Paralempike: Ikipe y’u Rwanda ishobora gusezererwa amara masa

Yanditswe na Ishimwe Israel
Kuya 15 Nzeri 2016 saa 01:28
Yasuwe :
0 0

Ikipe y’Igihugu ya Sitting Volleyball yari yitabiriye imikino Paralempike 2016 i Rio de Janeiro muri Brazil yatakaje umukino wa gatatu wikurikiranya itsinzwe na Leta Zunze Ubumwe za Amerika amaseti atatu ku busa.

Nyuma yo gutakaza imikino ibiri ya mbere, ikipe y’Igihugu yakinnye n’u Bushinwa na Iran, kuri uyu wa Gatatu yongeye gutsindwa na Leta Zunze Ubumwe za Amerika amaseti atatu ku busa.

Uyu mukino wihariwe cyane na Leta Zunze Ubumwe za Amerika, agace ka mbere karangiye iri imbere ku manota 25-10, aka kabiri biba 25-8 naho aka gatatu u Rwanda rutsindwa ku manota 25- 3.

Nyuma y’umukino, Umutoza w’ikipe y’Igihugu, Jean Marie Nsengiyumva yatangaje ko abakinnyi be bari ku rwego rwo hasi ariko hari ibigomba gukosorwa ndetse hari isomo byabasigiye.

Yagize ati “Nk’uko nabivuze ubushize ikipe yacu iracyari nto, ubunararibonye ni buke ugereranyije n’Abanyamerika twakinaga. Ikindi noneho byagaragaye ko urwego rw’imikinire rwabo ruri hejuru cyane y’urwacu.”

Yakomeje agira ati “Ni ikipe ikomeye kandi no mu gihagararo abakinnyi babo baruta cyane abacu. Uyu wari umukino wa gatatu nkeka ko wagaragaje ko abakobwa bacu hari ikintu barimo kwiga.”

Ikipe ihagarariye u Rwanda mu mikino Paralempike muri Sitting Volleyball yahawe ibendera ry’Igihugu na Minisitiri wa Siporo n’ Umuco, Uwacu Julienne abasaba kuzagihagararira neza, batsinzwe imikino itatu yose mu matsinda.

Ku munsi w’ejo, Minisitiri Uwacu yoherereje aba bakinnyi ubutumwa ababwira ko impamvu zo gutsindwa zitangwa n’abahagararira amakipe y’igihugu mu marushanwa Mpuzamahanga zimaze kurambirana.

Ati " Inkuru yo gutsindwa imaze kuba ndende none musigaye mushaka iteka igisobanura impamvu yo gutsindwa. Ntabwo amarushanwa tujyamo tugenda twiteguye guhura n’amakipe yoroshye, niyo mpamvu tugomba gukora cyane aho guhora iteka dushakisha impamvu n’ibisobanuro byo gutsindwa, duhindure dushake ibituma dutsinda."

U Rwanda ruracakirana na Canada mu mukino wa nyuma wo guhatanira umwanya wa karindwi ku rutonde rusange, kuri uyu wa Kane saa saba n’igice zo muri Brazil arizo saa kumi n’ebyiri n’igice zo mu Rwanda.

Kuri uyu mukino, Umutoza w’Ikipe y’Igihugu yavuze ko babanza gufata umwanya bakareba amashusho y’imikino Canada yakinnye kugira ngo bige uburyo bakitwara neza bakayitsinda ntibabe aba nyuma mu irushanwa.

Amakipe ane yageze muri ½ ni Ukraine igomba guhura n’u Bushinwa na Brazil igomba guhura na Leta Zunze Ubumwe za Amerika mu gihe Iran n’u Buholandi ziza guhatanira umwanya wa gatanu.

Ikipe y'u Rwanda ikora imyitozo mbere yo gucakirana na Leta Zunze Ubumwe za Ammerika
Amakipe yombi aririmba indirimbo zubahiriza ibihugu mbere y'umukino
U Rwanda rwatsinzwe na Leta Zunze Ubumwe za Amerika amaseti atatu ku busa

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza