00:00:00 IGIHE NETWORK KN KINYARWANDA EN ENGLISH FR FRANCAIS

Lewis Hamilton yongereye amasezerano muri Mercedes

Yanditswe na Eric Tony Ukurikiyimfura
Kuya 3 Nyakanga 2021 saa 06:52
Yasuwe :
0 0

Lewis Hamilton watwaye Shampiyona y’Isi ya 2020 muri Formula One (F1), yongereye amasezerano y’imyaka ibiri mu ikipe ya Mercedes, azageza ku mpera z’umwaka wa 2023.

Uyu Mwongereza w’imyaka 36, yegukanye ibikombe bitandatu ari kumwe n’iyi kipe yo mu Budage iba mu Bwongereza, kuva ayigezemo mu 2012 avuye muri McLaren.

Muri uyu mwaka w’imikino, Hamilton ahataniye guca agahigo ko kwegukana Shampiyona ya F1 ku nshuro ya munani, ariko ari ku mwanya wa kabiri inyuma ya Max Verstappen wa Red Bull umurusha amanota 18.

Nyuma yo kongera amasezerano, Hamilton yagize ati “Turacyafite byinshi byo kugeraho, hombi haba mu muhanda no hanze yawo.”

Mu mwaka ushize wa 2020 ni bwo Hamilton yari yatangiye ibiganiro n’umuyobozi wa Mercedes, Toto Wolff, ariko bombi baza kwandura COVID-19, umwaka urangira nta masezerano afite.

Hamilton yanze gusinya umwaka umwe (wa 2021) kugeza muri Gashyantare, ariko yavuze ko azakomeza gukina muri F1 nyuma yawo ndetse yongeye kugirana ibiganiro na Wolff muri Gicurasi.

Bitandukanye n’amakuru yatangajwe, Lewis Hamilton ntiyigeze agabanyirizwa umushahara ndetse amafaranga abona azasubira uko yari ameze mbere y’uko COVID-19 yaduka, aho agera kuri miliyoni 40£ ku mwaka.

Hamilton na Mercedes bihariye F1 kuva mu 2014. Undi mupilote wegukanye shampiyona yayo hagati aho ni Nico Rosberg bigeze gukinana mu 2016.

Uyu mugabo w’imyaka 36, amaze kwegukana grand prix 98 ndetse yabaye uwa mbere mu masiganwa 100 azibanziriza.

Nyuma yo kugera ku gahigo ka Michael Schumacher wegukanye F1 inshuro zirindwi, Hamilton ategerejweho kwigaranzura Verstappen uri imbere muri uyu mwaka, akaba uwa mbere mu mateka y’uyu mukino uryegukanye inshuro umunani.

Lewis Hamilton yongereye amasezerano y'imyaka ibiri muri Mercedes
Hamilton umaze kwegukana F1 inshuro zirindwi, ategerejweho gutwara iya munani, akaba uwa mbere ubikoze
Muri uyu mwaka w'imikino, Hamilton ari ku mwanya wa kabiri inyuma ya Max Verstappen wa Red Bull

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .