Shampiyona y’u Rwanda yo gusiganwa mu modoka izasozwa na Rallye des Mille Collines

Yanditswe na Eric Tony Ukurikiyimfura
Kuya 19 Ugushyingo 2019 saa 11:38
Yasuwe :
0 0

Shampiyona y’u Rwanda yo gusiganwa mu modoka muri uyu wa mwaka wa 2019, izasozwa ku wa Gatandatu hakinwa Rallye des Mille Collines izabera mu mihanda yo mu Karere ka Gasabo.

Rallye des Mille Collines ni irushanwa rya nyuma rizagaragaza uzegukana Shampiyona y’u Rwanda mu gusiganwa mu modoka aho abapilote nka Gakwaya Jean Claude, Jean Jean Giesen na Din IMitiaz bari mu bayihataniye.

Gakwaya Claude arahabwa amahirwe menshi nyuma yo kwegukana Rwanda Mountain Gorilla Rally yakinwe mu kwezi gushize na Huye Rally yabaye muri Kamena 2019.

Ishyirahamwe ry’Umukino wo gusiganwa mu modoka mu Rwanda (RAC) ryatangaje ko kugeza ubu imodoka 10 ari zo zimaze kwiyandikisha muri Rallye des Mille Collines y’uyu mwaka.

Imodoka zizitabira iri siganwa rya nyuma, zizakinira mu mihanda ya Kinyinya, Bumbogo, Nduba na Kimironko, zisoreze i Kibagabaga kuri Pili Pili, aho abapilote bazasiganwa ku ntera y’ibilometero 150 guhera saa 10:00.

Shampiyona y’uyu mwaka yatangiye hakinwa irushanwa rya Nyirangarama Tare Sprint ryegukanywe na Giancarlo Davite muri Werurwe. Hakuriyeho Huye Rally yegukanwe na Gakwaya Jean Claude muri Kamena.

Muri Kanama habaye WIRM Sprint Rally yegukanwe na Giancarlo Davite mu gihe haherukaga kuba Rwanda Mountain Gorilla Rally yegukanwe na Gakwaya Jean Claude uri mu bazahatana no muri Rallye des Mille Collines.

Gakwaya Jean Claude ukinana na Mugabo Jean Claude muri Subaru Impreza N11, baherutse gukora amateka yo kuba Abanyarwanda ba mbere begukanye Mountain Gorilla Rally.

Jean Jean Giesen usanzwe utwara imodoka ya Toyota Celica na we ari mu bari guhatanira kwegukana iyi Shampiyona ya 2019 kimwe n’Umurundi Din Imitiaz utwara Toyota Avensis.

Mitralos, Nshimiyimana Adolphe (Dady) , Yoto Fabrice, Gakuba Fergadiotis Tassos na Kayitankore Loinel na bo bitezwe muri iri rushanwa rizaba ku wa Gatandatu.

Gakwaya Jean Claude arahabwa amahirwe yo kwegukana Shampiyona yo gusiganwa mu modoka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza