Magare na Nyirarukundo bashobora kutitabira “Kigali International Peace Marathon”

Yanditswe na Manzi Rema Jules
Kuya 11 Gicurasi 2018 saa 12:01
Yasuwe :
0 0

U Rwanda rushobora kuzakina isiganwa mpuzamahanga ryitiriwe Amahoro rizenguruka Umujyi wa Kigali, ’Kigali International Peace Marathon’, rizatwara asaga miliyoni 120 Frw, rudafite abakinnyi babiri bakomeye barimo Nyirarukundo Salome na Magare bafite ibibazo by’uburwayi.

Kigali International Peace Marathon iteganyijwe ku wa 20 Gicurasi 2018, byitezwe ko izitabirwa n’abasaga 8000 bakomoka muri Afurika, i Burayi n’ahandi bazaba bahatanira ibihembo bitandukanye n’ibihe ‘Minimas’ bizabafasha kuza mu myanya myiza ku rutonde rw’Ishyirahamwe mpuzamahanga.

Mu kiganiro n’abanyamakuru kuri uyu wa Kane, Umuyobozi w’Ishyirahamwe ry’Imikino Ngororamubiri mu Rwanda, Mubirigi Fidèle, yatangaje ko kugeza ubu hamaze kwiyandikisha abantu bagera ku 3200 ariko hari icyizere ko mu cyumweru gisigaye hazaba habonetse abandi kuko usanga abenshi bagifite umuco wo kwiyandikisha ku munsi wa nyuma.

Uyu muyobozi yavuze ko abazahagararira u Rwanda bageze mu mwiherero i Gicumbi, aho bitabwaho n’abatoza n’abaganga ariko hari ikibazo cy’uko bamwe mu bakomeye barimo Nyirarukundo Salome na Muhitira Felicien bita Magare bashobora kutazakina.

Yagize ati “Kuri iyi nshuro nabamenyesha ko Nyirarukundo Salome arwaye atari no mu mwiherero kimwe n’abandi. Yavuye mu marushanwa ya Commonwealth muri Australia ageze ino atumenyesha ko afite ikibazo cy’umugongo. Kugeza ubu sinavuga ngo azakina cyangwa ntazakina ariko mu bari mu myiteguro ntabwo arimo, aho biganisha murahumva.”

Yakomeje agira ati “Ntabwo ariwe wenyine kuko na mugenzi we w’umugabo Muhitira Felicien nawe igihe cyo kujya mu mwiherero yatumenyeshejke ko arwaye ndetse ari ku miti. Gusa yatubwiye ko azakomeza gufata imiti anakora imyitozo mike akareba niba yazamera neza, ubwo we n’abaganga nibo bazatubwira niba yakina cyangwa atakina.”

Mu kiganiro na IGIHE, Nyirarukundo wanditse amateka umwaka ushize akaba Umunyarwanda wa mbere wegukanye umudali wa zahabu muri Kigali International Peace Marathon imaze imyaka 14, yavuze ko bigoye ko yazakina ariko n’iyo byakunda akitabira nta cyizere cy’umudali wa zahabu.

Yagize ati “Natangiye gukora utwitozo tworoheje gusa sindafata icyemezo niba nzakina. Nagize ikibazo cy’umugongo uruhande rumwe rurambabaza cyane. Ubu ndi gufata imiti wenda bikunze nazitabira ariko sinavuga ko ndi ku rwego rwiza rwo kwizeza abantu umudali.”

Uyu mwaka ingengo y’imari y’iri siganwa yavuye kuri miliyoni 80 Frw igera kuri miliyoni zisaga 120 Frw nyuma yo kubona abaterankunga bashya barimo uruganda rwa Skol, RwandAir na Banki ya Kigali biyongera kuri MTN imaze imyaka ine ariyo muterankunga mukuru.

N’ibihembo byahabwaga abatsinze biziyongera, uwa mbere mu bakobwa n’abahungu azahabwa miliyoni ebyiri z’amafaranga y’u Rwanda; uwa kabiri abone miliyoni 1.5; uwa gatatu atahane miliyoni 1.4 ; uwa kane acyure miliyoni 1.2; uwa gatanu ahembwe miliyoni imwe naho uwa gatandatu ari nawe wa nyuma mu bazahembwa akazatahana ibihumbi 800 Frw.

Hari n’igihembo cyihariye cya moto yatanzwe n’uruganda Nyarwanda rukora moto (Rwanda Motorcycle Company “RMC”) ikazahabwa Umunyarwanda umwe ariko kugeza ubu hakaba hakigwa ku buryo uzayegukana azatoranywa.

Nyararukundo Salome wegukanye umudali wa zahabu umwaka ushize, ashobora kudakina uyu mwaka
Muhitira Felicien (Hagati) nadakina u Rwanda ruzaba ruteze amahirwe kuri Sugira James (Ibumoso) na Hakizimana John (Iburyo)
Umuyobozi w’Ishyirahamwe ry’Imikino Ngororamubiri mu Rwanda, Mubirigi Fidèle

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza