Ikipe y’u Rwanda yitabiriye imikino Paralempike muri Brazil yakiriwe bidasanzwe (Amafoto)

Yanditswe na Ishimwe Israel
Kuya 3 Nzeri 2016 saa 02:04
Yasuwe :
0 0

Abakinnyi baserukiye u Rwanda mu mikino Paralempike igiye kubera i Rio de Janeiro bakiriwe ku mugaragaro kuri uyu wa Gatanu tariki ya 2 Nzeli 2016 mu birori by’akataraboneka byaranzwe n’imbyino ziganjemo iza gakondo zo muri Brazil.

Muri uyu muhango, ukorerwa ibihugu byose byitabiriye iyi mikino mu bihe bitandukanye, abakinnyi b’u Rwanda n’ababaherekeje bakiriwe ku mugaragaro, ibendera ry’u Rwanda rirazamurwa nk’icyubahiro ku gihugu cyabashije kubona itike yo kwitabira iyi mikino ndetse habaho no guhana impano hagati y’ubuyobozi bwa Komite y’Igihugu y’Imikino y’abafite ubumuga mu Rwanda (NPC Rwanda) n’iya Brazil.

Mbere y’uyu muhango, Umuyobozi wa NPC Rwanda, Nzeyimana Célestin yabanje kuganiriza abakinnyi, abasaba kwitwara neza muri aya marushanwa kuko aho bari bahagarariye igihugu kandi bagomba kugihesha ishema kuko na cyo cyabahaye ibyo bari bakeneye mu gihe cy’imyiteguro.

Ati "Mugomba kumenya kubahiriza igihe, gukorera hamwe mugakina mugamije gutsinda. Icyabazanye aha ni ugukina ntabwo twaje mu butembere”.

Mu muhango wo kwakira ibihugu mu mikino Olempike na Paralempike, abakinnyi bibutswa indangagaciro z’ubuzima bwa Olempike harimo guharanira gutsinda no gukundana.

Gufungura ku mugaragaro imikino Paralempike biteganyijwe tariki 7 Nzeli 2016 ari nabwo imikino izatangira igasozwa kuwa 18 Nzeli 2016.

Gahunda y’amarushanwa ku bakinnyi b’Abanyarwanda

- Tariki ya 10 Nzeli 2016 nibwo ikipe y’u Rwanda ya Sitting Volleyball izakina n’u Bushinwa mu mukino wa mbere.

- Muvunyi Hermas mu kwiruka metero 400 azasiganwa kuwa 16 Nzeli 2016 guhera saa yine n’igice zo muri Brazil, saa cyenda n’igice zo mu Rwanda. Kuri iyi tariki kandi azasiganwa na none muri metero 1500 saa kumi z’i Rio de Janeiro muri Brazil. Kuwa 17 Nzeli 2016, nabwo azasiganwa mu cyiciro cya nyuma ahareshya na metero 400.

Abayobora itsinda ry'u Rwanda berekeza ahabereye umuhango wo kwakira ikipe
Mbere yo kwakirwa, abakinnyi b'Abanyarwanda babanje gucinya akadiho
Abanyarwanda baririmba indirimbo yubahiriza igihugu
Abanya- Brazil bakira ikipe y'u Rwanda mu mbyino z'iwabo
Brazil n'u Rwanda bahanye impano
Ibendera ry'u Rwanda ryazamuwe
Ubwo bamwe mu rubyiruko rwa Brazil batangiraga kubyinira Abanyarwanda
Karasira Eric ukuriye abayoboye itsinda ry'u Rwanda nyuma yo gutanga impano
Nyuma yo kwakirwa bafashe ifoto y'urwibutso
Nyuma abakinnyi b'ikipe y'Igihugu ya Sitting Volleyball bahise bajya koga muri Pisine yo muri Village Paralempike

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza