U Bushinwa bugiye kuzamura umukino wa ‘Tennis de Table’ wari warazimye mu Rwanda

Yanditswe na Manzi Rema Jules
Kuya 4 Nyakanga 2018 saa 09:21
Yasuwe :
0 0

Binyuze muri Ambasade y’u Bushinwa mu Rwanda, umukino wa Tennis de Table wari umaze igihe usa n’utakibaho wabonye inkunga izawufasha kongera kuzamuka, abakinnyi bakongera kwitabira amarushanwa mpuzamahanga.

Tennis de Table benshi bita ‘Ping Pong’ ni umwe mu mikino ikomeye ku Isi ndetse uhagararirwa mu mikino Olempike kuva mu 1988 ariko ishyirahamwe ryawo mu Rwanda ryasaga n’iritagikora ndetse n’umukino warazimye, nta marushanwa ategurwa.

Komite nshya yatowe iyobowe na John Birungi yagiranye amasezerano y’ubufatanye na Ambasade y’u Bushinwa mu Rwanda yo gutera inkunga uyu mukino harimo gutanga ibikoresho, kujyana abatoza n’abakinnyi kwitoreza mu Bushinwa ndetse no gufasha mu gutegura amarushanwa agamije kuzamura impano z’abakiri bato bashobora kuzaserukira igihugu mu gihe kiri imbere.

Mu muhango wo gusinya aya masezerano, Ambasaderi w’u Bushinwa mu Rwanda, Rao Hongwei, yavuze ko igihugu cye kiri mu bikomeye cyane ku Isi muri Tennis de Table, kizakora ibishoboka byose uyu mukino ugatera imbere no mu Rwanda.

Yagize ati “Umukino wa Tennis de Table turashaka ko watera imbere hano mu Rwanda kuko iwacu bajyaga bambaza impamvu mu Rwanda batawukina nkabura icyo mbasubiza. Ni yo mpamvu njye na bagenzi banjye turi hano kugira ngo dufatanye mu kuwuzamura.”

Perezida w’Ishyirahamwe ry’Umukino wa Tennis de Table mu Rwanda, John Birungi, yashimiye Ambasade y’u Bushinwa kuri ubwo bufatanye buzazamura uyu mukino.

Yagize ati "Twembwe nk’Ishyirahamwe ry’umukino wa Tennis de Table imbogamizi za mbere twari dufite ni ibikoresho. Twagerageje kwishakamo ubushobozi, tugura ameza akinirwaho uyu mukino 10 ndetse twatangiye kuyatanga mu makipe n’ibigo by’amashuri kugira ngo abakinnyi babone aho bakinira."

Yongeyeho ati « Abashinwa rero ibyo twumvikanye ni uko bazadufasha kubona andi meza 50, gusa bashobora kongera akagera ku 100. Bazanadufasha mu guhugura abatoza bacu ndetse no kumenyereza abakinnyi, akaba ariyo mpamvu mu minsi iri imbere hari abazajya mu Bushinwa muri iyo gahunda twizera ko izazamura umukino wacu ku buryo bugaragara.»

Birungi yakomeje avuga ko bamaze guhitamo amashuri 10 azahabwa ameza, ibikoresho n’abatoza babihuguriwe muri Kigali kugira ngo abana batangire kwiga gukina Tennis de Table bakiri bato, bakaba bari no gushaka andi mashuri 40 yo mu Ntara bakorana muri iyi gahunda.

Ku ikubitiro Abashinwa bahise banatera inkunga irushanwa rya ‘Open Chinese Ambassador’s Table Tennis Cup 2018’ ryabaye ku Cyumweru, muri rusange ryegukanwa n’ikipe ya Rilima yatahanye ibikombe bitanu.

Mu bakobwa umudali wa zahabu watwawe na Tumukunde Hervine watsinze Twizerane Regine ku mukino wa nyuma ; mu bahungu utwarwa na Masengesho Patrick watsinze Irakiza Jean Bonheur naho mu bakanyujijeho umudali wa zahabu wegukanwa na Muyango Pierre ari nawe utoza ikipe ya Rilima.

Ambasaderi w’u Bushinwa mu Rwanda, Rao Hongwei
U Bushinwa buzaha u Rwanda ameza 50 ashobora kwiyongera akaba 100 akinirwaho ‘Tennis de Table’
Perezida w’Ishyirahamwe ry’Umukino wa Tennis de Table mu Rwanda, John Birungi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza