00:00:00 IGIHE NETWORK KN KINYARWANDA EN ENGLISH FR FRANCAIS

Handball: Bigoranye, Police HC yegukanye ‘Coupe du Rwanda’ itsinze APR

Yanditswe na Eric Tony Ukurikiyimfura
Kuya 1 Ugushyingo 2021 saa 12:56
Yasuwe :
0 0

Ikipe ya Police HC ni yo yegukanye Igikombe cy’Igihugu kizwi nka “Coupe du Rwanda” itsinze mukeba wayo APR HC ibitego 25-23 mu gihe Kiziguro SS yegukanye iri rushanwa mu bagore.

Ku wa Gatandatu no ku Cyumweru, tariki ya 30 n’iya 31 Ukwakira 2021, ni bwo habaye imikino isoza irushanwa rya “Coupe du Rwanda”, ryatangiye mu byumweru bibiri bishize.

Mu bagabo, igikombe cyegukanywe na Police Handball Club yatsinze APR HC ibitego 25-23 ku mukino wa nyuma wabereye i Remera ku Cyumweru, tariki ya 31 Ukwakira 2021.

Umutoza wa Police HC, IP Ntabanganyimana Antoine, yavuze ko umukino utari woroshye kuko bahuye na APR igizwe n’abakinnyi batari bayimenyereyemo.

Ati “Umukino uratugoye kuko warimo imbaraga nyinshi n’ishyaka. APR yari yaje yongeye umurego, ntabwo byari bisanzwe n’abakinnyi bakinishije uyu munsi ntabwo twari tubamenyereye mu ikipe yabo. Byatugoye kugira ngo tumenye umwe kuri umwe, ariko birangiye umukino tuwutsinze.”

Umwanya wa gatatu wegukanywe na ES Kigoma yatsinze ADEGI ibitego 22-16.

Mu bagore, irushanwa ryegukanywe na Kiziguro SS yatsinze Falcons ibitego 39-33 naho UR Rukara yegukana umwanya wa gatatu itsinze UR Gikondo ibitego 39-24.

Umukinnyi w’irushanwa mu bakobwa yabaye Mukantabana Patricie watsinze ibitego byinshi (36) mu gihe mu bagabo yabaye Kayijamahe Yves watsinze ibitego 51.

Perezida w’Ishyirahamwe Nyarwanda ry’umukino wa Handball (FERWAHAND), Utabarutse Théogène, yavuze ko bishimishije kongera kubona ubwitabire bw’amakipe ya Kaminuza ndetse n’ay’amashuri yisumbuye.

Ati “Ni irushanwa riduhaye ishusho ko abantu bari banyotewe n’uyu mukino, urebye uko igikorwa cyatangiye, irushanwa rimaze ibyumweru bibiri, amakipe yabaye menshi bituma duhitamo ko imikino ya nyuma iba mu kindi cyumweru.”

Yakomeje agira ati “Umukino abantu baragenda bawitabira, ndashima ubuyobozi bwa Kaminuza zacu kuko hari umusanzu bamaze gutanga. Ndashima kandi abantu ku giti cyabo bafasha amakipe kwitabira kandi mwabonye ko n’amashuri yisumbuye yongeye kwitabira amarushanwa.”

Iri rushanwa ryari ryitabiriwe n’amakipe 26 mu byiciro byombi arimo 14 y’abagabo n’andi 12 y’abagore.

Nyuma ya Coupe du Rwanda, FERWAHAND iteganya ko nyuma y’icyumweru kimwe hazatangira irushanwa ribanziriza shampiyona. Aya marushanwa yombi akaba ari mu rwego rwo gutegura Ikipe y’Igihugu izitabira Igikombe cya Afurika cy’Abagabo kizabera muri Maroc muri Mutarama 2022.

Abakinnyi n'abatoza ba APR HC bifotoza mbere y'umukino
Police HC yifotoza mbere yo guhura na APR ku mukino wa nyuma
Police HC yegukanye igikombe nyuma yo gutsinda bigoranye kuko ikinyuranyo cyabaye amanota abiri
Gakwaya Christian wari uhagarariye Komite Olempike y'u Rwanda ni we watanze igikombe
Kiziguro SS yatwaye irushanwa mu bagore
Kayijamahe Yves wabaye umukinnyi mwiza w'irushanwa mu bagabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .