Ifoto y’Umunsi: Sina Gérard mu mukino wo gusiganwa mu modoka

Yanditswe na Eric Tony Ukurikiyimfura
Kuya 23 Ugushyingo 2019 saa 07:15
Yasuwe :
0 0

Rwiyemezamirimo Sina Gérard, nyiri Entreprise Urwibutso Nyirangarama, yinjiye mu mukino wo gusiganwa mu modoka mu Rwanda ndetse ni we wateye inkunga isiganwa ryabimburiye ayandi muri Shampiyona y’uyu mwaka muri Werurwe, rya Nyirangarama Tare Sprint Rally.

Iri siganwa ryabereye mu Karere ka Rulindo tariki ya 9 Werurwe, ryegukanywe na Giancarlo Davite afatanyije na Yan Demester bari muri Mitsubishi Lancer.

Mu mihanda ya Shyorongi, Nyange no ku musozi wa Tare niho iri siganwa ryareshyaga na kilometero 88.6 ryanyuze, ryitabirwa n’imodoka 12. Mitraros Elefterrios ari kumwe na Paganin Paolo bari bagarutse gusiganwa mu rw’imisozi igihumbi.

Umubiligi Giancarlo Davite yaritwaye akoresheje isaha imwe, iminota 11 n’amasegonda 48. Ibi bihe, yabigize nyuma yo gukuramo umunota umwe n’amasegonda 20 yahanwe.

Ku mwanya wa kabiri haje Umurundi Roshanali Mohamed wasizwe iminota itandatu n’amasegonda 14 mu gihe Mitraros Elefterrios we yasizwe n’uwa kabiri iminota itatu n’amasegonda 18.

Mu mpera z’umwaka ushize kandi, tariki ya 23 Ukuboza 2018 mu murenge Bushoki ku musozi wa Tare mu karere ka Rulindo, habereye igikorwa cyo kwereka abahatuye isura y’amasiganwa y’imodoka yari asanzwe abera mu gihugu mu bice bitandukanye, igikorwa cyari cyateguwe na Sina Gérard ku bufatanye n’Akarere ka Rulindo.

Shampiyona y’u Rwanda yo gusiganwa mu modoka muri uyu wa mwaka wa 2019, irasozwa kuri uyu wa Gatandatu hakinwa Rallye des Mille Collines ibera mu mihanda yo mu Karere ka Gasabo.

Rallye des Mille Collines ni irushanwa rya nyuma riza kugaragaza uwegukana Shampiyona y’u Rwanda mu gusiganwa mu modoka aho abapilote nka Gakwaya Jean Claude, Jean Jean Giesen na Din Imitiaz bari mu bayihataniye.

Gakwaya Claude arahabwa amahirwe menshi nyuma yo kwegukana Rwanda Mountain Gorilla Rally yakinwe mu kwezi gushize na Huye Rally yabaye muri Kamena 2019.

Imodoka zitabira iri siganwa rya nyuma, zirakinira mu mihanda ya Kinyinya, Bumbogo, Nduba na Kimironko, zisoreze i Kibagabaga kuri Pili Pili, aho abapilote basiganwa ku ntera y’ibilometero 150 guhera saa 10:00.

Sina Gérard na Kayiranga Emmanuel uyobora Akarere ka Rulindo ubwo berekaga abatuye aka Karere bamwe mu bakina umukino wo gusiganwa mu modoka
Sina aganira n'abakina umukino wo gusiganwa mu modoka
Sina Gérard atwaye imwe mu modoka zisiganwa muri Rallye
Umuyobozi w'Akarere ka Rulindo Kayiranga Emmanuel hamwe na Yoto Fabrice mu modoka
Sina Gérard yambikwa akarindamutwe k'abapilote bakina Rallye
Rallye ya mbere muri uyu mwaka wa 2019 yabereye ku musozi wa Tare
Abanya-Rulindo bishimiye kubona bamwe mu bakina umukino wo gusiganwa mu modoka mu Rwanda

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza