Abatuye mu Mujyi wa Kigali bashyiriweho amasaha ntarengwa yo gukora siporo

Yanditswe na Eric Tony Ukurikiyimfura
Kuya 24 Mutarama 2021 saa 07:09
Yasuwe :
0 0

Minisiteri ya Siporo yatangaje ko abatuye Umujyi wa Kigali bemerewe gukora siporo ku giti cyabo, kuva saa Kumi n’imwe kugeza saa Tatu za mu gitondo ariko batarenze umudugudu batuyemo.

Inama y’Abaminisitiri yabaye ku wa Mbere tariki ya 18 Mutarama 2021, yafashe icyemezo cyo “gushyira Umujyi wa Kigali muri gahunda ya Guma mu Rugo (Lockdown)” mu gihe cy’iminsi 15.

Ku wa Kabiri tariki ya 19 Mutarama 2021, Minisiteri ya Siporo yatangaje ko abatuye Umujyi wa Kigali bemerewe gukora siporo ku giti cyabo ariko batarenze umudugudu batuyemo.

Ishingiye kuri ibyo, kuri iki Cyumweru, iyi Minisiteri yashyizeho amasaha yihariye azajya akurikizwa mu gukora iyi siporo y’umuntu ku giti cye mu mudugudu abarizwamo, yemeza ko ari uguhera saa Kumi n’imwe kugeza saa Tatu za mu gitondo.

Yagize iti “MINISPORTS irongera kwibutsa abatuye Umujyi wa Kigali ko ibikorwa bya siporo muri rusange bitemewe kandi ko siporo yemewe ari iyo mu rugo.”

“Cyakora, abakora siporo ku giti cyabo bemewe kuyikora batarenze imbibi z’umudugudu batuyemo guhera saa Kumi n’imwe za mu gitondo kugeza saa Tatu za mu gitondo gusa kandi birinda, banubahiriza amabwiriza yo kwirinda COVID-19. Siporo mu matsinda ntabwo yemewe.”

Siporo y’abantu ku giti cyabo iri mu cyiciro cya mbere cy’imikino abantu bakorana bategeranye, yakomorewe muri Kamena 2020, ubwo icyorezo cya COVID-19 cyatangiraga kugabanya ubukana.

Siporo rusange izwi nka ‘Car Free Day’ yari imaze amezi ane isubukuwe guhera muri Nzeri mu gihe yari yahagaritswe muri Werurwe 2020 nyuma y’uko hagaragaaye umurwayi wa mbere wa COVID-19 mu Rwanda.

Minisiteri ya Siporo yongeye kwibutsa ko siporo ikorerwa mu mudugudu, buri muntu agakora ku giti cye
Abakora siporo mu Mujyi wa Kigali ntibagomba kurenza saa Tatu za mu gitondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .