Umuteramakofe Mike Towell yitabye Imana nyuma yo gukubitwa akava amaraso menshi

Yanditswe na Ishimwe Israel
Kuya 1 Ukwakira 2016 saa 03:00
Yasuwe :
0 0

Umunya-Ecosse, Mike Towell wakinaga umukino w’iteramakofe yaguye mu bitaro nyuma yo gukomereka no kuva amaraso menshi akagera mu bwonko mu mukino wamuhuje na Dale Evans mu Mujyi wa Glasgow.

Umukunzi wa Mike Towell, Chloe Ross yashyize ifoto kuri Facebook agaragaza ko umugabo we yatakaga ububabare budasanzwe, mbere yo gukina umukino wamuhuje na Evans.

Mike Towell w’imyaka 25, kuwa Kane tariki 29 Nzeri nijoro yarwanye na Dale Evans mu mukino wari ukomeye cyane wabereye mu Kigo gikinirwamo Iteramakofe (St Andrews Sporting Club) muri Hoteli Radisson Blu Hotel mu Mujyi wa Glasgow, aho yasenzekajwe n’ibipfunsi yakubiswe mu gace ka gatanu k’umukino, akomeza guhangana kugeza urangiye.

Nyuma y’umukino, Towell yahise ajyanwa igitaraganya mu bitaro bya Kaminuza byitiriwe Umwamikazi w’u Bwongereza, Elisabeth(Queen Elizabeth University Hospital) aho yaje kugwa mu ijoro ryo kuwa Gatanu nkuko Dailymail yabitangaje.

Umukunzi we, Chloe Ross yahise yandika ku rubuga rwe rwa Facebook ati “Mbabajwe cyane no gutangaza ko inshuti yanjye ikomeye yitabye Imana ahagana saa 11:02 mu mahoro. Michael yari yavuye amaraso menshi cyane ndetse yari yabyimbye ubwonko. Yari amaze iminsi ataka umutwe cyane mu byumweru bicye bishize ariko tukabyirengagiza dutekereza ko ari umunaniro wo kwitegura umurwano.”

Yakomeje agira ati “Yari amasaha 24 akomeye cyane mu buzima bwacu. Umwana wanjye atakaje se ariko azaterwa ishema n’ibyo yagezeho.”

N’abandi bakinnyi batandukanye b’uyu mukino bagiye bagira ibyo batangaza nyuma y’urupfu rwa Mike, nk’aho ikipe ya St Andrews Sporting Club yagize iti “Mike uzahora mu mitima yacu”. Eddie Hearn ukora mu kumenyekanisha uyu mukino ati “Birababaje cyane kuba Mike Towell yitabye Imana, twifatanyije n’inshuti n’umuryango muri ibi bihe.”

Mike yakinnye imikino 13 yo ku rwego rw’ababigize umwuga, atsinda 11, anganya rimwe anatsindwa irindi rimwe akaba ari umwe ba bakinnyi bagaragazaga impano muri uyu mukino ndetse bafatwaga nk’ibihangange by’ejo hazaza.

Mike Towell yari umwe mu batanga icyizere mu mukino w'iteramakofe
Umuteramakofe Mike Towell yitabye Imana
Mike Towell (iburyo) mu murwano wo kuri uyu wa Kane wanamuviriyemo gupfa
Dale Evans wakubise Mike bikamuvuramo gupfa nawe yihanganishije umuryango we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza