Imodoka 10 ziritabira Mountain Gorilla Rally 2019 itangizwa n’agace kadasanzwe kuri Stade Amahoro

Yanditswe na Eric Tony Ukurikiyimfura
Kuya 4 Ukwakira 2019 saa 08:20
Yasuwe :
0 0

Bidasubirwaho, imodoka 10 zirimo eshanu zo mu Rwanda ni zo zizitabira isiganwa ry’imodoka rya Rwanda Mountain Gorilla Rally 2019 ritangira kuri uyu wa Gatanu, aho rizamara iminsi itatu, rigakinirwa kuri Stade Amahoro no mu mihanda yo mu karere ka Bugesera na Rwamagana.

Iri siganwa ni rimwe mu agize Shampiyona yo gusiganwa mu modoka mu Rwanda ndetse rifite umwihariko w’uko ribarwa ku ngengabihe ya Shampiyona Nyafurika.

Mu kiganiro n’abanyamakuru cyabaye kuri uyu wa Kane, Umuyobozi wa Rwanda Mountain Gorilla Rally 2019, Cyatangabo Ange François, yavuze ko isiganwa ry’uyu mwaka rizakinwa iminsi itatu, rikabanzirizwa n’agace kadasanzwe gakinirwa kuri Stade Amahoro kuri uyu wa Gatanu.

Ati” Isiganwa rizaba iminsi itatu. Riratangira kuri uyu wa Gatanu haba Super Special Stage kuri Stade Amahoro, ifite intera ya kilometero 1.5 tuzayikora inshuro ebyiri. Isiganwa rizakomeza ku munsi wa kabiri (ku wa Gatandatu) hakinwa uduce umunani mu gihe ku Cyumweru hazakinwa uduce turindwi.”

Ku wa Gatandatu, isiganwa rizabera mu mihanda yo mu karere ka Bugesera. Hazakinwa agace ka kabiri ka Nyamizi kazaba gafite intera y’ibilometero 19.3 n’aka gatatu ka Gahabwa gafite intera y’ibilometero 11.63, twombi tuzasubirwamo hakinwa agace ka kane n’aka gatanu.

Abasiganwa bazakina agace ka gatandatu muri Gako ku ntera y’ibilometero 14.61 mu gihe aka karindwi kazakinirwa i Gasenyi ku ntera y’ibilometero 22.34. Utu duce twombi tuzongera dusubirwemo hakinwa aka munani n’aka cyenda.

Umunsi wa gatatu uzakinirwa mu mihanda ya Gahengeri, Ntunga na Musha muri Rwamagana, aho abapilote bazakina agace ka 10 muri Gahengeri ku ntera y’ibilometero 10.16, aka 11 muri Ntunga ku ntera y’ibilometero 21.9 ndetse n’aka 12 muri Musha ku ntera y’ibilometero 21.04. Utu twose bazongera badusubiremo bakina agace ka 13, aka 14 n’aka 15.

Nzamwita Eric Maxime uri mu bateguye Rwanda Mountain Gorilla Rally 2019, yavuze ko izitabirwa n’imodoka 10 nubwo abari biyandikishije ari 13.

Ati” Hari hiyandikishije abapilote 13, ariko kuri uyu munsi ubanziriza isiganwa 10 ni bo babonetse tugenzura imodoka zabo mbere y’uko batangira gukina. Umwe (Mitralos) yagize ikibazo cy’uburwayi, abandi babiri (Masudi na Awandin Ilias) imodoka zabo ntizabonekeye igihe.”

Mu modoka zisasiganwa harimo imwe yo mu Bubiligi, enye zo mu Burundi n’izindi eshanu zo mu Rwanda.

Perezida w’Ishyirahamwe ry’Umukino wo gusiganwa mu modoka mu Rwanda ‘RAC’, Gakwaya Christian yavuze ko bizeye ko mu mwaka utaha u Rwanda ruzongera kwakira abapilote bakomeye nk’Umunya-Kenya Baryan Manvir wegukanye Rwanda Mountain Gorilla Rally ya 2017, kuri ubu wamaze kwizera gutwara Shampiyona ya Afurika y’uyu mukino.

Giancarlo Davite, Rashonali Mohamed Abbas, Bukera Valery na Gakwaya Jean Claude bari mu bahabwa amahirwe yo kwegukana isiganwa ry’uyu mwaka.

Mu mwaka ushize, iri siganwa ryegukanwe n’Umubiligi Giancarlo Davite ari kumwe na Sylivia Vindevogel mu modoka ya Mitsubishi Lancer Evo10.

Abapilote 10 bazakina Rwanda Mountain Gorilla Rally 2019

  1. Giancarlo Davite (U Bubiligi)
  2. Gakwaya Jean Claude (Rwanda)
  3. Roshanali Mohamed Abbas (Burundi)
  4. Jean Jean Giesen (Rwanda)
  5. Din Imtiaz (Burundi)
  6. Remezo Christian (Burundi)
  7. Mwananteba Zamin (Burundi)
  8. Nshimiyimana Adolphe (Rwanda)
  9. Mayaka Felekeni Amigo (Rwanda)
  10. Kayitankore Lionel (Rwanda)
Perezida w’Ishyirahamwe ry’Umukino wo gusiganwa mu modoka mu Rwanda ‘RAC’, Gakwaya Christian
Umuyobozi wa Rwanda Mountain Gorilla Rally 2019, Cyatangabo Ange François
Nzamwita Eric Maxime yavuze ko Rwanda Mountain Gorilla Rally Rally 2019 izitabirwa n'imodoka 10 zirimo eshanu zo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza