00:00:00 IGIHE NETWORK KN KINYARWANDA EN ENGLISH FR FRANCAIS

Uwayo Théogène yahawe ishimwe n’Umwami w’u Buyapani (Amafoto)

Yanditswe na Eric Tony Ukurikiyimfura
Kuya 27 Mata 2021 saa 06:16
Yasuwe :
0 0

Kuri uyu wa Kabiri tariki ya 27 Mata 2021, Perezida w’Ishyirahamwe Nyarwanda ry’Umukino wa Karate, Uwayo Théogène, yashyikirijwe ishimwe “The Order of the Rising Sun, Gold and Silver ray” yagenewe n’Umwami w’u Buyapani, Naruhito, kubera uruhare yagize mu guteza imbere imibanire mu buryo bw’umuco hagati y’u Rwanda n’u Buyapani.

Uwayo Théogène yarishyikirijwe na Ambasaderi w’u Buyapani mu Rwanda, Masahiro Imai, mu muhango wabereye i Nyarutarama mu gitondo cyo kuri uyu wa Kabiri, aho witabiriwe n’abarimo Minisitiri wa Siporo, Munyangaju Aurore Mimosa, Umunyamabanga Uhoraho muri iyo Minisiteri, Shema Maboko Didier na Rwemalika Félicité, Perezida w’agateganyo wa Komite Olempike y’u Rwanda.

Ambasaderi Masahiro Imai yavuze ko iri shimwe ryashyikirijwe Uwayo Théogenè kubera uruhare yagize mu guteza imbere umubano hagati y’u Rwanda n’u Buyapani binyuze muri Karate.

Ati “Umukino wa Karate ufite igisobanuro gukomeye ku Bayapani, siporo ni intangiriro yo guhuza kw’abantu babiri. Twahisemo ko Karate iba ishingiro y’umubano w’ibihugu byombi.”

“Hari aba-Karateka benshi ariko nk’uko na we yabisobanuye, ni we wa mbere wagize uruhare mu ishyirwaho no guteza imbere Ishyirahamwe ry’Umukino wa Karate mu Rwanda.”

Ku ruhande rwa Uwayo Théogène watangiye gukina Karate ubwo yari agiye kwiga muri Kaminuza y’u Rwanda ku myaka 18, hari mu 1981. Yavuze ko yashimishijwe no guhabwa iri shimwe.

Ati “Tumaze nibura imyaka 12 turi federasiyo ku buryo bwemewe n’amategeko, twagiye tuzana abatoza ba Karate bo mu Buyapani bari ku rwego rwo hejuru, tumaze kuzana abarenga batandatu kandi bemewe ku rwego rwa Karate mu Buyapani.”

Umunyamabanga Uhoraho muri Minisiteri ya Siporo, Shema Maboko Didier, yavuze ko kuba Uwayo Théogène yahawe iri shimwe n’Umwami w’u Buyapani, bigaragaza ko Karate y’u Rwanda iri mu cyerekezo cyiza.

Ati “Bigaragaza ko mu gihe Uwayo yayoboyemo iyi federasiyo harimo ibikorwa bigaragaza ko ifite icyerekezo cyiza kandi noneho mu mikorere yayo ni federasiyo tubona ifite abakinnyi bari mu byiciro bitandukanye.”

Bimwe mu bikorwa Uwayo Théogène yashimiwe harimo kuba kuva mu 2014, harateguwe amarushanwa ya Ambassador’s Cup inshuro eshanu ndetse akagira uruhare muri gahunda zigamije iterambere ry’uyu mukino kuva mu 2018, aho u Buyapani butanga ibikoresho bya Karate kuri FERWAKA.

Ambasaderi w’u Buyapani mu Rwanda, Masahiro Imai, yashimiye Uwayo Théogène ku bikorwa bye bigamije guteza imbere Karate
Ambasaderi Masahiro Imai asoma ubutumwa Uwayo Théogène yagenewe n'Umwami w'u Buyapani
Ishimwe Uwayo Théogène yashyikirijwe ryari riherekejwe n'umudali yambitswe na Ambasaderi Imai
Ambasaderi Masahiro Imai ashyikiriza Uwayo Théogène ishimwe yagenewe n'Umwami w'u Buyapani
Ambasaderi w’u Buyapani mu Rwanda, Masahiro Imai, mu muhango wo gushyikiriza Uwayo Théogène ishimwe yahawe
Minisitiri wa Siporo, Munyangaju Aurore Mimosa, yitabiriye uyu muhango
Umunyamabanga Uhoraho muri Minisiteri ya Siporo, Shema Maboko Didier
Perezida w'Ishyirahamwe Nyarwanda ry'Umukino wa Karate, Uwayo Théogène, yashimiye Umwami w'u Buyapani wamugeneye iri shimwe
Ishimwe Uwayo Théogène yahawe n'Umwami w'u Buyapani
Umudali yambitswe na Ambasaderi Masahiro Imai

Amafoto: Mucyo Régis & Rurangayire Guy Didier- Facebook


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .