Minisitiri Uwacu arambiwe abakomeje gushakisha ibisobanuro byo gutsindwa

Yanditswe na Jah d’eau Dukuze
Kuya 14 Nzeri 2016 saa 08:59
Yasuwe :
0 0

Minisitiri w’Umuco na Siporo, Uwacu Julienne asanga igihe kigeze ko amakipe asohokera u Rwanda agenda yiteguye guhatana aho guhora ashaka ibisobanuro by’impamvu yatsinzwe.

Ibi Minisitiri Uwacu yabitangaje mu gihe amakipe ahagarariye u Rwanda amaze iminsi yitwara nabi nyamara aba yatanzweho akayabo k’amafaranga.

Ikipe y’igihugu y’abatarengeje imyaka 18 ya Handball ikubutse muri Afurika y’Uburengerazuba, aho yakiniye imikino irindwi igatsindwamo itanu igacyura umwanya wa karindwi mu makipe umunani.

Aha kandi, ikipe y’abatarengeje imyaka 19 ya Volleyball na yo ni bwo iri kuva muri Tunisia,aho yatsinzwe imikino yose yakinnye.

Hejuru y’ibi, u Rwanda nta gihe kinini gishize ruvuye mu mikino Olempike aho abakinnyi barindwi bose berekejeyo batashye amaramasa.

Mu gihe ibi byari bitarasibangama, ikipe y’ igihugu y’abagore imaze gusezererwa mu mikino ya CECAFA itsinzwe imikino yombi yakinnye, ndetse amazamu yayo yinjiyemo ibitego bitandatu mu mikino ibiri.

Inkuru yo gusezererwa kw’Amavubi y’Abagore, yazanye n’iyo gutsindwa kw’ikipe y’igihugu ya Sitting Volleyball, yatsindwaga umukino wayo wa gatatu mu mikino Paralympic ikomeje na yo kubera i Rio de Janeiro muri Brazil.

Uretse gutsindwa kw’aya makipe yose ahagarariye igihugu mu gihe kitageze ku mezi abiri, Minisiteri ya Siporo ntabwo yashimishijwe n’uburyo buri gihe hatangwa ibisobanuro birebire by’impamvu ikipe yatsinzwe, nk’aho bo baba bagiye mu butembere.

Minisitiri Uwacu arakangurira amakipe ahagarariye u Rwanda kujya ajya gukina ashaka intsinzi nk'abandi

Minisitiri Uwacu asubiza email y’ abari mu mikino Paralempike yagize ati“Mwiriwe, ndashima ko amakuru ajyanye n’imikino muyatugezaho ariko inkuru yo gutsindwa imaze kuba ndende none musigaye mushaka iteka igisobanura impamvu yo gutsindwa.”

“Ntabwo amarushanwa tujyamo tugenda twiteguye guhura n’amakipe yoroshye niyo mpamvu tugomba gukora cyane aho guhora iteka dushakisha impamvu n’ibisobanuro byo gutsindwa, duhindure dushake ibituma dutsinda”.

Kutamenyerana, kutabona umwanya uhagije wo kwitegura ndetse no kuba hari amasomo yizwe, ni zimwe mu mpamvu zagiye zikunda gutangwa n’abayoboye amakipe y’igihugu mu rwego rwo gushakira ibisobanuro gutsindwa kwabo.

Ibi bikaba bivugwa mu gihe abakurikirana imikino bo bakomeje kunenga Minisiteri ya Siporo gutanga amafaranga y’umurengera ku makipe aba mu by’ukuri ntaho avuye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244