Mukundiyukuri agiye kuba Umunyarwanda wa mbere usifuye Igikombe cy’Isi cya Beach Volleyball

Yanditswe na Eric Tony Ukurikiyimfura
Kuya 24 Kamena 2019 saa 11:13
Yasuwe :
0 0

Umunyarwanda Mukundiyukuri Jean de Dieu yatoranyijwe mu basifuzi 16 bazayobora imikino ya nyuma y’igikombe cy’Isi cya Beach Volleyball kizabera i Hamburg mu Budage guhera tariki ya 28 kugeza ku ya 7 Nyakanga 2019.

Iri rushanwa rizitabirwa n’amakipe 48 y’abagabo n’andi y’abagore n’Ikipe y’Igihugu y’u Rwanda izaba igizwe na Ntagengwa Olivier na Akumuntu Kavalo Patrick mu bagabo mu gihe mu bagore u Rwanda ruzaba ruhagarariwe na Nzayisenga Charlotte na Hakizimana Judith.

U Rwanda rwabonye itike nyuma yo kwitwara neza mu mikino ya nyuma y’Igikombe cya Afurika yabereye muri Nigeria muri Mata.

Mu kiganiro yagiranye n’itangazamakuru kuri iki Cyumweru, Mukundiyukuri yavuze ko yashimishijwe no gutoranywa mu basifuzi b’iri rushanwa rya mbere rikomeye ku Isi mu mukino wa Volleyball ikinirwa ku mucanga.

Ati “Nagize amahirwe ntekereza ko ari ikintu cyiza ku Rwanda muri rusange kuko ni ubwa mbere umusifuzi w’umunyarwanda agiriwe icyizere cyo gusifura Igikombe cy’Isi.”

Nyuma yo gusifura iki gikombe cy’Isi, Mukundiyukuri azerekeza mu Busuwisi, aho azasifura indi mikino mbere yo kwerekeza no mu Buyapani gusifura andi marushanwa azatanga itike y’Imikino Olempike izabera i Tokyo mu mwaka utaha.

Ati “Nzava mu Budage mpite njya mu Busuwisi, hariyo irindi rushanwa rya Major Series ritanga itike y’Imikino Olempike, noneho na nyuma yaho mpite njya i Tokyo mu Buyapani, ni amarushanwa atatu akomeye muri Beach Volleyball ku buryo nkeka ko ari ikintu cyiza ku rwego rw’imisifurire rwanjye n’igihugu.”

Uyu musifuzi asanga kuba yaratoranyijwe ari amahirwe yagize ndetse n’urwego umukino wa Beach Volleyball uriho mu Rwanda rukaba rwaratumye atekerezwaho.

Ati “Ntabwo navuga ngo ni ikintu runaka nakoze kidasanzwe, ntekereza ko harimo n’amahirwe. Ushobora kuba uri umusifuzi w’umuhanga ariko ntugire amahirwe cyangwa ugakora ikosa rituma byose bihita byibagirana, ariko na none ntabwo nakwirengagiza ko kuba u Rwanda ruri kuzamuka muri Beach Volleyball na byo bishobora kuba hari uruhare byagize bigatuma bantekerezaho. U Rwanda ni urwa mbere mu bagabo muri Afurika, abagore bo basubiye inyuma ho gato.”

Mukundiyukuri wabanje gukina Basketball, avuga ko yatangiye gukina Volleyball yakunze akiri muto ubwo bakinaga Mini-Vollyeball yo ku mugozi.

Yegukanye ibikombe bitandukanye mu mashuri ubwo yakinanaga n’abarimo Ndamukunda Flavien na Kwizera Marshall muri Saint-Joseph, begukana igikombe cya Interscolaire n’icya FEASSA yabereye muri Kenya, kiba icya mbere u Rwanda rwari rwegukanye muri iri rushanwa rihuza amashuri yo mu karere ka Afurika y’Uburasirazuba.

Nyuma y’aho, Mukundiyukuri yagize ikibazo cy’amavi ahagarika gukina, ajya gukora amahugurwa y’ubutoza, ariko kubera inyota yo kugera ku rwego mpuzamahanga agana mu busifuzi.

Mukundiyukuri avuga ko kubera gukora cyane no gushaka kumenya byinshi muri uyu mwuga wo gusifura kandi ari umukinnyi w’umwirabura byatumye benshi bakunda kumugarukaho dore ko ari we muto mu bazasifura iyi mikino.

Mu marushanwa amaze gusifura, harimo umukino wa nyuma w’Imikino y’Ibihugu bivuga Icyongereza (Commonwealth Games) n’indi mikino itandukanye ya FIVB Wolrd Tours.

Mukundiyukuri Jean de Dieu usanzwe ari umuyobozi ushinzwe guhuza ibikorwa muri Komite Olempike y’u Rwanda, abaye undi munyarwanda ugiye gusifura amarushanwa yo ku rwego rw’Isi nyuma ya Mukansanga Salma Rhadia uri gusifura mu gikombe cy’Isi cy’abagore mu mupira w’amaguru kiri kubera mu Bufaransa.

Biteganyijwe ko ahaguruka mu Rwanda kuri uyu wa Mbere yerekeza mu Budage.

Mukundiyukuri Jean de Dieu agiye kuba umunyarwanda wa mbere usifiye Igikombe cy’Isi cya Beach Volleyball ubwo kizaba kibera mu Budage
Uretse kuba umusifuzi mpuzamahanga, Mukundiyukuri Jean de Dieu ni umuyobozi ushinzwe guhuza ibikorwa muri Komite Olempike y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza