Kwamamaza

Brazil: U Rwanda rwasezerewe mu mikino Paralempike nta mukino n’umwe rutsinze

Yanditswe kuya 16-09-2016 saa 15:06' na Manzi Rema Jules


Ikipe y’u Rwanda muri Sitting Volleyball yatsinzwe na Canada amaseti atatu ku busa mu guhatanira umwanya wa karindwi mu mikino Paralempike yaberaga i Rio de Janeiro muri Brazil, isezererwa mu marushanwa idatsinze umukino n’umwe muri ine yakinnye.

Mu mukino wakinwe ku mugoroba wo kuri uyu wa Kane,u Rwanda rwatsinzwe na Canada amaseti atatu ku busa ( 25-21, 25-15 na 25-20) ruba urwa nyuma mu bihugu umunani byitabiriye iyi mikino.

Nyuma yo gutsindwa n’u Bushinwa, Iran, Leta Zunze Ubumwe za Amerika mu mikino yabanje, hose rutsindwa amaseti atatu ku busa, Minisitiri wa Siporo n’Umuco, Uwacu Julienne yaboherereje ubutumwa ababwira ko arambiwe no guhora bashaka igisobanuro cyo gutsindwa.

Mu butumwa yaboherereje yagize ati “Mwiriwe, ndashima ko amakuru ajyanye n’imikino muyatugezaho ariko inkuru yo gutsindwa imaze kuba ndende none musigaye mushaka iteka igisobanura ku mpamvu yo gutsindwa.”

Yakomeje agira ati “Ntabwo amarushanwa tujyamo tugenda twiteguye guhura n’amakipe yoroshye niyo mpamvu tugomba gukora cyane aho guhora iteka dushakisha impamvu n’ibisobanuro byo gutsindwa, duhindure dushake ibituma dutsinda”.

Umutoza w’Ikipe y’Igihugu mu mukino wa Sitting Volleyball, Jean Marie Nsengiyumva yari yatangie ko nibura bashaka gukora iyo bwabaga bagatsinda Canada mu mukino wo gushaka umwanya wa karindwi, amahirwe rukumbi yari asigaye ariko icyizere cyayoyotse nyuma yo gutsindwa na Canada mu mukino wa nyuma.

U Rwanda rusoje ruri ku mwanya wa nyuma, nta mukino n’umwe rutsinze ndetse mu mikino ine nta seti n’imwe rwabonye.

Abanyarwanda benshi bahanze amaso Muvunyi Hermas usiganwa ku maguru , ugomba gukina kuri uyu wa Gatanu, bareba ko yakwegukana umudali muri iyi mikino.

Muvunyi arasiganwa saa yine zo muri Brazil, arizo saa cyenda zo mu Rwanda muri metero 400, ndetse yongere kwiruka muri metero 1500 saa kumi n’ebyiri za Rio de Janeiro saa tanu z’ijoro mu Rwanda.

Uyu mukinni watangaje ko ameze neza cyane kandi yiteguye ni umwe mu Banyarwanda bafite amateka mu kwiruka mu maguru dore ko amaze kwegukana imidali ya zahabu itandukanye mu marushanwa mpuzamahanga harimo uwo yakuye i Lyon mu Bufaransa muri 2013 muri Shampiyona y’Isi asiganwa metero 800, uwo yakuye i Maputo muri 2011 n’undi yavanye Brazzaville muri 2015 mu mikino Nyafurika.

Abakinnyi b'u Rwanda bakina na Canada
Ikipe ya Sitting Volleyball itashye nta mukino n'umwe itsinze

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved