00:00:00 IGIHE NETWORK KN KINYARWANDA EN ENGLISH FR FRANCAIS

Tundo yegukanye Rwanda Mountain Gorilla Rally na Shampiyona ya Afurika (Amafoto)

Yanditswe na Eric Tony Ukurikiyimfura
Kuya 25 Ukwakira 2021 saa 07:16
Yasuwe :
0 0

Umunya-Kenya Carl Tundo ari kumwe na Tim Jessop muri VW Polo, begukanye isiganwa ry’imodoka rya Rwanda Mountain Gorilla Rally 2021 ryasojwe ku Cyumweru, bibahesha gutwara Shampiyona ya Afurika ya 2021.

Carl Tundo yagiye gukina umunsi wa nyuma wa Rwanda Mountain Gorilla Rally mu Bugesera, yizeye gutsinda, ni nyuma y’uko Umunya-Afurika y’Epfo Guy Botterill bari bahanganye, yavuye mu isiganwa ku wa Gatandatu.

Mu duce dutandatu twakinwe kuri iki Cyumweru i Gako, Ruhuha n’i Kamabuye , Tundo yitwaye neza, arusha mugenzi we wo muri Kenya, Karan Patel, amasegonda 14,4, yegukana Shampiyona ya Afurika ku nshuro ya mbere.

Muri rusange, iminsi ibiri y’iri rushanwa riri ryabaga ku nshuro ya 17 yarangiye akoresheje isaha imwe, iminota 29, amasegonda 42 n’ibice umunani ku ntera y’ibilometero 196 mu gihe undi Munya-Kenya, Kimathi McRae, yabaye uwa gatatu.

Tundo yatumye Kenya yegukana Shampiyona ya Afurika ku nshuro ya gatandatu yikurikiranya mu gihe yabaye Umunya-Kenya wa gatanu uyegukanye nyuma ya Manvir Baryan (2017, 2018, 2019), Don Smith (2016), Jaspreet Chatthe (2015) na David Horsey (1984).

Kwegukana iyi Shampiyona bivuze ko ashobora kwitabira cyangwa ntiyitabire isiganwa ryayo rya nyuma rizabera muri Afurika y’Epfo mu mpera z’ukwezi gutaha hagati ya tariki ya 26 n’iya Ugushyingo 2021.

Abanyarwanda Gakwaya Jean Claude na Mugabo Jean Claude baherukaga kwegukana Rwanda Mountain Gorilla Rally mu 2019, uyu mwaka basoreje ku mwanya wa kane, imbere y’Abarundi Din Imtiaz na Alain Rukundo babaye aba gatanu.

Abagore bo muri Kenya Maxine Wahome na Linet Ayuko basoreje ku mwanya wa gatandatu naho Abagande Yasin Nasser na Ali Katumba baba aba karindwi.

Mu modoka 15 zatangiye iri siganwa zo mu bihugu by’u Rwanda, u Burundi, Kenya, Uganda n’Afurika y’Epfo, 11 zirimo eshanu z’Abanyarwanda ni zo zabashije gukina uduce twose uko twari 12.

Abakunzi b'umukino wo gusiganwa mu modoka bari benshi mu mihanda yo mu Bugesera ahakiniwe Rwanda Mountain Gorilla Rally 2021
Imodoka zaruhukiraga i Nemba. Ku ifoto ni Subaru Impreza GVB ya Nasser Yasi na Ali Katumba bo muri Uganda
Giancarlo Davite wari wagize ikibazo cy'imodoka ku wa Gatandatu, yasiganwe 'Super Rally' ku Cyumweru, adahatanira amanota
Carl Tundo na Jessop Timothy basabwa gusoza Rwanda Mountain Gorilla ubundi bakegukana Shampiyona ya Afurika ya 2021
Patel Karan na Khan Tauseef babaye aba kabiri
Subaru Impreza GVB ya Nasser Yasi na Ali Katumba bo muri Uganda
Kureba 'Rally' bisaba kwihanganira ivumbi
Ford Fiesta yari itwawe na Kimathi McRAE na Kioni Mwangi babaye aba gatatu
Gakwaya Jean Claude na Mugabo Jean Claude baherukaga kwegukana iri siganwa, basoreje ku mwanya wa kane
Umurundi Din Imtiaz ari kumwe na Alain Rukundo basoreje ku mwanya wa gatanu
Jean Jean Giesen na Kevin Mujiji bagize ABG Team batwaraga Toyota Celica
Subaru Impreza N10 yari itwawe n'Abanyarwanda Elefterios Mitraros ari kumwe Paganin Paolo
Abashinzwe imigendekere myiza y'isiganwa bakurikirana uko riri kugenda
Subaru Impreza GC8 yari itwawe na Kanangire N Christian ari kumwe na Karingirwa Regis
Abanya-Kenya ni bo bihariye 'podium' ya Rwanda Mountain Gorilla Rally 2021
VW Polo ya Carl Tundo wegukanye Rwanda Mountain Gorilla Rally
Hatanzwe ibihembo mu byiciro bitandukanye
Perezida wa RAC, Gakwaya Christian, mu muhango wo gutanga ibihembo
Kimathi McRAE na Kioni Mwangi babaye aba gatatu
Patel Karan na Khan Tauseef basoreje ku mwanya wa kabiri
Carl Tundo na Jessop Timothy bishimira igikombe cya Rwanda Mountain Gorilla Rally begukanye
Wahome Maxime na Ayuko Linet bo muri Kenya, bahembwe nk'abagore bitwaye neza mu isiganwa

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .