngo rifashe abanyeshuri babaga mu Karere ka Kirehe kuko amashuri yisumbuye yari make. Padiri Ndazigaruye agira ati :”Ryashinzwe mu rwego rwo guteza imbere uburezi mu Karere ka Kirehe.”

Rifite amashami atatu H.E.G., M.E.G. na E.F.K. yigwamo n’abanyeshuri barenga 800, abahungu n’abakobwa.

Rifite Imikino ya Karate (ku bahungu n’abakobwa), football, Handball, Athletism, Basketball na Rugby iri gutangizwa. Rinafite kandi indi mikino y’imyidagaduro y’Itorero ryitwa Indatwa za Lycee de Rusumo ryigisha kubyina rigakora ibitaramo Nyarwanda buri wa Gatanu mu kigo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO