Kwamamaza

Perezida wa Brazil yavugirijwe induru mu muhango wo gufungura imikino Paralempike

Yanditswe kuya 8-09-2016 saa 16:59' na Manzi Rema Jules


Mu muhango wo gutangiza ku mugaragaro imikino Paralempike ihuza abafite ubumuga, abanya –Brazil bavugirije induru Perezida mushya, Michel Temer kubera ibibazo bya politike bikomeje kwibasira iki gihugu byatumye mu minsi ishize na Dilma Rousseff yeguzwa nyuma yo gushinjwa ibyaha bya ruswa.

Ibi birori byabereye kuri Stade ya Maracana mu mujyi wa Rio de Janeiro, byaranzwe n’imbyino zizwi nka Samba zo mu muco wa Brazil, igihugu giherutse kwakira imikino Olempike ya 2016 mu kwezi gushize.

Ku munsi w’ejo kuwa 7 Nzeli nibwo hatangiye imikino Paralempike izarangira kuya 18 Nzeli 2016, ihuza abafite ubumuga ndetse n’u Rwanda rukaba rwarayitabiriye.

Ku mugoroba wo kuri uyu wa Gatatu ubwo hakorwaga umuhango wo kwakira ku mugaragaro ibihugu byose byitabiriye iyi mikino, ibihumbi by’abadashyigikiye Perezida mushya Michel Temer bazamuye amajwi arenga n’ubukana bwinshi berekana uburakari bwabo ari na ko bamuvugiriza induru mu gihe yagezaga ijambo ku bari bateraniye kuri Stade ya Maracana.

BBC ivuga ko atari Perezida w’igihugu wenyine wavugirijwe induru kuko na Perezida w’akanama gashinzwe gutegura iyi mikino, Carlos Nuzman ubwo yarimo avuga ijambo abaturage batangiye gusakuza cyane bamwereka ko batamwishimiye ariko agerageza kubima amatwi atanga ubutumwa bwe, bwari bwiganjemo amagambo ahumuriza abafite ubumuga.

Bimwe mu byaranze itangizwa ry’iyi mikino kandi ni ubushobozi budahagije mu mafaranga yari yarateguwe kuzakoreshwa bitewe n’ubukungu bw’igihugu butifashe neza ndetse n’amatike yo kwinjira ku bibuga ataraguzwe n’abantu benshi, ibi byose bikaba bishobora kuzatuma itagenda nk’uko byari biteganyijwe.

Ku matike yari yateguwe hamaze kugurishwa 12% gusa bivuze ko miliyoni 2.5 z’amadolari yari yitezwe kuvamo adashobora kuboneka.

Mu gushaka umuti w’iki kibazo, Meya w’Umujyi wa Rio, Eduardo Paes yiyemeje gutanga miliyoni 36, ibigo bishamikiye kuri leta bisabwa gutanga miliyoni 24 ndetse hashyirwaho hashtag #FillTheSeats Initiative yo gushishikariza abagiraneza kugurira amatike abana bo muri aka gace batishoboye.

Perezida wa Brazil Michel Temer(uwa kane uhereye iburyo) mu muhango wo gutangiza imikino Paralempike
Perezida wa Brazil Michel Temer yavugirijwe induru ubwo yatangizaga imikino Paralempike
Perezida w’akanama gashinzwe gutegura iyi mikino, Carlos Arthur Nuzman, nawe yavugirijwe induru nyuma yo kugaragaza uko politiki y’igihugu ihagaze
Perezida wa Komite Mpuzamahanga mu mikino ya Paralempike, Philip Craven yavuze ijambo abitabiriye umuhango bavuza induru

Andi mafoto y’ibirori byo gutangiza imikino Paralempike


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved