00:00:00 IGIHE NETWORK KN KINYARWANDA EN ENGLISH FR FRANCAIS

Ikipe ya Sina Gérard na VJN zahize izindi muri Shampiyona y’Imikino Ngororamubiri y’Abatarengeje imyaka 17 na 20

Yanditswe na Eric Tony Ukurikiyimfura
Kuya 25 Mata 2021 saa 10:52
Yasuwe :
0 0

Shampiyona y’Igihugu y’Imikino Ngororamubiri yabaye ku wa Gatandatu tariki ya 24 Mata 2021 mu batarengeje imyaka 17 na 20 kuri Stade Amahoro, yahiriye ikipe ya Sina Gérard mu bakobwa mu gihe mu bahungu, yegukanywe na Vision Jeunesse Nouvelle.

Abakinnyi batandukanye bavuye mu makipe 13, barushanyijwe kwirukanka ku maguru metero 100, 200, 400, 800, 1500, 3000 na metero 5000. Hari kandi n’abarushanyijwe mu gusimbuka intera zitandukanye, gutera ingasire, umubunda ndetse n’intosho.

Mu batarengeje imyaka 20

Mu gusiganwa metero 5000 mu bahungu, Nshimiyimana Emmanuel wa APR yakoresheje iminota 16, amasegonda umunani n’ibice 99, akurikirwa na Sekabaraga Sylidio bakinana mu gihe Tuyizere Pacifique wo mu ikipe ya Sina Gérard, yabaye uwa gatatu.

Muri metero 1500, Habinshuti Alexis wa Rwamagana, yabaye uwa mbere akoresheje iminota ine, amasegonda 16 n’ibice 62, akurikirwa na Tuyizere Pacifique wo muri Sina Gérard AC.

Habinshuti Alexis yatsinze kandi no muri metero 800, akoresheje iminota ibiri, isegonda rimwe n’ibice 70, akurikirwa na Ugeziwe Dieudonné wa NAS.

Muri metero 400 hatsinze Niyibizi Cédric wa VJN, wakoresheje amasegonda 55 n’ibice 14, muri 200 hatsinda Tuyishime Sadjaty wa VJN wakoresheje amasegonda 24 n’ibice 45, akaba ari na we watsinze muri metero 100, akoresheje amasegonda 12 n’ibice 17.

Mu bakobwa, muri metero 5000, Nayituriki Dorothée wa Rwamagana, yakoresheje iminota 20, amasegonda 14 n’ibice 41, Nyiraneza Donatha wa Kamonyi aba uwa mbere muri metero 400 akoresheje umunota umwe, amasegonda abiri n’ibice 95.

Uwiringiyimana Séraphine wa Rutsiro yatwaye umwanya wa mbere muri 200, akoresheje amasegonda 27 n’ibice 98, mu gihe kandi yanatwaye uyu mwanya muri metero 100 akoresheje amasegonda 13 n’ibice 30.

Mu batarengeje imyaka 17

Muri metero 100 ku bakobwa, hatsinze Ukwishaka Zawadi wa Kamonyi, akoresheje amasegonda 13 n’ibice 99, mu bahungu hatsinda Nsanzumuhire Benjamin wa VJN, wakoresheje amasegonda 11 n’ibice 35.

Muri metero 3000, Tuyambaze Tabitha ukinira Sina Gérard AC, yabaye uwa mbere mu bakobwa, akoresheje iminota 10, amasegonda atanu n’ibice 71 naho Kwizera Evariste wo muri iyo kipe, aba uwa mbere mu bahungu akoresheje iminota icyenda, amasegonda 14 n’ibice 16.

Nsanzumuhire Benjamin wa VJN yatsinze kandi muri metero 200 mu bahungu, akoresheje amasegonda 23 n’ibice 58, Ayinkamiye Latifa wa Rwamagana akoresha amasegonda 29 n’ibice birindwi mu bakobwa.

Baraka Bruno wa VJN yatsinze muri metero 400, akoresheje amasegonda 53 n’ibice 82 mu gihe mu bakobwa, metero 400 zatsinzwe na Koranibigira Balise wo muri Sina Gérard AC, akoresheje umunota umwe, amasegonda atatu n’ibice 32.

Hategekimana Oreste wo muri Sina Gérard AC, yatsinze muri metero 1500 akoresheje iminota ine, amasegonda 22 n’ibice 53 mu gihe Uwimaniduhaye Triphine wo muri iyo kipe, yegukanye umwanya wa mbere muri metero 800 mu bakobwa, akoresheje iminota ibiri, amasegonda 19 n’ibice 91.

Ikipe ya Sina Gérard niyo yegukanye igikombe cya U-17 na U-20 mu bakobwa mu gihe Vision Jeunesse Nouvelle, yo yegukanye igikombe mu bahungu bitewe n’uko abakinnyi b’aya makipe yombi bahize abandi mu kwegukana imidali myinshi.

Perezida w’Ishyirahamwe Nyarwanda ry’Imikino Ngororamubiri (RAF), Mubiligi Fidèle, yavuze ko bashimishijwe n’ubwitabire bw’aba bakinnyi bakiri bato.

Ati “Imibare igenda yiyongera ku bana kandi ni byiza, hari amakipe ubona yamaze gufata umurongo wo gushaka abana benshi batoya. Mu gihe cyashize ntiwabonaga guhatana kumeze gutya ku bana.”

Kuri iki Cyumweru, aya marushanwa arakomeza, aho bakuru babo nabo barushanwa kuri Stade Amahoro.

Mu bakinnyi bitwaye neza mu batarengeje imyaka 20, hazarebwa ibihe bakoresheje, by’umwihariko abasiganwe muri metero 400, 1500 na metero 5000, hazaboneke abahabwa itike ibajyana muri Shampiyona y’Isi izabera muri Kenya tariki ya 17-22 Kanama 2021.

Shampiyona y'Imikino Ngororamubiri mu batarengeje imyaka 17 na 20 yabaye ku wa Gatandatu
Harabarushanyijwe mu gusimbuka ku ntera zitandukanye
Ikipe ya Sina Gérard niyo yegukanye igikombe cya U-17 na U-20 mu bakobwa
Vision Jeunesse Nouvelle yegukanye igikombe mu bahungu
Abakinnyi bihereza imidali aho kuyambikwa nk'ibisanzwe
Perezida wa RAF, Mubiligi Fidèle, yavuze ko ubwitabire bw'abakinnyi bakiri bato bushimishije

Amafoto: RAF


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .