U Bushinwa: Abanyarwanda bahize abandi mu mahugurwa ya Kung Fu

Yanditswe na Uwishyaka Jean Louis
Kuya 27 Ukwakira 2016 saa 01:03
Yasuwe :
0 0

Abatoza bane mu mukino wa Kung Fu mu Rwanda bari bamaze amezi atatu mu Bushinwa bahabwa amahugurwa yimbitse muri uyu mukino, kuri uyu wa Gatatu nibwo bayasoje batahukana ishema n’umwanya wa mbere nk’igihugu cyitwaye neza muri 11 byayitabiriye.

Ibihugu 11 byari byitabiriye ayo mahugurwa, harimo bitanu bya Afurika na bitandatu by’I Burayi, maze abanyarwanda barimo Uwiragiye Marc, Simparikubwabo Godfrey, Havugimana Emmanuel na Rutabayiro Eric usanzwe ari n’umuyobozi wa tekinike mu Ishyirahamwe rya Kung Fu mu Rwanda wari uyoboye bagenzi be, batahukana umwanya wa mbere.

Perezida w’Ishyirahamwe rya Kung Fu mu Rwanda, Mucyo Jackson avuga ko iyi ari intambwe ikomeye ku gihugu ndetse kwitwara neza kw’aba batoza ngo byatumye u Rwanda rwemererwa kuzohereza abandi mu mahugurwa akizakurikiraho.

Ati “Twari dufite abasore bane bari baragiye mu mahugurwa y’abatoza mu Bushinwa, basoje uyu munsi (ku wa Gatatu). Basoje neza dukurikije ibyo twabifuzagaho. Twari dusanzwe dufite amahirwe ko twari aba mbere mu karere kandi tudafite abatoza bafite ubumenyi nk’ubwo bazanye, bivuze ko intego twihaye yo kuza mu bihugu bya mbere muri Afurika mu myaka ine dushobora kuyigeraho vuba.”

Aba basore bagize umwanya wo gusura bimwe mu bice by’amateka nk’ahakiniwe filimi yakunzwe cyane ku Isi “Karate Kid” n’ibindi. Biteganyijwe ko bazagaruka mu Rwanda tariki 2 Ugushyingo kugira ngo bafashe muri shampiyona y’uyu mwaka izaba imaze iminsi itatu itangiye ikazasozwa tariki 27 Ugushyingo.

Incamake y’Amateka y’umukino wa Kung Fu

Kung Fu ni umwe mu mikino ifite imizi mu bisekuru by’Abashinwa mu myaka miliyoni 1.7 ishize nk’uko urubuga travelchinaguide.com rubitangaza.

Muri icyo gihe, bumwe mu buryo bukoreshwa ubu muri Kung Fu bwakoreshwaga mu buhigi no kwirwanaho.

Uyu mukino wakomeje kugenda ugira ibyo wongerwamo bishya n’amoko atandukanye kugera mu 1911 ubwo wafataga isura nshya wahawe n’ubwoko bw’aba Ming n’aba Qing ari nabwo watangiye kuba umukino wo gufasha abawukina kugira ubuzima bwiza, gushimisha abawureba no gufasha abantu kubaho mu mahoro.

Mu mazina azwi cyane muri Kung Fu harimo Huo Yuanjia wabayeho hagati ya 1868 na 1910 watangije ikipe ya mbere yigenga yitwa Chin Woo Athletic Association ari naho havuye abagiye kwigisha uyu mukino mu bihugu bitandukanye birimo Hong Kong, Singapore, Malaysia, Vietnam n’ibindi.

Mu Rwanda bivugwa ko uyu mukino wahageze ahagana mu 1987 uzanywe n’Umunyarwanda wari waragiye kwiga amasomo asanzwe mu Bushinwa ariko abonye uyu mukino arawukunda niko gutaha atangira kuwigisha.

Kugeza ubu, nta mibare ihamye y’Abanyarwanda bakina Kung Fu ihari ariko mu Ishyirahamwe ry’uyu mukino rivuga ko hari abakinnyi bari hagati ya 2000 na 2500 mu gihugu hose.

Bakoraga imyitozo itandukanye ijyanye n'uyu mukino
Itsinda ry'abanyarwanda ni ryo ryatoranyijwe nk'iryitwaye neza kurusha andi 10 yari muri aya mahugurwa
Aba banyarwanda ndetse n'abandi batozwaga n'Abashinwa
Aya marushanwa yari yitabiriwe n'ibihugu bitanu byo muri Afurika
Aya mahugurwa yari yitabiriwe n'ibihugu 11 byo mu Burayi na Afurika
Bahawe impamyabumenyi nyuma y'ayo mahugurwa
Abanyarwanda bari muri ayo mahugurwa basuye ahantu hatandukanye h'amateka muri uyu mukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244