The Mirror Hotel yashyize igorora abashaka kureba ‘finale’ ya Champions League

Yanditswe na Manzi Rema Jules
Kuya 23 Gicurasi 2018 saa 11:05
Yasuwe :
0 0

Isi y’abihebeye umupira w’amaguru itegerezanyije amatsiko umukino w’ishiraniro uzahuza Real Madrid na Liverpool, ku wa 26 Gicurasi 2018, zihanganira igikombe cya UEFA Champions League i Kiev muri Ukraine.

Mu gihe abafana basaga ibihumbi 63 bazaba bicaye muri NSC Olimpiyskiy Stadium kuwa Gatandatu saa 20h45 , abandi ibihumbi n’ibihumbi mu mpande zose z’Isi bazaba bicaye imbere y’ama televiziyo bihera amaso ihangana ry’aya makipe y’ibigugu.

Ku bafana bo mu Rwanda, by’umwihariko abari muri Kigali no mu nkengero zayo, bashyiriweho uburyo budasanzwe bwo kureba uyu mukino muri The Mirror Hotel i Remera ahazaba hari bamwe mu banyamakuru bakunzwe cyane mu biganiro by’imikino, abanyarwenya bagezweho ndetse n’ibiciro ku binyobwa n’ibiribwa bikazaba byagabanuwe.

Nkurikiyinka Bosco ushinzwe kumenyekanisha ibikorwa muri iyi hoteli yabitangarije IGIHE.

Yagize ati “Twabikoze mu rwego rwo gufasha abakiliya bacu n’abandi bakunzi b’umupira kwidagadura, bakazawurebera ahantu heza, hisanzuye kandi ku mateleviziyo manini ku buryo ikibuga cyose bazaba bakireba. Hazaba hari n’abanyamakuru bakunzwe mu biganiro by’imikino, bazawogeza.”

Yakomeje agira ati “Hazaba hari n’abanyarwenya bazasetsa abantu, twazanye abana bo ku Nyundo bazabaririmbira umukino urangiye, hari ibihembo byateganyijwe ku bantu batandukanye harimo abazahagera kare, abazaba bambaye neza n’abandi. Ikindi, ntihazagire ugira impungenge z’ibiciro kuko bizaba byagabanuwe cyane.”

Real Madrid ifite iki gikombe inshuro 13 harimo n’ebyiri ziheruka, niyo n’ubundi ihabwa amahirwe menshi yo kukisubiza ariko Liverpool nayo si agafu k’ivugwa rimwe muri iri rushanwa kuko imaze kuryegukana inshuro eshanu, by’umwihariko uyu mwaka ikaba yarigaragaje cyane ibifashijwemo na rutahizamu Mohamed Salah ukomoka mu Misiri umaze gutsinda ibitego byinshi kurusha abakinnyi bose ku mugabane w’u Burayi.

The Mirror Hotel iherereye i Remera mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza