Kwamamaza

Perezida wa Colombia yigiye byinshi ku ikipe y’u Rwanda ya Sitting Volleyball

Yanditswe kuya 3-10-2016 saa 09:38' na Manzi Rema Jules


Ikipe y’Igihugu ya Sitting Volleyball yari imaze iminsi muri Colombia aho yari yatumiwe n’Umukuru w’iki gihugu, Juan Manuel Santos mu rwego rwo kwerekana inararibonye Abanyarwanda bafite mu kwimakaza umuco w’amahoro, ubusabane no kwiyunga kw’abahoze bahanganiye ku rugamba binyuze mu mikino by’umwihariko ihuza abafite ubumuga.

Perezida wa Colombia, Juan Manuel Santos yamenye amateka y’ikipe y’u Rwanda ya Sitting Volleyball muri 2012 ubwo yitabiraga imikino Paralempike yabereye i Londres mu Bwongereza.

Uyu Mukuru w’Igihugu ndetse n’abandi banyamahanga batari bake batunguwe no kubona ikipe igizwe n’abamugariye ku rugamba bahanganye nyuma bakaza gukora ikipe imwe, ishyize hamwe ifite n’icyerekezo kimwe.

Umuyobozi w’Ishyirahamwe ry’imikino y’abafite ubumuga (NPC), Nizeyimana Célestin wari kumwe n’iyi kipe, yatangaje ko bari batumiwe kugira ngo bagaragaze uruhare rw’imikino mu kubanisha abantu by’umwihariko abahoze bahanganye.

Ati “Twebwe icyari cyatuzanye muri Colombia ni ukugira ngo dufashe abavandimwe b’Abanya-Colombia mu gikorwa cyo kugaragaza uruhare rwa siporo mu kubanisha abahoze bahanganye. Twakinnye umukino w’amahoro hagati y’ibihugu byombi unarangira neza tunganya iseti imwe kuri imwe.”

Nizeyimana yakomeje avuga ko mu byo baganiriye n’Umukuru w’Igihugu, Santos wari waje kureba umukino w’u Rwanda na Colombia yabashimiye kuba baremeye kwifatanya n’igihugu cye mu rugamba rwo kunga abaturage.

Nyuma y’uyu mukino hatanzwe ibyifuzo binyuranye birimo ko imikino nk’iyi y’amahoro yajya iba kenshi igahuza ibihugu byabayemo intambara.

Mu ijambo Perezida Santos yagejeje ku baturage basaga ibihumbi 3000 bari bitabiriye uyu mukino, yabasobanuriye impamvu zatumye bahitamo gutumira u Rwanda mu gikorwa cyo kwimakaza amahoro, agaruka ku mateka yaruranze ariko anagaragaza ko ari igihugu cyiza cyo kwigiraho ibijyanye n’ubumwe n’ubwiyunge akaba aricyo bifuzaga ko nk’ikipe igizwe na bamwe mu bahoze bahanganye iza gufasha gutanga inama z’uko biyunze.

Uyu mugabo w’imyaka 65, yashimiye Perezida w’u Rwanda, Paul Kagame avuga ko yagize ubutwari bukomeye kuba yarabashije guhuza Abanyarwanda bakaba umwe.

Perezida Santos wagiye ku butegetsi muri 2010 yagaragaje ko yiteguye kumwigiraho byinshi mu kugarura ubuvandimwe mu gihugu cye cyazonzwe n’intambara zimaze imyaka hafi 52, zashegeshe ibice bitandukanye byacyo zituma ubukene n’ubugizi bwa nabi byiyongera ndetse igihugu kigakomeza kuba indiri y’abacuruza ibiyobyabwenge.

Perezida wa Colombia, Juan Manuel atangaza ko hari byinshi igihugu cye cyakwigira ku Rwanda
U Rwanda rwagaragarije Colombia uko imikino ishobora guhuza abahoze bahanganye mu kwimakaza umuco w'amahoro
Umukino wahuje Colombia n'u Rwanda warebwe n'abafana benshi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved