Nyirarukundo Salome wavunikiye muri Shampiyona y’Isi, yagarutse mu muhanda yegukana umudali wa zahabu

Yanditswe na Manzi Rema Jules
Kuya 27 Ugushyingo 2017 saa 09:27
Yasuwe :
0 0

Nyirarukundo Salome wari umaze amazi asaga atatu atitabira amarushanwa nyuma yo kuvunikira muri Shampiyona y’Isi muri Kanama uyu mwaka, yagarutse mu muhanda kuri iki Cyumweru mu isiganwa rya “Kigali Run Blue” rigamije kurwanya diabète.

Uyu mukobwa w’imyaka 20, yaherukaga gusiganwa muri Kanama ubwo yitabiraga Shampiyona y’Isi yo gusiganwa ku maguru yabereye mu Bwongereza agasoza ari uwa 25 mu kwiruka ibirometero 10 ariko ahakura imvune yatumye amara hafi amezi atatu atongeye kwitabira amarushanwa.

Kuri iki Cyumweru yagaragaye mu isiganwa rya “Kigali Run Blue” riteguwe ku nshuro ya mbere mu Rwanda rigamije gushishikariza abantu kwirinda no kurwanya indwara itandura ya diabète maze yanikira bagenzi be b’abakobwa mu kwiruka n’amaguru ku ntera y’ibirometero 21 na metero 95.

Abasiganwa bahagurukiraga kuri Stade Amahoro bakanyura kuri RDB – bakagera mu Kabuga ka Nyarutarama bazenguruka Umudugudu wa Gacuriro, bakagaruka kuri RDB banyuze ku Umubano bagasubira kuri Stade Amahoro , bakayizenguruka banyuze kuri Kaminuza y’u Rwanda Koleji y’Uburezi yahoze yitwa “KIE”, bakagaruka kuri Contrôle Technique, bagasoreza muri Stade Amahoro.

Iyi nzira, Nyirarukundo Salome yayisoje akoresheje 1h14’22”, akurikirwa na Iranzi Celine umaze igihe yitoreza mu Butaliyani wakoresheje 1h20’17” naho Yankurije Martha aza ku mwanya wa gatatu akoresheje 1h23’22”.

Nyuma yo gutsinda, Nyirarukundo yabwiye IGIHE ko iri siganwa rimugaruriye icyizere nyuma y’igihe kinini yari amaze adakina bikaba bizanamufasha gukomeza kwitegura andi masiganwa agomba kwitabira mu gihe kiri imbere.

Yagize ati “Iri siganwa ribaye ku nshuro ya mbere, harimo utuntu tumwe na tumwe bazagenda bakosora mu kuritegura kuko nk’uyu munsi hari aho twagiye tuyoba kuko nta bantu babaga bahari. Gusa ni isiganwa ryiza kuko rizajya rudufasha mu myiteguro.”

Yakomeje agira ati “By’umwihariko kuri njye, kuba nditsinze kandi nari maze igihe kinini ntakina ntanitoza ni byiza biranyongerera imbaraga n’icyizere. Ubu ndumva meze neza kuko mu kwezi gutaha ngiye kwitabira isiganwa ryo mu Budage, umwaka ushize nabayemo uwa gatatu ariko ubu nshaka uwa mbere Imana nimfasha.”

Mu cyiciro cy’abagabo, iri siganwa ryegukanywe na Noël Hitimana ukinira APR wakoresheje 1h05’27”, akurikirwa na Manirafasha Primien ukinira Kamonyi, wakoresheje 1h05’45”naho Myasiro Jean Marie Vianney aza ku mwanya wa gatatu akoresheje 1h06’03”.

Muri buri cyiciro uretse guhabwa imidali, aba mbere batahanye ibahasha irimo ibihumbi 100 by’amafaranga y’u Rwanda, aba kabiri bahabwa ibihumbi 80 Frw naho aba gatatu batahana ibihumbi 60 Frw.

Iri siganwa ritegurwa n’Ihuriro ry’Abarwayi ba Diabète mu Rwanda rifatanyije n’Ishyirahamwe ry’Umukino wo gusiganwa n’Amaguru ku bufatanye bwa Tigo na Minisiteri ya Siporo n’Umuco nk’abaterankunga, ryarimo n’ikindi cyiciro cy’abasiganwa bishimisha rikaba ryitabiriwe n’abasaga 2000 muri rusange.

Nyirarukundo yari amaze hafi amezi atatu atitabira amarushanwa kubera imvune yagiriye muri Shampiyona y'Isi
Noël Hitimana (hagati), Manirafasha Primien wabaye uwa kabiri (ibumoso) na Myasiro Jean Marie Vianney wa gatatu
Nyirarukundo agaragiwe na Iranzi na Yankurije bamukurikiye mu myanya y'imbere
Perezida w'Ishyirahamwe ry'Umukino wo gusiganwa ku Maguru yambika Nyirarukundo umudali wa zahabu yegukanye
Umuyobozi w’Ihuriro ry’Abarwayi ba Diabète mu Rwanda, Gishoma Crispin, yambika Iranzi umudali
Gishoma Crispin yashimiye abitabirIye iri siganwa anavuga ko umwaka utaha rizaba ryiza kurushaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza