Nyirarukundo Salome yegukanye umudali wa Zahabu muri Maroc, nyuma y’urugendo rusharira

Yanditswe na Manzi Rema Jules
Kuya 2 Mata 2017 saa 02:27
Yasuwe :
0 0

Umunyarwandakazi Nyirarukundo Salome ukina umukino wo gusiganwa ku maguru yegukanye umudali wa Zahabu mu irushanwa ngarukamwaka ribera muri Maroc (Semi-Marathon International de Berkane-SMIB) ahigitse abandi bakobwa baturutse mu bihugu bitandukanye byo muri Afurika bari bahanganye.

Nyirarukundo yitabiriye iri siganwa rya kilometero 21 (Half Marathon), ryabaye mu gitondo cyo kuri iki Cyumweru, tariki ya 2 Mata 2017 ku butumire yahawe n’Ishyirahamwe ry’Umukino wo Kwiruka muri Maroc.

Yabaye uwa mbere akoresheje isaha imwe n’iminota 11, akurikirwa n’umunya-Ethiopia ndetse n’abanya-Kenya batatu.

Mu kiganiro yagiranye na IGIHE yatangaje ko yishimiye kuba yabaye uwa mbere kuko ngo birushaho kumuha icyizere cyo gukomeza kwitwara neza.

Ati “Ndashima Imana kuri iyi ntsinzi mbonye iranshimishije cyane ndetse yatumye ndushaho kwigirira icyizere.”

Nyirarukundo Salome wari umaze iminsi mu myitozo muri Kenya aho yavuye yerekeza muri Maroc yagowe no kubona ibyangombwa by’inzira ndetse atangira no kwiheba ko atagikinnye.

Ati “ Nageze ku kibuga cy’indege muri Maroc abapolisi barampagarika kuko nta visa nari mfite. Nahamaze amasaha 10 nicaye bigera aho ntangira kwiheba ko ntagikinnye kuko numvaga naniwe cyane.”

Yakomeje agira ati “Abayobozi b’Ishyirahamwe ryo muri Maroc (ari naryo ryamutumiye) baramfashije mbona ibyangombwa , mpita njya kuri hoteli. Nahageze saa yine z’ijoro ndaruhuka nitegura irushanwa. Uko nari meze byari kwizeza umuntu ko nakwitwara neza ariko kuko nzi icyo nshaka nagerageje ngera ku cyo nifuzaga.”

Uyu mukobwa kuri ubu ufite abajyanama bashya atangaza ko muri uyu mwaka ashaka kwigaragaza cyane ku ruhando mpuzamahanga.

Nyirarukundo wamaze kubona itike yo kuzitabira Shampiyona y’Isi izabera mu Bwongereza muri Kanama uyu mwaka akomeje imyitozo akorera mu bice bitandukanye. Biteganyijwe ko kuya 26 Mata azitabira isiganwa rizabera mu Buholandi.

Nyirarukundo Salome yegukanye umudali wa Zahabu muri Maroc, nyuma y’urugendo rusharira
Nyirarukundo Salome yirengagije urugendo rurerure yakoze bituma yitwara neza
Nyirarukundo Salome (iburyo) yafashe ifoto y'urwibutso na bagenzi be nyuma yo kwanikira abo bari bahanganye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244